| ||||||
富二代慶祝生日，最鍾意包夜場喪玩通頂，但對於有仔有女的大富之家，就鍾意趁假期時去外地慶生。九巴後人雷兆光的太太雷林靜怡上月尾生日，成家飛咗去美國加州哈仙達岡（Hacienda Heights）嘅度假屋住番一個月，仲去埋迪士尼樂園慶祝，享受天倫之樂！提早慶祝 雷林靜怡（Jane）未做母親時，經常孖住Ball后薛芷倫去蒲，生咗一仔兩女後修心養性，就算去ball都係同老公雷兆光（James）孖住上，其餘時間多數用嚟陪仔女。今次老婆生日，James特地策劃家庭樂慶祝活動，帶埋兩個分別六歲、八歲的女兒Jacqueline和Jamie飛去美國加州度假，James仲提早兩日二人世界，同老婆去比華利山極受歡迎的扒房Mastro's Steakhouse慶祝，sweet到爆。 自製蛋糕 但更甜到漏的，是兩個囡囡分別親手整水果「蛋糕」送俾媽咪，James都冧晒咁話：「係呀，兩個囡囡都好努力impress媽咪，令媽咪好開心！」James生日重頭戲係全家出動去加州迪士尼樂園玩到癲，以前無名牌珠寶加手袋都落唔到樓嘅Jane，依家為咗陪兩個女，吊帶衫、熱褲仔加對拖鞋就出動，迴旋木馬、繩網陣等玩得開心，又唔使同強國人逼餐死，難怪一家人玩到唔願走。但話晒雷兆光喺九巴仲孭住商務總監職銜，玩足一個月都係時候返工，唯有一支公先返香港，佢有啲冇癮話：「老婆囡囡仲留喺美國，得我自己返嚟先，因為要開工。」 二代包場喪玩 今個月初是前仁濟醫院主席嚴玉麟個女Carmen牛一，佢嘅名人二代friend：四太女何超盈、邢李㷧女兒邢嘉倩、旅發局主席林建岳細女林心兒等三十人，齊齊包起位於北角一間工業大廈內、最低消費兩萬五千元的法國私房菜Ta Pantry搞Gangster（古惑仔）派對，最誇張係生日蛋糕都有十幾個，食得晒至奇。 | ||||||