📖 ZKIZ Archives

寃寃相報到底何時了，UBS瑞銀大戰利豐（494）到底幾時完？

瑞銀分析員梁裕昌Spencer早排出報告，插利豐兼叫人沽利豐，罕有地令向來低調嘅利豐即刻還手兼還口，喺聯交所出通告反駁兼搞壇大龍鳳策略日同分析員解話。

股價應聲跌3%

策略日上利豐仲號稱有5單收購嚟緊，真情剖白打動咗好多大行分析員輪流出報告「挺豐」，但似乎瑞銀同Spencer真係不為所動，噚日竟然再出招突擊！

噚日嗰份新鮮熱辣嘅報告話，「部份大型供應商考慮離開會拖累產品質素」，去到最後附錄嘅Q&A，再插多一刀「投資者對管理層冇直接回答問題感到失望……」，而佢哋畀利豐嘅目標價繼續係得9蚊！

相比起瑞銀第一次狠插利豐嗰份報告，話「併購表現如果唔達標，反而可帶來豐厚嘅非現金賬面收益」同「併購模式無法持續……」，呢份報告嘅殺傷力都唔輕。

噚日，利豐股價就應聲跌咗3%，收$15.78！

「瑞豐鬥」唔知幾時完

雙方拳來腳往到底發生咩事，相信只有佢哋自己至知，而照o依家最新嘅發展嚟睇，瑞銀應該係咬住利豐唔放，而利豐又應該諗緊計還手，咁搞落去，呢單「瑞豐鬥」分分鐘長命過娛樂版嘅「鋒芝變」都唔定呢！

李華華

香港電視的開台劇《選戰》，予人諸多幻想：香港人終於可以一人一票選特首，而且是有競爭、有選擇那種。香港第一個女特首，是李心潔，而非林鄭或葉劉。公仔箱本應是個夢工場。做這場春秋大夢的，有兩兄弟。大哥黃國強是總導演，細佬黃偉強是編審。兩人自小電視撈飯，八九年齊齊加入TVB。大台深似海，一編一導廿多年來從沒相遇，直至跳槽到港視，《選戰》是他倆首度合作。「TVB無論拍醫生律師飛機師，都係同一個tone：輕輕鬆鬆鄧梓峰。我哋（港視）成日強調，套劇要講乜？要咬住嚟講，唔放過佢。」黃偉強話，李心潔老公有小三之類的枝節，不會在劇中出現。咬住唔放，本來就是《選戰》的命運。劇本早在去年九月完成，但到十月，港視便失落免費電視牌照。隨之而來是裁員、未啟動的製作全部煞停。及後王維基以流動電視將港視借屍還魂，再失敗，《選戰》的命運亦隨之而起落。但黃國強誓不低頭：「一次又一次turn down。只不過係我死唔斷氣，成日都走去chur王生。《選戰》個古仔搞咗咁耐，冇理由一疊紙咁擺喺度。」香港人那場選戰也爭取了多年，若佔領過後沒成事，誰又會心息？

港視搞公投，《選戰》以超過十萬票成為開台劇。劇情設定在二○二二年，屆時香港變成怎樣，誰也說不上，但創作人至少能規劃公仔箱內的世界。黃偉強筆下的《選戰》是一則預言：「今日唔知聽日事。不如就以現時的大趨勢做遊戲規則。」他眼中的「大趨勢」很灰：香港人可以一人一票選特首，但提名委員會仍有四大界別，候選人要取得過半數支持，方能出閘，「戲劇上，如果已經有個好完善的選舉，其實冇咁好睇。喺一個咁有限制、咁唔公平——呀，唔好咁講……」偉強陷入劇透邊緣，由國強補上：「係艱難重重。」「喺咁嘅情況下，（李心潔）都爭取到一個位置，大家相信佢有機會改變政局。」第一集講述二○一七年有大事發生，令李心潔投身政壇，並於五年後突破篩選，取得特首選舉的入場券，與廖啟智對壘。他倆本非政治動物，「搞政治」純為填補市場缺口。英美日韓均有政治劇。連中共高層王岐山都要追看《House of Cards》、小日本又有木村拓哉在《Change》中扮首相，唯獨華語世界一片荒涼。三年前，黃偉強任職壹電視，看見台灣總統選舉波譎雲詭，正籌備把它寫成劇本：「可惜公司好快收咗檔。」那邊廂，黃國強剛剛加入了香港電視，狼豬之戰正打得火熱，「不如講政府內部的權鬥，像《West Wing》之類？」兩兄弟一拍即合，卻發現立法會和政府總部的場面難以用實景拍攝，遂把戰線畫在選舉上：「唐營、梁營日日喺報紙上都有古仔，咪當電視劇嚟做。」黃偉強從台灣撤退後，曾反攻大陸，轉投北京一間製作公司。一年後回歸本土，只為心中那一場《選戰》：「除咗王維基，又有邊個肯拍？」

田雞

二人首先要惡補政治。「做咗廿幾年創作，點會接觸到政治題材？好多嘢都係由《選戰》開始。」黃偉強在TVB寫過《烈火雄心2》，但不同的制服，骨子裡都是兩幫男女在溝來溝去。跳出離地的廠景，他有新發現：「其實我都係咁愚昧，今次先知道要幾多提名（特首候選人）先入到閘。」「唔只你，美術組做一件道具，都搞清咗啲嘢。」黃國強說。李心潔的選舉辦公室有一幅提委會的「成分表」，羅列了各個界別的勢力範圍，「佢哋做落先知道漁農界佔咁多票，哈哈。」黃偉強自詡「有少少政治盲」，忽然發現自己是隻熟到快甩皮的田雞，「原來喺分組點票下，代議士根本唔可以循正常途徑反映我哋嘅聲音，我明白班友點解要掟蕉。唔拉布，又可以做啲乜？冇。知道咗，唉，咪感慨囉。」他把這感慨轉化成對白，成了預告片中鏗鏘的一句：「公民抗命，竟然講到變成顛覆政府。因為我哋嘅政府、我哋嘅立法會，被一班爛人把持住。」《選戰》既然教育了劇組上下，出街後難保不會感化牛頭角的順嫂們。這才是港視不獲發牌的最大理由。

死咬

去年十月十五日，黃國強如常跟王維基開會。秘書中途告知：「開記招啦喎。」大家才望向電視。政府宣布港視不獲發牌，全場鴉雀無聲。當時他的另一套劇集《歲月樓情》剛好煞科，看着同事陸續被遣散，他仍未想到作品若不能出街，會留在倉底腐爛，還是怎樣，「我淨係問『點解』。原來你幾條友喺行政會議嘅決定，唔話得俾人知點解？」黃偉強亦寫完了《選戰》的劇本，「老闆講過，啟動咗嘅劇本會照拍。成班人用咗半年時間去寫，都係成本。」其後，王維基宣布港視改為提供流動電視服務。到今年一月，又被指會觸犯《廣播條例》，啟播無期，所有劇本正式宣布死亡。但黃國強日哦夜哦，終於獲王維基首肯。一向堅拒與中央對着幹的王老闆，是因為發牌無望，故意挑戰政治題材？「我覺得又唔係『盡地一煲』，佢本身都鍾意個劇本。開得成，第一，係我應承佢要喺budget內完成；第二係因為李心潔願意接拍。」兄弟倆都覺得李心潔柔弱得來有一團火，不作他選。但剛剛扑槌，又爆出離奇過選戰的枝節：李心潔丈夫偷食斷正、小三的爸爸開槍殺人再自殺。「開頭都擔心佢應付唔到。但開鏡前佢來香港，一坐低，十五集都做好晒筆記。」

《選戰》終於在七月底開鏡，拍了三個月。其間雨傘運動遍地開花，超出了黃偉強的預期，「冇講點收科，當時連佔中點發生都未知。」但劇中仍會提及一四年秋天的那場革命。往年六四、七一，他偶爾會跟朋友去「圍威喂」，「行完出年又嚟過，究竟有乜意思呢？」所以他落旺角支持佔領，「見到啲學生，我真係覺得，原來係要咬住唔放，先有一線機會。」現實黯淡，但二人心存盼望。黃偉強說：「我哋塑造一個香港人認同的、第一個女特首，就等同製造希望。」黃國強和應：「我哋比較樂觀，這可能只係基於一個信仰，我講唔到任何理由俾你聽。」「因為知道（香港）有問題的，唔係得我同你。既然咁多人仲肯去做嘢，其實一定行到，就算樂觀都好正常吖？」

審查

正如港視和《選戰》可以無限復活，香港應該未死得。王維基聲稱開台前已收到八位數字的廣告費，但與每集一百萬的拍攝成本相比，仍有一段距離。「我諗係《選戰》啫，其他應該OK。」黃國強以為廣告商在商言商：「香港是個理性的地方。多人睇，多曝光，不就是多人會買你個節目？」但自動歸邊的人多的是。另一邊廂，騰訊已獲得港視的獨家播放權，悉數購入港視所有節目。「我都想問，大陸係咪會睇到《選戰》？」「每集要剪幾多呢？如果要河蟹，就十五集都唔使播。」他倆有一籃子疑問。在騰訊搜尋「佔中」，只會得出《環球時報》的負面報導；搜尋「六四+天安門」，則有「六十四年來天安門毛主席畫像的N個版本」。《選戰》被「國有化」，大有機會要留給馬化騰獨自欣賞。正因為「理性」，才有自我審查這回事。選舉少不了中聯辦的份兒。王維基對此的態度是：「冇必要唔寫，既然係大家都知道嘅嘢。」但經過發牌事件，黃國強有感港視惹火，「除咗滿足我哋嘅創作、令套戲好睇，都要考慮到公司嘅情況。我哋唔知會有咩影響。」黃偉強接上：「成個項目都已經放任咗你，收斂少少係責任。」「開頭我哋直頭想唔講中央。但又覺得實在太過……」「失真。」「寫得好subtle，唔會落重墨啦。」劇中會有中聯辦要員的角色？「唔……你要自己睇，我哋用咗一啲戲劇方法去處理呢個人物。」「但我唔認為咁係『自我空間收窄』。如果你本住良心都係咁決定，OK。但如果基於利益，係另外一回事。」

1137

三年前，王維基在半島酒店咖啡室，拿着TVB近年最高收視劇集的工作人員名單，逐個約見，兄弟二人都沒有即時過檔。黃國強考慮了十天：「我都幾傻，用咗好多角度去研究。一百萬一集拍唔拍到？ 嗰陣我已經做budget。」當時他拍的《法證先鋒Ⅲ》剛出街，收視不俗。某日跑步時他忽然問自己：「唔試過點知唔得？」至於黃偉強，則選擇了向北京靠攏：「王生口才好好。但佢愈吹，我愈驚。」一年後，還是因為《選戰》而回歸。如今《選戰》終於出街，他倆的疑慮亦已釋除。為了清洗TVB的餘毒，王維基曾叫整個劇組停工，齊齊睇美劇。「冰姐（港視行政總裁杜惠冰）見到我哋成班人坐喺度，話：呢度好多錢。」黃國強心想：「呢個老闆真係癲嘅。」王維基又愛到拍攝現場「探班」：「由朝坐到晚，但佢唔係齋睇咁簡單。個衰嘢蠱蠱惑惑，第二日叫咗我入房，問咗好多嘢。」由鏡頭如何處理，以至行內的專有名詞，每事問。「呢種學習精神真係好黐線。」到黃偉強加入時，王維基已經不再外行：「佢由燈光、布景、演員各方面，竟然都可以與部門的人溝通。我喺TVB咁耐，都冇一個上司，可以了解到咁。」

九二八那天，黃國強在金鐘吃了催淚彈。眼淚鼻涕一齊來之際，竟收到公司來電，說攝製隊會出動，記錄歷史性時刻備用，要他指揮云云。接近午夜，老闆急call：「開槍啦，你仲唔走？」「我入到政總門口了。」「仲去政總？行遠啲，拍wide shot咪算。」「好啦好啦。」收線後繼續開工。數日後，他與攝製隊去了旺角，港鐵站上蓋早已針插不入，「我哋冇做開新聞，唔多識走位，有好位都俾人霸咗。」但群眾得悉他們來自港視，都自動讓路：「佢哋話，如果係TVB我就撐番你落去。好好笑！」其實單看股價走勢，已知民心所向。自今年以來，港視命運懸而未決，股價仍升了近百分之十六；TVB繼續一台獨大，卻跌了百分之二十六。黃國強也曾經持有港視股票，「總之就蝕咗啦。」黃偉強也呻笨：「但公司條路太崎嶇了。老闆我哋精神上支持佢。」黃國強更正：「我哋係身體力行支持佢。」

上市編號（911）嘅恒發洋參上週四一開市暴插九成變仙股，有小股東攬住兩條當日股票推介會的紀念品——野生洋參，向小宗哭股喪。

洋參大王楊永仁喺文咸西街發跡，聽講唔少海味鋪老闆中晒招；最抵死係連海味街附近啲銀行職員都推介埋一份；去年底恒發仲發可換股票據，有人拍心口話「點都托住喺七毫子樓上」，否則揸住票據嘅人可以換日本山崎威士忌浸嘅花旗參；當時日本威士忌炒到冇貨，看似矜貴，再吹多嘴話大陸軍方部隊上場打野戰，要含住片洋參增加戰鬥力，所以大有市場；恒發變成仙股後停牌，有人私底下安慰小股東，謂不是被「𡁻咗隻殼」，計小宗話，小股東何不學吓老人家臨終前為見子孫最後一面，將嗰兩條野山洋參切片，含住喺喉嚨補氣吊吓命好過喇！

金融逍遙客：港大學生哥無料無口才

游走於中港台併購、私募投資的金融多棲動物，現為多間上市公司主要股東及董事

強國財團乘人民幣強勢，近年在海外大舉投資，目標一係大都會核心資產，一係知名品牌，如萬達買AMC院線、比華利山靚地，復星併購clubmed及葡萄牙保險公司，單單數十億嘅deal，喺財經市場都是大新聞，買到鬼佬經紀聽到中國人有興趣嘅項目，都加多兩錢肉緊。呢啲經紀角色，十多年前香港人有絕對優勢勝任。作為東西橋樑，香港一有語言優勢，二有人脈經驗，但時移世易，國內民企財團，中高層管理已盡由長春藤海歸專業管理，一口純正美語加上本身已有華爾街的關係，與鬼佬做deal，級數已非維多利亞港內的HKU或CU師兄可比。看着電視上圍剿李國章及眾多校委會成員嘅畫面，逍遙客真係心噏，即使出師如何有名，手法盡是古惑仔影子，小聰明伎倆。連一向照顧學生溫文儒雅嘅校長，都講生命受威脅呢啲重話，可感受到當時呢班學生哥暴力程度。聽到學生代表慷慨激昂的質問，激動咆哮有餘，內容卻空洞無物，一味話我要見你，依家就見，唔見就唔好怪我哋點點點……睇到咁嘅畫面，逍遙客恍似聽到電影中黑幫大佬講數的對白，唔怪得校長都發火。一句對學生表現極度遺憾，冇料又冇口才的學生代表即場已高下立判。呢班學生哥可能好有理想卻空有一腔熱情，但能力完全不逮，毫無章法嘅做法，早喺佔中時間已暴露無遺。學生可視為一個社會及教育制度的產品，而當下出咗咁嘅產品，宏觀嚟睇，要怪真係唔怪得呢班學生，肯定係整個社會嘅問題，亦係我哋教育環境出咗問題。香港競爭力的衰落，若一味怪外部因素，唔識反省檢討自身問題，對改善自己絕對毫無幫助。逍遙客間公司近年招請剛畢業大學生，唔好話知識面或能力，只係工作態度呢個基本要求上，合格嘅已愈來愈買少見少。繼續出啲咁嘅產品，香港幾時先可重振雄風？

中環寸嘴：恒指見24,000點

工廈大王楊耀松長子，出入高級酒店、銀行及知名食肆，與各路人士打交道，透過美酒佳餚，察看人生百態，讓讀者「嗒」落有味。

嗱，喺度同大家講，我話自己「剝」bra係剝得多，不過冇肌膚接觸嘅，冇計啦，家族係「洋雜世家」，底衫褲乜都做，我都係「睇辦睇得多」先成日剝bra咋！不過我唔鍾意做trading，俾人走數血本無歸，𡃁仔時，陳寶珠前夫開嗰間大大百貨執笠走數，見住啲姑丈去港督府請願。有個老友花廿皮買本雜誌，睇咗我十一月尾登出嚟張路紙，話恒指跌到14,000點，佢信邪避過一劫，咁就唔怕兩公婆去「好酒好蔡」食小便飯，呢鋪咪「上咗鋼板任佢斬」，埋單一皮嘢落樓，不過老友唔識知恩圖報請我去食多餐；唔及得樓下逍遙客，翻啅五次「好酒好蔡」咁富貴。都話日本仔好陰濕，殺出個負利率，我啲Yen decumulator先至鬆一鬆咋，咁就去上環西苑整碗乾燒翅啷吓口，吸收吓骨膠原，皮膚冇咁易皺，咁啱撞到個老闆娘顧太，回憶吓以前喺溫哥華開山劈石嘅日子，總言之搵啲好嘢食，好過啪維他命丸！嗱，再「些牙」張路紙，嚟緊我睇24,000點，仲唔挾你空倉，不過都係鬼佬嗰句sell in May & go away！

大鱷中港瀨嘢

花旗國對沖基金佬空群而出，「沽」注一擲，不過講就梗係兇狠，所謂猛虎不及地頭蟲，呢班大鱷喺大陸同香港都瀨過嘢o架！

對沖基金：Hayman Capital創辦人：Bass J Kyle年齡：46歲瀨嘢之作：07-08年持有經濟日報（423）超過5%權益，估計入貨價在$2以上，在$5.2、$3.354及$1.381均有增持，至09-10年間，以每股一元多沽清手頭股份，損手離場。

對沖基金：Pershing Square創辦人：Bill Ackman年齡：49歲瀨嘢之作：2011年以200倍槓桿比率購入認購期權（call option），賭港元升值30%，但最終沒有實現。

對沖基金：Paulson & Co創辦人：John Paulson年齡：60歲瀨嘢之作：投資加拿大上市大陸林業公司Sino-Forest，被Muddy Waters踢爆造假，公司後來清盤，John Paulson旗下基金損手$7億美元。