|
||||||
|
地產大亨黃志祥 俾記者問及樓價，黃公子答得幽默：「點解樓價要平過九七？」當然啦，九七金融風暴之後，柴灣之「藍灣半島」為信和集團帶來幾十億元嘅撥備，蝕得好肉痛，係 黃公子自一九七八年左右自星加坡來港搞地產之後，最大之一場敗仗，佢會永遠記住。十三年咯喎，公務員嘅薪酬福利得基本法保障，不得低過九七水平，從黃公子 嘅地產角度嚟講，樓價點解要平過九七呢？ 樓價確有兩大理由高過九七嘅：（一）中國今天之經濟地位，遠遠超過九七，內地有錢人之多，如「福布 斯」所講：「中國進入財富爆炸年代」，只要有十零萬個內地富翁來港買豪宅，價錢怎能不高。人人識話香港樓宇供應少，實際上，大單位供應更少之又少。某次聽 振英哥演講，呢位地產專家話香港嘅一千平方呎以上嘅叫做大單位，佔全港housing stock（住宅總數）約2%，少得可憐。每年有人不幸走向下流，亦有人夠運走向上流，想話細樓換大樓，八百呎換千二呎嘅話，本港嘅所謂「豪宅」已供不應 求，加上內地人買埋一份，「豪宅」的確有必升條件，以後特區政府話多增小型單位供應，鼓勵發展商（特別係市建局、港鐵）興建中小單位，對豪宅價格更有推高 作用，故此瑞銀分析師話政府睇錯市落錯藥。（二）利率目前接近零，三個月HIBOR在0.3%左右，加埋銀行息差，供樓利率等於一厘。九六年三個月 HIBOR 係5.5%，儲蓄利率係3.75%，差好遠啫。假設供樓利率同樣係HIBOR+0.7%，那麼九七年一月嘅樓按係6.2%，現在係1%。同樣借三百萬元， 當年一年付息十八萬六千元，今年一年付息三萬元。又假設家庭收入不變，今年係唔係可以換一間更貴嘅樓？ 利率太低，供應不足，係樓價上升最大嘅原因，其他都係枝節，講多無謂。供應係長期問題，二至五年內解決唔到，利率就要望天打卦，希望聯儲局加息起碼要等到2012，一啲議員批評陳德霖冇計，只識出口術，事實上全港冇人有計，議員只係隨口噏而已。 |
||||||