湯文亮﹕老闆會不會是傻仔？
1 :
GS(14)@2017-01-19 08:00:35【明報專訊】有物業代理叫我買樓，我話他的老闆講樓價會下跌三成，叫我買樓即是話我係傻仔，物業代理話老闆才是傻仔，他的馬仔負責制定樓價指數，亦表示樓價會繼續上升，馬仔有數據支持，老闆隨口噏，問我會信哪一位？兩個我都唔信，我信自己。
物業代理借老闆過橋
隔了一段時間，同一物業代理叫我賣樓，我話佢老闆馬仔表示樓價仍然有上升空間，而且在不論任何情况，例如利息上升、供應增加、經濟轉壞，都唔會影響樓價，物業代理話，嗰位人兄的分析以偏概全，加上有所偏見，是不能作準；老闆經驗豐富，成績就是最好證據，老闆睇樓價會跌三成，所以，現在是賣樓好時機！
我問物業代理他的老闆有沒有賣樓，佢話他的老闆持貨力強，即使知道樓價下跌，都寧願讓顧客先行，如果他的老闆有這種觀念，的確是傻仔。不過，我知道是物業代理亂作，借老闆來過穚，但我有一個疑惑，世界上究竟有沒有老闆任由伙計同自己作對，如果有，他不是大方，就是傻仔。
有人同我講老施發炮轟中原指數發布人同佢作對，我A眼，B眼，甚至用C眼睇「C觀點」，我唔覺得老施發炮，他反而好似讚發布人，話佢有承擔，夠膽發表個人意見，更加用量子力學解釋莎士比亞的說話，老實說，我語文水平不高，唔明白文章的意思，不過，就肯定沒有發炮。
一家公司兩種聲音 聽眾不同
那人認為同一間公司，不應該有兩種對立聲音，我反而覺得可以，因為聽眾不同，馬仔是話畀一般人聽，樓市還會繼續上升，現在買樓雖遲未晚；而老闆是話畀地產商聽，樓市會下跌三成，地產商應該減價賣樓，老闆是為準買家鋤價，所以，兩種聲音是可以並存，不過，大家千祈唔好接收錯誤信息。
紀惠集團行政總裁
[湯文亮 敢說亮話]
來源:
http://www.mpfinance.com/fin/dai ... 9517&issue=20170119