好不主席：黑牌
1 :
GS(14)@2012-08-03 13:32:56http://hk.apple.nextmedia.com/financeestate/art/20120803/16572528
「就算你輸了，心裏也沒有任何藉口和恐懼，可以活得心安理得。」如果你是洛奇的影迷，或會有印象這是第三集，強敵當前主角所說的一句對白，而最後他都能贏取勝利，當然前提係要「全力以赴」。本來是勵志不過的訊息，然放在今天的倫奧賽事，差啲可另作一番解讀，如果唔係有關賽會出嚟喊停嘅話。
斷正無謂撐 道歉修正果
其實咪就係我國排名世界第一的羽毛球女雙組合，連同南韓及印尼另外三對選手因在小組賽「走線（避免與隊友過早對壘）」的考慮，因此打出了令所有觀賽人士初則目瞪口呆，繼而噓聲四起的業餘表現。球證亦不得不出示難得一見嘅「黑牌」，加上倫奧至今，首次的集體開汽水，中國選手果然爭先。最終仲要驚動到國際羽毛球聯會（羽聯）出手，取消上述八位選手繼續參賽的資格，而嚟緊佢哋亦會面臨更加嚴厲嘅處分。
事發之後，有很多人會辯稱這是因為羽聯制訂的賽制首先出現漏洞，才會導致這次的「打假波」或內地所謂的「默契球」、「爭輸球」。其中邏輯就係既在現有規定下作賽，只要是不違反規則，亦是情有可原，但係就好似冇乜人記得「未盡全力比賽」都係嚴重違規。
不過連羽聯本身的要員都表示，如果賽制能夠仿效其他重要的國際級羽毛球賽事，小組賽後重新再抽籤，當可避免同類事情再發生，竟會如此說項都算怪事。不過亦都真係有外國傳媒罕見的發表支持言論，有網友就引述英國《衛報》：「中、韓選手受到的指摘是不公平的，他們只是想盡量贏得最多的獎牌……這種做法與單車手留力、在適當時間才衝刺沒有分別。」哦……。
講真，我都唔係好知 X杯 Y盃嘅羽毛球賽事係點樣安排，但係足球賽事就擺到明「走線」，但同時聽天由「籤」嘅情況亦相當普遍。不過大家都會做得好好睇睇，話晒「交戲」都係職業球員嘅必修課。要「揸流攤」、「插水」起碼都唔好做到水花四濺，搞到周地都係。而且衰咗兼斷正就無謂再撐。所以賽制未盡善，甚至有失誤都唔係開脫嘅砌詞，如果仲要將自己包裝成制度下的苦主或受害人，莫講話專業體育員嘅精神，連最基本身為一個參賽者應有嘅尊嚴都說不上。反而早早道歉，表達自己悔過之心，方可止蝕，其實呢啲可能都係「交戲」，而且係要群戲，上面嘅教練、領導肯定都要交人謝罪。不過一日強國逞強之心不去，這些事睇怕還會陸續有來。
盧先亞