📖 ZKIZ Archives

【我主場】《點五步》新星　捱出演藝夢

1 : GS(14)@2016-08-19 06:55:55

導演黃修平當年宣傳港產片《狂舞派》時口號「為夢想，你可以去到幾盡？」今年再有另一部港片《點五步》出籠，以棒球為題材講屋邨仔追夢，片中年輕人為電影可以去到好盡，男主角林耀聲為拍戲，試過打散工做咕哩、以江蘇餅度日，理由係「人冇夢想同條鹹魚有乜分別」，非常周星馳但又很貼題，夢想是「我要做影帝」。又有人放棄月入5萬的地產工作，寧要理想不要麵包。撰文：何永寧



由新晉導演陳志發執導，借打棒球講幾名屋邨仔成長故事的《點五步》，除了廖啟智，片中起用大量新人，較為人熟悉的是拍過《烈日當空》等多部電影的林耀聲，另外有拍戲經驗的演員，就只有談善言及同樣拍過《烈》的岑珈其。新人胡子彤是香港棒球代表隊成員、黃焯璘亦是棒球員。


打散工過活

棒球加上屋邨仔追夢，怎教人不血脈沸騰，講到夢想入行十年的林耀聲，接受本報訪問有感而發：「有夢想係非常好嘅事，如果冇夢想同條鹹魚有乜分別，個人都精神啲。每日會叫醒你嘅唔係鬧鐘，而係夢想。」戲入面飾演沙燕隊主投手，夢想是成為影帝，有人認為他大想頭，但夢想就是要想得夠大：「我嘅夢想係成為影帝，雖然係好遠好遠，但我會慢慢向呢一步進發。」去到幾盡？耀聲話幾難捱都捱過：「試過連續兩個禮拜得4蚊買個江蘇餅食，日日行路返工，因為根本冇一份長工可以畀你成日請假，所以keep住搵散工一路拍嘢，難捱都捱過咗。」林耀聲17歲時拍完《烈日當空》愛上演戲，做過跟車、地盤工的他說：「嗰時只可以話keep住『生存』，等自己有飯食先啦，嗰啲唔叫生活。」還有身邊人的冷言冷語，屋企人不支持：「又話你唔得，唔好發明星夢，咁多年都食緊穀種，你幾多歲先肯正正經經搵份工。」但他認為這些經歷都在壯大自己的演藝生命。



■（左起）黃焯璘、林耀聲、胡子彤、談善言及岑珈其各自訴說夢想。

■廖啟智跟林耀聲（左）在戲中合作，分別飾演教練及投手。


曾月入5萬

戲入面演多口仔棒球員的岑珈其，同樣以拍電影為使命，他說：「我可以唔瞓覺、唔食嘢或者唔唞氣都要做，有一句話好啱『如果你對夢想嘅追求好似呼吸一樣，就會成功』。」曾經跟哥哥做過地產經紀的珈其，搵過好多錢，屋企人對成功的定義很簡單，就是「搵到錢」，他說：「2012年啱啱出嚟做嘢，第一個月就爆數，搵成5萬幾蚊個月。不過最後都放棄咗，因為嗰時有個機會可以全職做演員，卒之放棄咗地產，你話『麵包定夢想』，我揀咗嘞。」另外，貌似「亞姐」冠軍楊恭如的談善言夢想有點卑微，只是希望可以忠於自己就夠，不要受外界影響，保持自己價值觀，她說：「或者講嘢叻啲都係我夢想。唔係吹水，真係想做番自己，因為我係一個好易受人影響、經常否定自己同自貶嘅人。所以好想學到唔介意人點睇，同唔想改變自己去附和人哋。」



服裝：Amelie street（談善言）服裝：Teelocker（胡子彤）場地提供：牧羊少年咖啡．慢遞館



【故事大綱】真人真事改編

電影《點五步》改編自80年代本港首支華人少年棒球隊沙燕隊（圖）的故事。講述八十年代的香港，那個美好的時代。阿龍（林耀聲飾）和細威（胡子彤飾）屋邨長大，就讀沙田區一間Band5中學。該校的盧校長（廖啟智飾）成功爭取到區內成立一支棒球隊，取名為「沙燕隊」，藉此教化校內頑劣男生。阿龍、細威及陳強（岑珈其飾）等加入，藉着地獄式訓練，以汗水鍛煉出各人的團隊精神及鬥心。球場內球隊跟日本棒球隊角逐冠軍，球場外的香港正面對前途問題。上映日期：8月25日




來源: http://hk.apple.nextmedia.com/entertainment/art/20160819/19741651

---

《點五步》真人物×廖啟智盧校長解剖沙燕隊戰術

1 : GS(14)@2016-09-01 06:12:07

■在《點五步》中演盧校長的廖啟智日前跟真．盧校長（右）聚首見面。



【熱血點五步】熱血棒球電影《點五步》繼續熱播，改編自真人真事，講述廖啟智飾演的盧校長，帶領一班中學生組成沙燕棒球隊，打贏日本隊的故事。日前戲中校長智叔跟現年76歲的真．盧光輝校長會面，緬懷當中賺人熱淚情節。戲內有校長打了各隊員一巴掌的戲、又有球隊經費當年夠買一層千呎豪宅等情節，很多觀眾想知是否有其事，盧校長說：「當年真係每人打咗一巴，佢哋一路跑一路唱『鬼叫你窮呀，頂硬上！』我好嬲，問佢哋『好窮咩？咁辛苦同你哋爭取到幾十萬番嚟。』」



【《點五步》版】■智叔演活盧校長的嚴師角色，將一班頑劣中學生訓練成才。劇照

【真實版】■當年真實的沙燕隊是由一班小三至小六的學生組成。資料圖片

■智叔指在《點五步》跟新導演陳志發合作有另類化學作用。

同政府要錢

講到當年棒球隊撥款經過，是由時任沙田政務專員曾蔭權批出，盧校長說：「嗰時區議會用剩63萬幾，我同當時政務官鄧國威（前公務員事務局局長）講，要晒。記得嗰時沙田第一城一個千呎單位，都唔使70萬。」他指棒球器材一點都不便宜，最後連發球機都從日本買過來：「唔平㗎，要成10萬8萬，最後我哋交到成績，第二年就打贏日本隊。」


贏波請食扒

談起日本隊，智叔問盧校長是否曾受日本隊白眼，盧校長說：「日本隊起初睇我哋唔起，見到面招呼都唔打。到最後嗰場我哋打贏日本隊攞埋冠軍時，日本隊教練走過嚟同我傾偈，仲好禮貌叫我『盧生』。」決賽當日曾蔭權跟太太特意帶了一箱蘋果來打氣，他指現實中比賽的是小學生棒球隊，他說：「小學生聽教聽話，當時贏咗波慶功，每人叫咗一個T-bone Steak，仲係我自己掏荷包。」盧校長笑言假如有機會演出，他最希望可以扮一次智叔。採訪：何永寧攝影：仇志德髮型：J.So of HERE-1（廖啟智）場地提供：余振強紀念第二中學




來源: http://hk.apple.nextmedia.com/entertainment/art/20160831/19754682

---

《點五步》林耀聲 胡子彤 夢想的味道 2016-08-29

1 : GS(14)@2016-09-04 21:28:25

http://skypost.ulifestyle.com.hk ... %B3%E9%81%93/227622

【晴報專訊】 這兩個月，《點五步》的製作團隊和演員同心合力，出席優先場、接受傳媒訪問；說到底，這電影是一眾年輕人共同努力的成果。兩位主角林耀聲和胡子彤跟他們在電影中演繹的人物一樣，都為着各自相信的夢想、努力、失敗再堅持。
《點五步》借來80年代香港少年棒球隊---沙燕隊的故事，訴說兩位在屋邨一同成長的好朋友謝志龍（林耀聲飾）和范進威（胡子彤飾），在球隊、家庭與朋友之間的成長經歷。
電影關於本地棒球隊，要找到既能演戲又懂棒球的演員很難。阿聲自從《烈日當空》之後，演出過不少作品。「導演說我本身性格跟角色很相似，但是要學好棒球，於是接受了兩個月的地獄式訓練。」子彤本身是棒球員，對演戲卻沒多大經驗。「導演告訴我，其實在第一次試鏡時，其他工作人員也叫他不要選我。幸好，在導演的力撑下，給予我第二次機會，那次就說服了所有人，得到了這個演出機會。」
各有經驗 互有所長
雖然阿聲有過不少演出經驗，但演阿龍這角色，仍然滿有難度。「因為這角色幾乎沒有對白，比較着重表情和情緒上的表達，我花了不少工夫，對着鏡子練習，把自己內心一些真實的經歷挖掘出來，令我可以用真實的情緒去演繹這角色。」相反，還以為子彤在演出前苦練演技，誰知道他說得坦白：「我對演員在拍攝前可以做些甚麼，完全沒有概念，只是去到拍攝現場，盡力做好導演的要求。」
兩位年輕人各有着自己的夢想，夢想給予他們堅持的力量。阿聲笑說：「我拍完《烈日當空》之後，第一次在大銀幕看到自己的大頭，就有一種魔力吸引着我，很想大家在銀幕上繼續見到我，所以就堅持演下去。當中一定會有想放棄的時候，但是，當你想到自己辛苦了這麼久，一下子推翻之前的努力，真的浪費了那幾年。我不想『乜都無』，所以繼續堅持下去。」
曾想放棄 幸再堅持
子彤跟棒球的緣份，原來很微妙。「我出世的時候，哥哥已經打棒球，但其實我小時候很討厭棒球。我最初是打網球的，經歷過受傷，也遇上過樽頸位，就在那時候，媽媽逼我去打棒球。」在棒球的路上，子彤學到更多。「棒球教曉我甚麼是團隊，怎樣待人處事。棒球也給我目標，給我動力行下去。當然，我有失敗過，但失敗之後，怎樣再站起來，才是最重要。」阿聲和子彤的人生都經歷過起起伏伏，在甜苦中繼續相信，沒有放棄，這份年少的熱血，實在珍貴。
服裝：Reebok HK（胡子彤）
撰文：張靛瞳
攝影：Lego
編輯：陳禮恒
設計：梁政敏

---

點五步 吳家樂

1 : GS(14)@2016-09-08 00:07:13

2016-08-31 EW

多得《城寨英雄》中那個陰柔又奸險的「馮春美」角色，令觀眾對吳家樂另眼相看。

角色深入民心，但他卻沒有給予自己攞滿分。「我只會話係及格。打呀、眼神呀，我應該可以攞得準啲！如果畀我 再做，我一定會做得再好啲！一定！」

廿二年來在螢光幕上嬉皮笑臉、鬼馬搞笑的他，本來就是個對自己要求甚高和謙遜的人，亦正因如此，他當初差點錯過了演繹「春美」這個機會。「監製Jazz（文偉鴻）搵我做呢個大反派好大膽，佢同我傾咗四十五分鐘電話，講晒呢個角色嘅特徵畀我聽，我覺得好好玩、好正， 我自己都好想做，但係我冇信心，好驚應付唔到，累咗套劇。 點知Jazz唔理咁多，要我試咗造型先。」

《城》劇監製找他，大概因為喜歡他事前會做足功課吧！如這輯訪問照片，家樂仔早於一星期前已詢問詳情；數個月前，他又會為新劇《賭城群英會》中那個二世祖角色，靠每日跑步用兩星期減十五磅才埋位……

機會總是留給有準備的人，家樂仔其實只差半步，就能由風趣主持，轉型做實力派演員。 而剩下那半步，就是監製、導演和觀眾給他的信心。「總之覺得用得着我，我唔介意做任何角色，只要信我，我會一定會好努力咁去做好佢！」

這就是 他的誠意 。

解構春美

無可否認，吳家樂在《城寨英雄》中的「馮春美」，無論造型和演繹方式，於電視劇層面上都是破格的。「拍《城寨英雄》最正嗰樣嘢，係監製Jazz同編審，一早會設定好晒所有角色嘅特徵，令到成件事好實淨、好清晰！好似『馮春美』咁，Jazz想呢個角色造型好漫畫，我哋就用咗一日時間去試唔同look，試過戴短嘅假髮、中短長度嘅假髮，又試過中間分界同成個頭白晒；試過成面化到白晒，又試過加眼線同胭脂。最後係Jazz提議將堂眉都化到白色，結果最有神髓！

「因為『春美』動靜比較女性化，好工整又好斯文，所以Jazz又要求呢個角色講嘢嘅tone好慢好陰柔：『我同編審傾過，因為呢個角色講嘢慢，所以你對白好少。』跟住就叫我參考吓電影嘅『姥姥』演繹；睇黃飛鴻，學佢啲淡定feel；睇哥哥（張國榮），留意佢嘅瀟灑同優雅。」

就是「春美」最擅長的擒拿手，也不是亂來的。「我拍之前，學咗幾堂，然後一路拍一路練，因為九成以上都係演員自己親身打，郭師傅（武術指導郭追）會睇大家嘅能力去設計動作，真係有幾吓唔得嘅，就用鏡頭嚟就。我哋啲絕招分得好清楚，所以我成套劇除咗踢門嗰吓用腳之外，我每次對打都只係出爪。」

拍劇主持

縱使家樂仔實在很喜歡「馮春美」這個角色，但若說到這是他的代表作，他還是多次強調「只係及格」。「我反而最開心係，觀眾會鍾意我去演呢個角色！因為呢個奸角，可以令人好反感，亦可以令觀眾好憎我！」

事實上，他出道廿三年來，其搞笑鬼馬的主持風格，贏得很不錯的觀眾緣。「好多人都奇怪，明明吳家樂係個主持，做乜事會突然間走去拍劇，其實，我最初出道，係拍劇先。」

話說當年，他本來是在無綫的音響部工作，「嗰陣藝員部啱啱有management，佢哋搵我傾，我知道做幕前好辛苦，第一次搵我，我唔制；跟住到我想離開audio轉第二份工時，啲人就叫我再見吓management，驚我唔試會後悔，咁我就畀自己三年時間。」

他加入了九四年的藝訓班，跟陳展鵬、張松枝、劉愷威和陳彥行做同學，處男劇是黎明和古天樂做主角的《阿Sir早晨》。「跟住我本來一路都係拍劇，有次撞斷隻手，公司就安排我主持煙花匯演，因為唔使郁。然後見我做主持都OK喎，就畀我主持《週末任你點》同《K-100》；見我喺《K-100》扮嘢都幾好笑喎，就搵我入咗《歡樂今宵》，再跟住又做《獎門人》……可能因為咁，啲人成日都覺得我係做主持。」

肥姐的話

其中參與《歡樂今宵》，最令他獲益良多。「啲前輩會教我哋呢啲新人好多嘢，例如要準時，埋位前要清楚個rundown，之前要做定功課。

「我嗰陣有時做嘢都會做得唔開心，我啲唔開心，並唔係覺得自己嘅發展唔及人哋好，因為我係個有乜嘢機會，都盡力做好佢先，唔鍾意同人比較嘅人；好多時，我係唔開心在有啲人嘅工作態度同我唔同，例如我成日都準時返工，但見到有啲人硬係要遲到，影響晒所有工作進度，我就會好忟憎。

「有次我搵肥姐（沈殿霞）傾偈，佢同我講：『呢一行係鬥長命，只要一日你唔舉手起身投降，一日大家都會知道你仲喺呢行，只要你多做事、少說話，堅守自己嘅原則，總會有一日有人留意到你！』佢呢番說話，我到今日都好記得，因為真係點醒咗我！喂，如果有日我堅持唔到準時嘅原則，玩遲到，啲人就會記住我呢次嘅遲到，唔會記得我一直以嚟嘅準時。」

家樂仔坦言，這些年他因為堅守着那時候前輩所教落的，導致有些跟他合作的人，會覺得他很麻煩。「尤其是拍我做MC同live騷嘅人，有啲會認為我某方面唔需要咁執着，但係我廿幾年前啲老師（前輩）就係咁教我，只係我一直堅持到 家咋嘛！」

唔俠交代

又因為肥姐那句「多做事、少說話」，他多年來很少接受專訪。「我真係冇乜嘢好講，而且我都冇乜特別嘢出街，點做專訪啫？呢啲我唔係好介意喎。」

就是社交網呢，他也不太活躍，零提及太太周蕙蕙、九歲的女兒Nadia和八歲的孖仔Nigel及Nathan。「唔活躍，因為我係個電腦白癡！啲人成日叫我轉發乜乜物物，我都唔識！至於我屋企啲嘢，我只需要對我自己、我老婆仔女交代咋嘛，唔需要同其他人交代㗎！」

反而周刊雜誌，卻常常拍到他和太太帶着孩子返學放學四處去。「湊小朋友，我哋都唔鍾意搵姐姐幫手，因為我哋想多啲親子時間，想同佢哋接觸多啲，係好辛苦，但好開心！我哋會帶啲小朋友搭巴士、港鐵同小巴，我哋好想啲小朋友同社會、日常生活融合，大家見到我哋咪見到囉。」

算是個虎爸嗎？「我唔知算唔算，我冇諗過小朋友將來要點點點，又冇逼佢哋十八般武藝，佢哋鍾意打乒乓波、踢波、游水，我先畀佢哋學；功課都係我同太太自己睇番；星期六、日會陪佢哋去學嘢……我哋做緊嘅嘢，好多香港家長都做緊。

「不過我成日都同啲小朋友講， 家畀佢哋嘅嘢，已經係我哋能力範圍內最好嘅，唔好同人比較，同埋做好咗當下要做嘅嘢先。」

這方面，家樂仔自己正正就是孩子的好榜樣了。

對唔住

家樂仔除了處事態度值得他的孩子學習之外，其待人接物，相信他也是身教的。

整個訪問，他說得最多的，是「對唔住」。例如訪問會合前半小時，他會WhatsApp留言：「對唔住，我應該會遲十五分鐘。」拍照取景的位置，需要我和攝影師步行十分鐘，他會對我們說：「對唔住呀，我今日揸電單車影相，載唔到你哋，要你哋行咁遠路。」拍照時需要在路邊開工的裝修師傅把停泊的車輛駛開，他又會連聲講「對唔住」加個四十五度鞠躬……

「可能我同我太太屋企本身好傳統，所以我哋教小朋友，都好着重禮義廉恥，呢個係我同太太教小朋友嘅共同價值觀，一個人冇禮貌，讀書點叻都冇用！」

忽然，我很希望他的小朋友，可以讀到這篇訪問。

家樂仔說，在眾多《歡樂今宵》的前輩中，肥姐（紅圈）是他最常聊天的一個，每逢工作有不如意，她都是最好的聆聽者。

參演《歡樂今宵》，對他來說是木人巷，既有很多前輩教路，又經常扮鬼扮馬，裨益良多。

九四年在處男劇集《阿Sir早晨》中，廿二歲的他飾演學生鄭家碩，一臉青澀。

家樂仔說，《城寨英雄》中的「馮春美」，令他最大的得益，是讓觀眾認識到自己工作的認真態度。

為珍惜親子時間，他閒時便會跟太太周蕙蕙親自湊孩子。「星期六、日，我都盡可能陪佢哋去學嘢同去玩。」

在圈中人緣甚廣的他，於○六年與太太周蕙蕙結婚時，連劉德華亦有出席婚宴，更親自向新人送上賀禮。

跟女兒Nadia關係親密，家樂仔不諱言她是前世的情人。「過多幾年，佢十幾歲，就有自己朋友約， 家唔多啲一齊，點得？」

家樂仔以「春美」tone多謝大家支持，請即掃描QR Code上東周網睇睇啦！

撰文 周彩霞 攝影 梁比利 設計 吳俊彪

---

【馮仁昭四圍超】潘燦良扮演成立沙燕隊《點五步》刪曾蔭權戲份

1 : GS(14)@2016-09-09 05:09:15

前任特首曾蔭權噚日有一段訪問出街，講番任內施政同近日嘅熱門話題，出年就選新一任特首，呢段訪問配合恰到好處。而正在上映嘅港片《點五步》，入面都有提到曾蔭權出任沙田政務專員時，支持過成立首支全華人棒球隊沙燕隊，角色由潘燦良飾演。



■《點五步》被刪剪嘅造勢晚會同演講內容，當年係真有其事。

曾蔭權


累積票房311萬

因為《點五步》片長刪咗兩場戲，一場係講潘燦良喺出賽前送咗箱蘋果畀球隊打氣，仲俾人笑啲蘋果硬。另一場亦真有其事，07年喺特首競選造勢晚會，潘燦良講起3件難忘事，佢話：「97年金融風暴，同03年沙士一役，好難忘亦都好痛……如果真係要講到最難忘最高興係83年，當時我同盧光輝校長搞咗隊沙燕棒球隊。呢一班由壞細路組成嘅雜牌軍，第一年連續輸8場，之後連贏10場成為下循環冠軍。覺得高興並唔係拎到冠軍，係睇住佢哋人生由改變到成長。」潘燦良話香港過去好多光榮，都係由一件一件嘅小事堆積起嚟：「如果有得畀我揀，可以返到過去，我希望可以去到嗰一年，因為嗰陣時係我從政生涯最開心、最無牽無掛嘅時光。」聽落有啲似周星馳喺《西遊記》入面嘅經典對白「一萬年」喎。另外，《點》片截至噚日累積票房已經去到311萬元，成績相當唔錯。撰文：馮仁昭




來源: http://hk.apple.nextmedia.com/entertainment/art/20160908/19763606

---

【點五步背後】沙燕少棒隊「隊媽」　為愛女學計分

1 : GS(14)@2016-09-10 13:55:31

在職媽媽林惠儀年多前為愛女興趣投入棒球運動，從零開始學習規例，現在更擔當隊媽及計分員角色。



正在上映的《點五步》，令大家知道香港棒球曾經有段威水史。不過電影冇話你知嘅係，陪伴這班熱血球員成長的背後，還有一班家長應援團。從練習前預備遮蔭的帳篷、買水和小食、準備冰袋，到帶裝備去比賽都由這個「團隊」包辦，全程跟住。



「琛媽」林惠儀年多前因女兒鄺彥琛的興趣，加入沙田棒球會沙燕隊，開始她做「跟得媽咪」的生活，現在還擔任球隊隊媽和主要計分員。「我本身是完全不會的，看了幾次比賽後才知道上一壘時只需要衝上去，只是鬥快而不用鏟壘。」她笑着分享。為了投入女兒的興趣，過去的十多場友誼賽變成她的練習場，跟着其他家長計分員在球場上一邊計一邊學，還計劃參加棒總的計分班，變得更專業。不過對星期一至五都要工作的她說，一點也容易，「當時很抗拒，因為實在太辛苦，工作後很累，難得周末可以休息，還要來兩天，在戶外的時間亦較長。」到後來開始慢慢明白棒球的玩法，跟其他家長也熟稔起來，現在更視為隊媽的工作是一種享受。訪問翌日是立法會選舉，球隊因而取消了當日的練習，琛媽說沒有練習反而不習慣。棒球教練為了要訓練球員獨立，他們不可每件事要爸媽代勞，而10歲的阿琛非常獨立，跟隊友一起搬練習用的工具、主動去熱身，沒有港孩要父母斟茶遞水的場面出現。雖然球場上，琛媽和阿琛各有各忙，但棒球成為兩母女生活的話題，琛媽說：「她差不多一開口就是棒球，她很喜歡說練習時發生的事，我肯定她說棒球多過學校的事。」剛過去的暑假去日本旅行，二人更參加了跟棒球有關的活動，例如參觀甲子園紀念館、去大阪的大型室內遊樂場round1玩投球和擊球，更看職業棒球比賽。日常的生活中，兩母女會一起做跟棒球有關的事，少不了看棒球漫畫、上YouTube看棒球比賽，還有棒球紀錄片。琛媽表示：「我由完全不懂棒球，到現在參與多了，而且樂在其中，感受頗深。看着《家長應援團》中的家長怎樣參與，我認為他們是我的榜樣，同時又很期待他日可以衝出香港，一起去外地比賽。」該片將會在今屆的華語紀錄片節參展，由兩位女性五年前開拍，包括本身是業餘棒球員的葛思恆（Ada）和台灣紀錄片導演黃郁芳。團隊跟隨沙燕隊一個球季，以紀錄形式說兩個運動員家庭故事。拍攝歷時一年，其間沙田沙燕隊更到台灣參加12U比賽，Ada說：「當地的傳媒形容這班家長是移動的吉祥物，球員去哪裏比賽都會見到他們。」她回想當初也是一班棒球隊家長令她想追溯故事，「我們在球圈打成人棒球的業餘聯賽，大部份的評判都是家長，部份家長的子女已長大或沒有再玩棒球，但仍然參與其中。打氣以外，家長更會進一步擔當裁判和紀錄員，在我的認知裏，真的只有少棒運動的家長才會這樣做。」反觀上一代的家長很少參與，令她好奇家長對棒球的看法。《家長應援團》上映場次時間：9月10日（周六）2:00pm；9月16日（星期五）7:30 pm地點：香港太空館演講廳票價：$70記者：列淑華攝影：鄧鴻欣（部份圖片由受訪者提供）


女兒鄺彥琛因卡通漫畫對棒球有濃厚興趣，決心加入棒球隊

鄺彥琛現為沙燕隊球員，每星期和媽媽跟球隊到棒球場練習。

棒球成為母女二人生活的一部份，剛過去的暑假旅行就到日本甲子園野球場觀看阪神虎對中日龍的職業棒球賽。


阿琛去日本旅行也不忘擊球練習。



來源: http://hk.apple.nextmedia.com/su ... t/20160910/19766000

---

《點五步》票房破400萬

1 : GS(14)@2016-09-17 17:33:05

由新晉導演陳志發（Steve）執導的本土電影《點五步》，上映前導演被轟「有汗出，冇糧出」，幸獲台前幕後工作人員力撐，而電影截至前日終衝破400萬元票房，Steve在電話說：「拍嘅時候根本冇諗過會有發行商發行，更加冇諗過可以上到畫，今次真係超出預期。」電影除了內容熱血勵志，另一賣點是片頭片尾都有雨傘運動的片段，還有十日（26日）就是雨傘運動兩周年，Steve說：「記得兩年前今日，我哋套片差唔多拍完，亦係雨傘運動尾聲，亦都係我加咗兩場雨傘片段入去原因，相信套片可以上到兩周年嗰個星期，雖然未必有好多戲院上。」採訪：何永寧




來源: http://hk.apple.nextmedia.com/entertainment/art/20160916/19771928

---

《點五步》新星私有化失戀女飛魚胡子彤歐鎧淳拍拖

1 : GS(14)@2016-11-18 17:56:34

■香港泳隊代表「女飛魚」歐鎧淳，憑甜美外貌被網民封為女神。互聯網圖片



現年24歲的「女飛魚」歐鎧淳是香港泳隊代表，今年里約奧運代表香港擔任持旗手帶隊入場，甜美的外貌被網民封為女神及BB，連帶她與退役水球手男友陳浩軒（Jonathan）的戀情被曝光，惟二人於三個月前分手，而且她迅速被私有化，新男友是憑電影《點五步》入圍今屆台灣金馬獎最佳新演員獎的胡子彤，更登對的是胡子彤是本港棒球代表隊，亦是運動能手一名。



■胡子彤與歐鎧淳上月以運動員身份出席活動。互聯網圖片

■胡子彤憑電影《點五步》角逐今年台灣金馬獎最佳新演員。劇照

■歐鎧淳於三個月前跟前度Jonathan分手。資料圖片

■歐鎧淳於今年里約奧運任持旗手帶領香港代表入場。

女友唔去金馬獎

胡子彤昨日剛跟家人從沖繩返港，他透過WhatsApp回應戀情時說：「多謝你哋關心，我同家人喺沖繩去完旅行返嚟，跟住就飛多倫多電影節，多謝你哋！」問到跟歐鎧淳的戀情，胡子彤大方承認說：「而家我同佢（歐鎧淳）都叫做剛開始，希望大家畀多啲空間我哋，現階段工作剛開始起步，都係想專注喺工作上更加多，希望大家畀多啲空間我哋兩個，繼續為自己嘅目標努力，Thank you！」至於下星期的金馬獎，子彤表示女友不會去，但他會與媽媽一起行紅地毯。


導演：要恭喜佢

另外，發掘胡子彤拍攝《點》片的導演陳志發昨日接受電話訪問時，對於子彤跟歐鎧淳拍拖一事亦嚇一跳，他說：「知道佢哋本身friend嚟，拍拖真係唔知，係咪真㗎？」導演透露早前為《點》片宣傳的時候，子彤曾帶歐鎧淳出席，他說：「試過做完謝票成班人一齊去食飯聯誼，歐鎧淳都有嚟參加過一次半次，嗰時都唔覺佢哋拍拖，話係朋友，咁真係要恭喜佢。」導演指子彤都單身了好一段日子，想不到他那麼幸運可以追到女飛魚，下星期他會與胡子彤一齊出席台灣金馬獎。採訪：何永寧




來源: http://hk.apple.nextmedia.com/entertainment/art/20161118/19837173

---

《點五步》8項提名搶金像胡子彤、談善言內訌　爭最佳新演員

1 : GS(14)@2017-04-06 07:41:38

■（左起）胡子彤、談善言同陳志發因合作《點五步》而變得老友鬼鬼。



電影《點五步》喺嚟緊星期日舉行嘅香港電影金像獎共獲8項提名（見附表），談善言同胡子彤雙雙入圍最佳新演員，導演陳志發就獲提名新晉導演獎。談善言話自己所有嘢都係由呢部電影開始，好多導演、副導演都因為睇咗呢套而搵佢試鏡。



■胡子彤會同談善言拗手瓜，爭奪最佳新演員。

■本土熱血電影《點五步》有份角逐最佳電影等殊榮。


對本土另有體會

胡子彤就話同戲中演員建立咗深厚感情：「初頭謝票抱住去玩嘅心情，到經常見面大家好多嘢都會傾，感情突飛猛進，希望可以維持落去。」佢仲回想當日喺導演會春茗，先拔頭籌攞咗新人獎，陳志發引述導演莊文強話好鍾意佢角色，不過擔心冇人認得佢。提到莊文強話佢外表唔係好吸引，攞到獎係佢實力，胡子彤即時喊爆。至於陳志發，對於「本土」兩字有另一番體會，佢話：「近年好多電影強調係本土，會唔會係有病？點解拍番自己嘅嘢，就要一個標籤，話『嘩，好難得呀！』或者我哋真係要反思一下。」陳志發又話希望就算冇本土呢兩個字，香港電影應該繼續百花齊放，最想睇到入場支持嘅觀眾，同荷李活片人數差唔多。」談善言就希望本土電影係因為一種情懷去記得，咁樣對佢嚟講就係本土電影。場地提供：山旯旮


《點五步》有乜提名

最佳電影最佳男配角：廖啟智最佳新演員：胡子彤、談善言新晉導演：陳志發最佳攝影：柯星沛最佳原創電影音樂：戴偉最佳原創電影歌曲：Supper Moment《沙燕之歌》




來源: http://hk.apple.nextmedia.com/entertainment/art/20170406/19980968

---