| ||||||
| 股 神畢菲特旗下巴郡月初舉行股東會，今年有特別安排，喺股東會前准全球6家傳媒同佢做專訪，唔知係咪特別睇好中國前景，本來每家傳媒得5分鐘，但代表中國嘅 央視就有15分鐘。央視啱啱過咗嘅周六同周日分兩日播出呢個訪問。講到股神睇好中國，唔能夠唔提佢違反過往投資原則，唔認識電動車都投資比亞迪 （1211）呢家中國企業。股神解釋，係睇準「將來新能源會變得更重要」，而且佢唔識啫，拍檔Charlie Munger識嘛！ 坐電動車揚言載女 喺股東會當日，股神仲親身坐上比亞迪專程由大陸運去美國嘅最新能源車，股神喺鏡頭下試揸，雖然未有如台灣富商郭台銘所講──揸住電動車返工放工，但喺車上嘅股神心情勁靚，仲話轉頭會載成車囡囡返嚟。 今 次同股神做訪問嘅央視記者付豫，喺07年已訪問過佢，幽默嘅股神上次大整蠱，訪問時喺付豫耳邊細細聲扮畀股票貼士，實情係同佢講，家陣個個都會以為我醒 你，唔會再追住我問，反而會追住你。記者不甘被玩，今年再見股神就話：「你叫我買嘅股票輸晒啦！」點知股神即刻攞個銀包出嚟話要補償。 記者話股神貼士唔準 雖 然股神接受電視訪問唔係第一次，但每次大家都想問，究竟點樣投資先可以賺錢？股神除咗一如以往強調價值投資，叫大家千祈唔好成日諗住買咗隻股票，聽日或者 下個禮拜就賺大錢，今次仲語重心長話：「You try to give it away and it comes back to you, if you hold on to it tight, you don't have any.」意思係有啲嘢你肯放手，可能佢再返嚟你身邊，但如果你揸得太緊，反而會一無所有。李華華[email protected] | ||||||