令仔是這樣練成的 2014年06月05日
1 :
GS(14)@2014-06-09 00:11:29http://www.am730.com.hk/article-210379
令仔嘅定義，真係唔同年代、唔同地方都有唔同標準。眼見咁多MK仔，不知哪裡來的自信，成日裸半身(甚至全裸)selfie呃like，真係俾人恥笑冇極限緊都唔知！講真，如果冇辦法由個樣或者個碌入手(即係冇得救)，不如試下學習提升個人魅力，靠內在美搵食吧啦！
文：am77合作社
令仔進化論
令仔呢家嘢雖然好睇個人品味，不過唔同年代都有佢哋嘅審美眼光，好似早前就睇到討論區有巴打唔知椗，話唔明黎明咁老土點解會紅，但事實上黎天王喺上世紀90年代真係爆紅，嗰期最多廣告、最吸金，不如重溫一下咁多年嚟，香港人嘅審美眼光係點改變。
50's-謝賢
四哥喺50年代個樣梗係超班啦！佢嘅playboy形象不知迷倒幾多萬千少女，媾女手段高明，個個再見亦是朋友，瀟灑到老。
60's-呂奇
斯文靚仔喺60年代，除咗呂奇仲有邊個可以係icon？專拍影迷公主陳寶珠，退休之後過咗台灣，03年有傳佢揸的士搵食，但奇哥好快已經澄清「無咁嘅事。」
70's-狄龍 姜大衞
佢哋係邵氏御用小生，一個走反叛路線，一個走乖仔路線，兩個仲合作拍咗《新獨臂刀》、《刺馬》，紅透70年代電影圈。
80's-蔡楓華 陳百強
呢個年代好興乖仔，陳百強文質彬彬又有才華，梗係受落啦！至於蔡楓華都光輝過，佢係當年嘅學生王子，仲係同期最早紅兼買得起波子嘅歌手。
90's-黎明 郭富城
90年代樂壇非常畸形，唔一定要識唱歌，唔怕你走音，唔怕你雞仔聲，總之靚仔就做得歌手，最難得係啲碟真係賣得吖嘛！
千禧-陳冠希 吳彥祖
千禧年代好多人都鍾意ABC，好似佢哋咪係囉，最好廣東話歪歪哋就夠cutie，佢哋一個正氣、一個邪氣，殺個港女片甲不留。
令仔後天進修班
正所謂你的樣子如何，你的日子也必如何。自問天生冇彥祖滑溜高鼻電眼樣，就以為這些機會不是屬於你的？少年，你真的太年輕了！唔賣樣咪賣魅力囉！等我過你幾招，學下點樣後天自我增值吸引異性，咪以為我齋噏當秘笈，全部都有做過研究㗎！
結他媾女大法
根據法國Université de Bretagne-Sud嘅研究發現，拎住支結他同女仔搭訕，問佢拎電話號碼嘅成功率有成31%，比齋係兩梳蕉嘅成功率高一倍！研究人員相信，拎住結他嘅男仔感覺較smart、似足音樂人，好鬼charm！識唔識彈都好，總之拎住就特別有霸氣！
做老竇
下？做人老竇會仲吸引？結咗婚喇喎？你睇下彭X咪知囉！OK！費事你話我抽佢水，咁你睇下碧咸喇，做咗人老竇咁多年，粉絲數目有增冇減，尤其佢抱住囡囡哈7啲相，洗板洗到呢！呢項美國研究仲話，抱住B嘅老竇，會吸引更多女性目光，自我形象仲因此提升添！
大汗疊細汗
唔係你估！《美國神經科學期刊》指出，女性聞咗男性汗水入面嘅化學物質之後，一種重要嘅荷爾蒙值會飆高，令佢哋性慾高漲、心跳加速。Well，不過又唔係人人都咁重口味嘅，汗味咁酸縮，自問真係冇福消受！
留鬚
澳洲研究發現，男性留鬍鬚超過10日係會有致命嘅吸引力！你睇下Hugh Jackman！型到核爆啊！嗱！要留超過10日喎！因為留得嗰幾日，長唔長短唔短嘅鬚根、短鬚仔會有反效果，俾人感覺成個變態佬咁！
輕輕鬆鬆鄧梓峰
英國University of Dundee一項研究發現，男性放鬆時嘅荷爾蒙皮質醇同壓力賀爾蒙會減低，有助減少焦慮，對女性嘅吸引力就自然增加。其實唔使研究都知啦！成日乸口乸面，財神都走啦，更何況女人？
食菜變性感
英國諾丁漢大學馬來西亞分校研究，喺女性心目中，健康嘅膚色比個靚仔樣更性感！仲話食多啲菜同水果，可以令膚色更有光澤同健康。不過，就唔好食得太多含胡蘿蔔素嘅食物，分分鐘適得其反，令膚色變得太黃，甚至變咗橙色，驚嚇過阿凡達！