【馮仁昭四圍超】城城恨做人夫「希望成一家之主」
1 :
GS(14)@2016-07-14 08:09:50■想成家立室嘅郭富城，噚日出席活動時撩細路女玩。
郭富城（Aaron）噚日喺海港城出席藍精靈展覽，8月喺紅館開個唱嘅城城身形弗爆，心情靚爆嘅佢透露，為大會設計咗一間蘑菇屋用作慈善熱賣，設計仲會加入紅館元素，佢之後都會參與拍賣活動。演唱會舉行在即，Aaron話已經閉關排練，又話要應付12場演唱會要有一定體力，所以唔希望太瘦，佢話：「而家腦中全部都係舞步，去到邊都聽住歌。」笑問係咪近日閉關，連女色都唔近，暫時唔會約女友方媛（Moka）見面？佢即刻封嘴話：「唔回應喇，你見我咁勤力就知啦！」
■城城就開騷，唔肯講有冇見女友方媛。
「人生有唔同階段」
雖然Aaron唔肯講女友方媛，但問佢有冇憧憬成家立室？佢坦白話有呢個希望：「人生有唔同階段，都希望可成一家之主，但暫時太多工作，責任好大，而家做舞台一家之主。」另外，Aaron話佢最近忙到連《寒戰II》慶功宴都去唔到，但有send訊息恭喜導演。至於有人批評第一集好睇過第二集，Aaron認為電影好個人，每個人睇完感覺都唔同，但睇票房就知第二集比第一集好。撰文：馮仁昭
來源:
http://hk.apple.nextmedia.com/entertainment/art/20160714/19693511