創業、搞新科技並非年輕人的專利，四十五歲的楊文勇（David）笑說：「成日半夜三更同美國人通電話，幾十歲人先嚟搏命係辛苦，但我好enjoy，捱夜無老到，感覺仲後生咗！」上年開始，開設公司Pal，為美國大熱的智能手錶Pebble設計擁有GPS與充電功能的錶帶，暫時於眾籌網Kickstarter籌得十一萬美金，加上與幾個老友出資近百萬港元，短期內會開始生產，預期十月出貨。上市公司先思行（595）CEO蘇智安認為，這盤生意比David預計更有潛力，「Pebble賣到二百萬隻，你估自己淨係賣到一萬隻咁少？！」我點Sell：公司會值過億 香港人可能只認識iWatch，但四年前一個智能手錶Pebble，於Kickstarter破紀錄籌得一千萬美元，在美國是一個炙手可熱的眾籌項目。而上年Pebble為新項目再度眾籌，今次更成功籌得二千萬美元。David創業前打工的工廠，負責Pebble的錶帶生產，「那時開始接觸Pebble，發現手錶數小時便無電，於是靈機一觸找到幾個同是工程師出身的中學同學，合力做出Pal。」這條錶帶可延長七天使用時間，同時以GPS定位系統，計算用家運動時的跑速、距離等數據，售價六十九美元。David將生意比喻作WhatsApp，「我唔係睇依家賣幾多貨，賺到幾多錢，而是改變整個行業，將錶部分硬件搬到錶帶，增加錶的可能性。這盤生意會好值錢，係上億的生意。」 為返老還童 不過想改變行業，並不如改變自己的心強烈，「我之前做三千幾人工廠嘅營運總監，我唔想上咗位，好安樂咁過多十年就退休。其實我依家退休都得，我算係中產中幾好的一群。不過好似早排佔中的後生仔，佢哋唔係經濟好有錢就得，我都一樣。」每天到科學園工作，接觸的都是年輕人，他指自己雖然已四十多歲，並由傳統生產業跳到創科業，很多事情要學習，但這個年紀亦有優勢，「我工作咁多年，擁有好多人脈，公司logo都是朋友收友情價做的，很多事能便宜、快速處理。」David亦很積極面對自己的局限，「後生仔對新經濟體（網絡）熟悉，學佢哋多用網絡，例如Kickstarter，令我覺得自己年輕咗。加上每日唔係舒舒服服返工放工，要不停解決好多問題，中間好有滿足感，重拾後生打拼的感覺。」 專家盤問：淘寶三個月抄到 蘇：蘇智安D：David 蘇：你與Pebble是合作關係？D：我與Pebble不是合作，但對方會主動提供資訊。例如十月推出新款，他們預早通知我們新版本的規格，我們才可以更早準備。其實對方很歡迎我們，因為我們增加了Pebble的功能。在Kickstarter的短片中，他們的CEO亦拍了一段二十秒的短片支持我們。 蘇：如果Pebble自己出GPS點算呢？D：佢可以話出咗，不過佢要連接電話用，即是運動時想知道步速、跑了多遠，便要帶埋電話，無咁方便。 蘇：佢支持你，但你專做Pebble，市場有多大？D：Pebble賣咗二百幾萬隻，一隻賣二百、三百美金，加起嚟幾億美金o架。我一條錶帶暫時賣七十美金，之後零售價會賣一百美金左右。預計賣到一萬隻度。 蘇：咁多人買Pebble，亦有好多人跑步喎。另外很現實的問題，如何避免被抄襲？你知淘寶嗰度，如果你好賣，三個月就抄咗你出嚟，佢賣你三分一價錢。D：一萬係保守估計啦。講真，我估暫時唔會有人抄，因為要做到咁薄又有GPS其實好難，而且利潤唔係好高。呢一刻主要俾人知道我哋有呢個技術，再申請咗個專利先。 蘇：出貨方面有咩渠道呀？D：（尷尬）我哋五個都是工程師背景，之前無相關門路，現階段除了Kickstarter，其他還未落實，不過方向會以網上為主。 蘇：呢個我可以幫手喎，可以私下再傾。咁下一步，如果呢個賺到錢，你下一步會點？D：下一步會開發可屈曲的軟性電池，將電池藏於錶帶中，縮減空間，令手帶外觀更吸引。同各大品牌運動錶比較，我哋係輕佢兩成，若果成功將會更輕巧。另外我相信我哋做咗，將來其他智能手錶都會開放市場，到時發展空間會大好多。 終極判決：要諗計出貨 單做一個GPS電池錶帶，市場唔夠大，但以佢公司規模係適合，因為太大市場競爭者多，佢未必生存到。剛才我擔心淘寶會抄，我諗深一層，Pebble喺大陸唔興，可能抄襲機會低。現時只做兩隻顏色，管理庫存不難，愈多色愈易有貨賣唔去，這個加分。產品外觀幾好，選紅、黑都值得加分，我賣過headphone，喺美國呢個顏色最好賣，除咗iPhone賣到白色，其他產品白色都唔好賣。我現時會俾六分，要扣分係未有清楚宣傳方向、銷售渠道。短期內最快是俾多少少錢，找一個好的分銷商，因為網上銷售策略，你慢慢摸索起碼要一、兩年時間。長遠要發展，一定要集資，首先因為做硬件好吸錢，marketing都要請人啦，仲有生產、採購各個項目都應該有專人負責，首輪穩陣一球美金啦。盡快做好Pebble錶帶，成為呢方面嘅專家，之後要密切注意其他智能手錶品牌，有冒起之勢的就要接觸，睇吓佢是否如Pebble一樣開放平台，要跟住market leader走。萬一Pebble被取代，影響都可以減低。 撰文：孫樂祈攝影：關永浩攝錄：廖健昌[email protected] | ||