中環在線：大陸紅底股全線淪陷香港剩番五隻 李華華
2008-10-20 AppleDaily
上 兩個月華華先講過，大陸得番一隻紅底股，就係剩低上海掛牌嘅貴州茅台單天保至尊。估唔到兩個月後，貴州茅台亦喺金融海嘯巨浪下慘遭淹沒，上個禮拜五，股價 跌穿100蚊人仔，收報97.89蚊。亦即係話大陸紅底股抗戰失敗，終於全告淪陷。全球股災爆發前，內地股市全盛期一度有超過10隻紅底股，貴州茅台作為 內地基金愛股，股價屢創新高，不知幾咁風光，去年尾及今年1月初曾經兩度急升至230蚊人仔。可惜花無百日紅，全球大冧市，大陸股市亦受重創，茅台股價先 後失守兩百同百五蚊關口，上個禮拜五最終失守100蚊，年初至今股價累積插水近六成。至於港股方面，雖然仲有一隻手數得晒嘅5隻紅底股，包括重磅藍籌滙控 （005）、恒生（011）、永隆（096）、渣打（2888）同埋宏利（945），不過相信唔使好耐，紅底股就會篩剩3隻。家吓滙控同恒生兩父子股價跌 至百零蚊，只係掹車邊，美國或歐洲是但爆單壞消息，佢哋就隨時紅底不保。
滙控恒生危危乎
滙控同恒生兩父子近排真係黑氣纏身， 老竇滙控上月9號俾大摩追魂索命，發表「戰略研究報告」，預言滙控未來60日跑輸大市，結果滙控股價每況愈下，加埋金融海嘯衝擊，股價個半月下跌15%至 105.2蚊。阿仔恒生又唔生性，投資失誤，可能要為投資華盛頓互惠銀行嘅債券作出大筆撥備，消息引發市場恐慌，股價短短1個月插水50蚊，跌至106 蚊。唔通黑開真係有條路？
香港紅底股
‧宏利（945）股價*：179.1元今年高位：317.6元今年變幅：-43.6%
‧永隆（096）股價*：155.7元今年高位：156.0元今年變幅：+63.0%
‧渣打（2888）股價*：140.0元今年高位：291.0元今年變幅：-51.7%
‧恒生（011）股價*：106.0元今年高位：168.0元今年變幅：-34.1%
‧滙控（005）股價*：105.2元今年高位：137.2元今年變幅：-20.1%
*上周五收市
資料來源：彭博資訊
【回歸廿年】香港英殖郵筒剩番幾個？59個打卡蒲點等你去
1 :
GS(14)@2017-07-01 09:53:44全港年紀最大嘅郵筒之一，位於九龍塘玉蘭路。
相信大家去台灣、日本呢啲地方旅行，見到啲造型特別嘅郵筒，都會同佢打卡影相，但其實大家又知唔知，全香港1500個郵筒入面，都隱藏住好多特色郵筒？記者：倩宜
九龍城南角道嘅呢個郵筒，以前因為有個郵票售賣機係隔離，所以有個花名叫「揹仔郵筒」。
佢曾經為兩名警員擋子彈，不過當年個彈孔，依家已經搵唔返。
中環皇后像廣場外嘅橢圓雙口仔，到底係點解會運咗嚟香港，至今仍然係個謎。
最大年紀
位於九龍塘玉蘭路嘅呢個郵筒，屬於佐治五世嵌牆型，係全香港服役中嘅郵筒入面，其中一個年紀最大嘅郵筒，大約有80年歷史。而佐治五世嘅郵筒，全香港亦係得返7個，當中4個係嵌牆型，另外3個就係柱形。
長春社高級公共事務經理李少文先生，為我地導航，介紹英殖時期留下嘅郵筒。
台灣呢個彎腰郵筒，成為遊客打卡熱點。
日本富士山下嘅特色郵箱，都係遊客必影嘅景點。
最堅硬
位於九龍城南角道嘅呢個揹仔郵筒，全香港只得一個，佢最特別之處，除咗係側邊有呢塊曾經係郵票售賣機嘅板之外，佢仲曾經救過兩名警察。因為80年代有好多搶劫案，當年有賊係持槍打劫金舖，咁啱俾兩個巡邏警員見到，於是雙方展開駁火，兩名警員因為企咗係郵筒後面，郵筒幫佢擋子彈，兩個警員先無受傷。
日本有好多特色郵筒，個個造型都好可愛。
以上信封位置，就係仲係香港服役緊嘅59個英殖時期郵筒。
最離奇
呢個位於中環皇后像廣場嘅橢圓雙口仔，又係全港只得一個。除咗外形特別之外，佢嘅身世亦都好離奇，因為佢身上印住嘅係蘇格蘭皇冠。當年蘇格蘭皇冠郵筒係喺英國同蘇格蘭使用，而當時英殖時期嘅香港，用嘅都係英國皇冠，所以呢個郵筒點解會運咗嚟香港，至今仍然係一個謎。
來源:
http://hk.apple.nextmedia.com/entertainment/art/20170629/20072272