📖 ZKIZ Archives

無綫剛播完的無厘頭科幻劇《神探高倫布》收視口碑重創，劇情騎呢睇極唔明，連累三屆視帝黎耀祥，以及集集狂嗌「布布」的馬賽，被網民瘋狂圍插，更要求TVB腰斬劇集；低處未算低，重頭劇《金枝慾孽貳》同樣大跌眼鏡，創二十點收視新低。

兩劇連環仆，無綫決定將班底同《高倫布》幾乎倒模一樣的《巾幗梟雄之諜血長天》叮走，飛出台慶劇，怕觀眾未睇先噓。陳豪法拉頂上

以警匪鬥智劇掛帥的《神探高倫布》，由開播到大結局，不斷被網民鬧爆，埋單收視跌到得番二十一點。監製李添勝為救亡親自解畫，指觀眾要坐低慢慢睇先會明白劇情，反而「布布」黎耀祥公開表示知衰，指劇本根本有問題，並表示會從錯誤中學習。

收視反映民意，無綫唔敢是是但但，先將幾乎由《高倫布》原班人馬炮製的《巾幗3》，所有重口味劇情如輪姦、強姦以及雞姦戲一律刪走，更將《巾幗3》飛出台慶劇之外。

「公司一直對添哥好有信心，加上祥仔做鐵膽，大家都寄予厚望，不過《巾幗3》班底同《高倫布》一模一樣，公司怕再出事，決定換馬，將《傳愛事務所》變做台慶劇，話晒陳豪同陳法拉配搭比較新穎，唔會俾人熟口熟面感覺。《巾幗3》今年一定冇得出街，明年先有機會播。」無綫工作人員透露。

邊拍邊驚

據了解，正在拍攝《巾幗3》的黎耀祥邊拍邊驚，雖然編劇葉廣蔭是張華標徒弟，但功力同師傅差一截，早前更頻頻請假，手上只有大概十集劇本，唔想再拆三屆視帝招牌，平日少說話、多做事的黎耀祥，罕有地不斷追問劇情發展。黎耀祥有壓力，一直希望憑《巾幗3》再摘視后的胡杏兒更加失望：「因為有雯女（鄧萃雯）珠玉在前，當初開拍，佘詩曼同周麗淇因為唔想有比較，推咗唔肯接，杏兒應承做已經好有壓力，開工之後仲搞到情緒時高時低，拍得好辛苦。而家套劇俾公司抽起，今年連攞獎機會都冇埋，佢梗係唔開心啦，以往杏兒一定會主動同公司反映意見，今次明知要陪人做炮灰，仲點敢出聲？」知情者說。

是但膠劇

一不離二，繼《神探高倫布》後，《金枝慾孽貳》收視同樣慘不忍睹。打破慣性收視神話，全靠無綫膠劇一套接一套，自拆招牌。

《心路GPS》婆媽倫理劇情原本開正師奶口味，但過於拖泥帶水，連阿媽都頂唔順，埋單有24點，算不幸中之大幸。最離譜係搵司棋姐做爛賭阿媽，毫無說服力，其中一場講司棋姐被賊人打到口腫面腫的誇張化妝特技，簡直是「經典」場口。

《戀愛季節》有視后胡杏兒孭飛又如何！《戀愛季節》四個單元愛情故事，主角馬明、杏兒、吳卓羲個個「hea」住做戲，就算有胡定欣同配角李璧琦拋事業線玩重口味，都未能令「膠劇」收視起死回生。

無綫46週年台慶，收視跌破新低，平均只得29點，為挽救插水形象，無綫兌現承諾，捐出三百萬做善事。捐錢唔敢手軟，但為重新整頓公司士氣、台慶夜獎金獎品加碼鼓勵員工，無綫就施展一招彈弓手。

據了解，當晚抽中價值33萬歐洲房車的二打六黃得生，事後發現原來公司唔包十多萬汽車首次登記稅，他要抬錢倒貼，才可以揸走獎品。此外，無綫見香港電視發牌無望，於是又再向員工開刀，計劃改動計騷方式，由半個鐘一騷改為一個鐘一騷，變相減薪。抽到喊三聲

上週無綫台慶，為對抗熄機行動，破天荒下令四百藝人出席撐場，人人有份抽獎。其中一份價值三十三萬Audi房車，最後由四線藝人、曾經在電視劇《點解阿sir係阿sir》中演壞學生的Ocean仔黃得生抽中。以為天降財神，原來開心得太早。

「Ocean仔（黃得生）初時都好開心，後來先知公司唔會幫佢俾汽車首次登記稅，即係要自己倒貼十幾萬出嚟，先可以揸部車出街，實質架車價係廿萬左右，但就講到值三十三萬，大家都估唔到公司縮骨到咁。至於啲鑽石鏈、手錶嘅獎品價錢，原來都係報大數。」知情者說。

變相減薪

一不離二！據知年前大幅加薪力抗王維基銀彈搶人的無綫，近日見對手發牌無望，於是又度出「辣招」，諗縮數慳錢。「好多同事都收到風，公司打算改計騷方法，以往我哋出鏡半個鐘計一個騷，日後變為一個鐘一個騷。之前肯留低冇走班藝人，雖然有大幅度加薪，但如果改一鐘一騷，就變相減薪。最唔抵係幫公司拍廣告雜誌，例如康業信貸同OSIM，出鏡一兩分鐘，只係計0.1個騷或者0.2個騷錢，但廣告費就公司全部袋晒，秦沛因為咁曾經同公司嘈過，不過都冇用。而家香港電視冇牌，公司更加有恃無恐，睇死我哋走唔郁。」無綫員工透露。

台慶冇騷計

計騷方法無準則，台慶夜奉命撐場的藝人，原來亦非人人有騷計，甚至要貼錢開工。「台慶嗰晚唔係所有藝人都有騷錢袋，公司講明，有份上台或者有表演節目，先有0.2個騷，至於點解會咁計法，冇人知亦唔會有人解釋。嗰晚好多藝人都係收order返公司，坐足成晚冇錢落袋。三四線嗰班仲要出錢買衫搵人化妝整頭，貼錢開工呀。」知情者說。

縮骨事件簿

無綫縮數辣招層出不窮，多得有「大內總管」之稱的李寶安嚴密把關，唔單只揸乾藝人騷錢，就連玩遊戲節目，獎金同樣收唔足。

一折收獎金藝人參與公司遊戲節目，天文數字獎金價碼原來得個樣。佘詩曼試過在《一擲千金》贏到五十萬獎金，但結果只有一折落袋，五萬蚊連請人食飯都唔夠，要自掏腰包使凸。

碌主持卡過往有不少清談節目為慳錢，公司會要求主持搭膊頭搵相熟圈內朋友接受訪問，嘉賓只有一百蚊車馬費落袋，後來更演變到送TV Buddy膠公仔答謝。