|
||||||
|
正當大家忙於送 虎迎兔之際，地產界率先傳嚟喜訊！路邊社消息透露，地產大好友、信和置業（083）老闆黃志祥嫁女，而黃老闆為咗同班員工分享佢嘅喜悅，就每個員工派兩嚿 水利是。無錯，係兩嚿水，取其喜事成雙之意！兩嚿水好意頭嘛，所以信和員工千祈唔好同恒地（012）嗰邊比呀！ 今次都唔係Robert（黃志祥洋名）第一次向員工派利是，聽講前年佢抱孫，都係每個員工派兩嚿水利是。 探子老友話，Robert個女敏華，係上個禮拜出閣嘅，聽聞註冊儀式喺家鄉獅城舉行，稍後會唔會喺香港大宴親朋就唔知，之不過，黃氏家族喺香港有咁多物業，就算要大搞特搞，都一定唔怕無場啦！係呢，新郎哥係邊位呢？側聞係XX綠茶個太子爺，不過，到o依家都無人肯證實。 傳新郎係綠茶太子爺 華華老友又話，雖然o依家通脹，兩嚿水唔係咁見使，之但係大家都係中國人，攞個意頭好重要，所以都無嫌少，不過有高層提議夾錢送禮，呢一吓就好多人有聲音，因為大家都覺得，要送禮嘅咪自己送囉，做咩拉大家落水，要大家收兩嚿水然後嘔凸一桶水喎！ 話時話，四叔前排抱三粒孫，每個員工豪醒一萬蚊，益埋華華有餐豐富消夜食沾吓啲喜氣；信和啲員工雖然只係得個兩嚿水，但係記得唔好走咗華華餐下午茶呀！ 李華華 |
||||||