一缸汽油一張金牛
2008-07-17 AppleDaily
七 月十一日美國時間，油價升穿一百四十七美元一桶，創歷史新高，按美國各大油公司於一八六六年訂下之行業標準，一桶嘅容量相等於四十二加侖，或一百六十公 升。一桶原油值一百四十七美元，即每加侖三元五角（美元）或每公升值0.91875美元，即港元7.16625。原油仲要提煉過先至成為汽油，一桶原油可 以提煉成多少柴油，多少汽油，左丁山唔識，請讀者教路。上星期六，揸車到加德士油站入油，剛好碰到廣播S，廣播S日日周圍去，一星期入一次油，去到邊度就 駛入最近嘅油站，左丁山就係周末司機，平時坐的士，起碼慳番停車場費先。入完油，望一望，哎吔一聲，58.61公升，支出九百九十五點八三元。問廣播S入 咗幾多，佢答話：「一張金牛再加幾蚊散紙！」
慘咯，佢一星期用一張金牛入油，傷過左丁山好多，因為自己平均要個幾兩個月先至幫襯油站一次。一千大元入滿 油，真係一個心理障礙，諗吓都驚。美國最近出現一百美元恐懼症，因為好多汽車入滿油要花費一百美元，對駕駛成癖嘅美國人而言，簡直係惡夢。左丁山架老爺車 已揸足十四年，耗油量大，好多人叫左丁山換新車，但自己從未視汽車係代步工具，不視之為身份地位象徵，唔值得用咁多錢嚟威一威，況且現今油價咁貴，買新車 意欲更加低啲o忝。
車廂內原來有十張八張舊收條，可以睇番以前嘅油價，最舊嗰張係二○○六年十二月九日，當日汽油（加德士黃金無鉛）每公升售七元○八，汽 油稅六元○六；二○○七年十二月十六日，汽油每公升售八元六六，稅照舊汽油價升咗22.3%；七個月後，汽油售十元九一，比○七年十二月十六日升咗 26%，一年零七個月之內升咗54.1%，同期原油價每桶由大約五十五美元升至一百四十七美元，咦，淨係睇數字，汽油價升幅（加德士黃金無鉛）低於原油價 升幅167%好多，為何如此，左丁山亦唔識。廣播S話加加吓就慣咯，佢已麻木咗，美心方包一磅由九元升至十元，升幅11%，A1方包，升到一磅十五元，茶 餐廳早餐加價三至五蚊，問你點辦。香港完全冇計對付通脹，唯一可行方法係大家降低一切需求，慳慳慳。