📖 ZKIZ Archives


雲格是最佳打工仔 人在中環

http://manincentral.blogspot.hk/2013/02/blog-post_22.html
被拜仁技術性擊倒的那個晚上,我慶幸自己當晚被睡魔戰勝,沒有半夜三點爬起身去睇呢場比賽,不然的話,我心情大概會更壞。

呢幾年,阿仙奴真係好討厭。佢令我「勞氣」既頻密程度,分分鐘比我屋企個百厭仔仲高。

八年無冠差唔多已成事實,做左十七年既領隊雲格受盡壓力。無數球迷高呼「雲格下台」,由「In Arsene we trust」變成「In Arsene we rust」,甚麼叫做悲情人物?從高處滑落至如斯田地,雲格應該算係人版。

某程度上,我係同情雲格既。如果真係要為阿仙奴近年既墮落找元兇既話,我傾向會選擇球會既大股東同董事局,多於走在台前既雲格。

響最近既連番敗仗之後,又有新聞吹出黎,話董事局批左七千萬鎊俾雲格明年用黎增兵買人。我記得今季開季既時候,同樣又有新聞吹出黎,話董事局又批左幾多千萬鎊比領隊隨意使用。呢類新聞,幾乎年年如是。但結果係點呢?雲格又係用左唔知有冇一半budget,買幾件「平貨」番黎算數。球迷已經習以為常,對此,大部份人既解釋係,雲格一向孤寒慳家,而且異常固執。坦白講,我一直都唔相信。我嘗試從常理去推斷:一個打工仔,收到老細既budget去做一個project,舉例一百萬。你唔out budget固然係叻仔,但有一百萬budget,你斷唔會慳家到只用五十萬就算;而且唔係一次半次如是,係一年復一年,都係如此。響商業社會裡面,明明有budget但唔去用,係匪夷所思既事。咪以為慳到錢一定係好,大部份老細批得個budget出黎,就預左你會用得七七八八。下下都用剩一半,老細其實係會爆你的。但係一年復一年,雲格年年用剩一大半既買人budget,不但董事局冇投訴,而且仲無限量back佢,我唯一可以諗既,就係董事局批俾雲格既「真正」budget,根本就冇咁多。多年來果啲對外供佈既買人budget,由頭到尾都係一個PR Campaign,目的只係繼續俾球迷有一個夢。

我相信雲格其實係一個非常稱職既打工仔。佢明白老細既要求,但球迷既需要,跟大股東所需要既截然不同。雲格唔係蠢材,隊波唔夠班、板櫈深度嚴重不足,賣主力會嚴重削弱球會競賽能力…呢啲連一個普通球迷如我都能夠睇得出既事,打死我都唔信經驗豐富既雲格自己睇唔到。然而老細唔批錢之餘仲要你年年有錢賺,自己對住記者傳媒又唔可以埋怨老細,於是唯有講一大堆廢話出黎應酬大家。甚麼「出面搵唔到好球員,可以好過依家個班底…」又或者「阿邊個邊個復出等於一個new signing」,通通都係攞黎講既籍口。籍口講得太多,大家都唔再相信。然而球迷會埋怨雲格越黎越「唔掂」,越黎越「退步」,但我傾向覺得,雲格其實還是當年既雲格,並冇真正退步過。佢今日既狼狽,係經年累月地夾在老細同球迷之間既結果。佢係球會股東意志偏離球迷意願底下既代罪羔羊。

我之所以覺得,雲格係最佳打工仔,係因為佢咁多年黎都無怨無悔地幫班老闆頂晒所有批評。當然佢份人工唔係平,「頂屎」亦理應係人工裡面包左,你情我願。之但係,球迷嗌要換領隊,老實講,我覺得假如球會股東同董事局既大方向唔改變,即使換咗雲格,情況唔會變得更好。

*****

買錯貨

其實我覺得雲格最弱既一環,係臨場既調動。當你班波質素好既時候,呢個缺點唔會好覺既。只係響近年,班波頹既時候,呢個缺點就變得特別明顯。

其中對雲格既一個指控係,佢買人既眼光每況愈下。以前佢有能力平價搵到韋拉、亨利、雲佩斯…依家佢搵到既,幾乎個個都變成flop。阿仙奴係一隻沉緊既船,一個即使係有潛質有質素既球員,去踢一間情況每況愈下既球會,通常只會越踢越沉。曾經係法甲神射手既基奧特係咪真係好唔掂?球迷公敵謝雲奴打國家隊點解又會好過打球會咁多?當然對手不同,表現會有分別,不過我相信球隊同球員既進步/退步,當中有一個互動既關係。雲格既眼光差左,只係大家都見到既表面。不過我響度諗,如果亨利後生十年,近兩年先加盟阿仙奴既話,佢仲會唔會發展得到成為全盛時期既「高貝利大帝」?

*****

朋友見我睇波睇到咬牙切齒,有朋友笑我不如「轉會」,心情可能會好一點。

作為一個球迷,期望球會董事局會「順應民意」改變方向,感覺就好似自己作為普通市民,期望阿爺認真落實全民普選一樣無奈。我唔討厭雲格,對於雲格呢位領隊,我甚至有一點點感同身受。當你既位置,美其名係「管理層」,但實際上係「夾心餅」,呢種感受我每日都無奈地「享受」緊,只係「夾心餅」被人夾下夾下,終有一日會頂唔住,碎到一手都係。到時件夾心餅對於上面班老闆黎講,就再冇利用價值,自然會無奈地被遺棄,然後再換上另一件夾心餅上場。

我承認我是bias的。對於雲格這個人,我是有一點點情意結。我當然希望阿仙奴終有一日會反底,然而我更期望,阿仙奴最終係由雲格帶領之下,從谷底走出來,盡管我明白這一天也許永遠不會來。我覺得世界是需要多一點這樣的故事:一個人從挫敗中復原,憑著堅持再創高峰…errr,我知我知,發夢冇咁早丫嘛。

不過,世界上既奇蹟總係不斷出現的,嘿嘿。

祝大家有個愉快既週末。
PermaLink: https://articles.zkiz.com/?id=44687

畀英足總開年重罰停賽四場推球證雲格冇得鬥「車」

1 : GS(14)@2017-01-29 10:31:45

阿仙奴喺香港時間大年初一深夜就會出戰英足盃第四圈作客對修咸頓,但領隊雲格賽前就收到英格蘭足總送上「大利是」……呢位67歲領隊因為上周主場贏般尼2:1嘅聯賽不滿球證摩斯補時判罰12碼,喺場邊言語攻擊同推撞第四球證安東尼泰萊,就算佢事後即場耍冧都冇用,英足總周五宣佈雲格停賽四場並即時生效,兼罰款25,000鎊(約24.3萬港元),阿仙奴會方亦表示唔打算上訴。據英國《BBC》報道,嚟緊對修咸頓嘅英足盃,以及對屈福特同車路士嘅英超,雲爺爺都冇得喺場邊領軍;如果英足盃唔使重賽,佢就會缺席埋2月11日對侯城嘅英超。




來源: http://hk.apple.nextmedia.com/sports/art/20170129/19912301
PermaLink: https://articles.zkiz.com/?id=324629

【西遊記】雲格退休對阿仙奴利大於弊?

1 : GS(14)@2017-08-04 06:35:21

【文化籽:西遊記】兩間女校參加辯論比賽,議題是「雲格退休對阿仙奴利大於弊」。有看過《打死不離三父女》(Dangal)嗎?電影有一段,講述女主角打算在鄉村參加摔跤比賽,本來不獲接納,幸好主辦單位有個高人力排眾議:「有無搞錯呀,搞咁大壇龍鳳,為乜箒?為有noise嘛!女仔摔跤咁有噱頭,一定吸引到觀眾,快啲叫個女仔返轉頭啦!」辯論比賽的搞手擁有同等智慧。



如果我是反方,隨便一數,也數到幾項支持自己的理據。雲格帶領阿仙奴超過二十年,贏過三次英超,03至04年度,更史無前例以全季不敗戰績稱王,計往績,計名氣,嚇死人,市面上無其他領隊有接近資歷。即使近十幾年,食老本毫無突破,最叻只得亞軍,但長期保持三三四四有份打歐聯,直到去年才斷纜,不容易呀。強如摩連奴,都試過將車路士帶到去榜尾,要倚靠新領隊救亡。論穩定性,雲格無出其右。何況,阿仙奴從來量入為出,當其他豪門不用賺錢不怕虧蝕一擲千金,阿仙奴堅持謹慎理財,保持盈餘。站在生意立場,擅長限米煮限飯的雲格,沒有理由需要被取替。好,就算將所有理性也拋諸腦後,就跟你談感性,一個對球會忠心耿耿的老臣子,無功都有勞,試問老闆又怎好意思忘恩負義?好像很有道理。不過給我選擇,我還是做正方,因為世界變了。雲格係好勁,十幾年前。引入的歐陸式打法,踢得漂亮又有成績,其他英超球會連抄襲都無本事,一手栽培出亨利、韋拉等等球星,也證明雲格眼光獨到。可惜過氣了就是過氣了,要承認。為球會發展好,為個人聲譽也好,別戀棧權位,及早離場才能夠不失優雅。說戰術運用,太多後起之秀早早青出於藍,雲格的自信心爆棚堅持己見,即是故步自封。當全地球都用Emoji溝通,無論你的用字如何優美如何細膩,也會被主流淘汰。說栽培球星,想當年亨利、韋拉跟雲格情如父子,將職業生涯高?奉獻給阿仙奴,替球會贏盡榮耀後,才被高價出售,堪稱員工典範。今日?是相反,所有阿仙奴球員也視尹佩斯為榜樣。高價引入的奧斯爾與山齊士,未竟全功,已經在盤算何時跳船;連平平庸庸的基奧特都不會再跟球會談論忠誠。當人人也急功近利,雲格的動之以情家長式管治手法,還有甚麼用武之地?舊有一套失去功效時,最需要執行的,不是懷念,是改革。不過,要一個採用舊有一套的、得到過極大成功的帶頭轉變,未免太困難。他未必抗拒轉變,也未必是沒有能力轉變,難就難在要他接受一直持之有效的成功方程式,原來不合時宜。想阿仙奴起死回生?徹徹底底找一個新人取代雲格,是賭博,卻是唯一方法。阿仙奴領導層是否真心想見到球會重拾輝煌,才是最大疑問。保持現狀幾好吖,要尋求突破就要有重大投資;要投資就會有風險。不是人人也有決心有魄力去冒險。永續雲格就最安全,最唔使孭鑊。我一直覺得利物浦球迷好可憐,年年有希望,年年也失望。忽然之間,終於明白今時今日還支持阿仙奴的,才是最慘情。因為,利物浦沒有雲格。雲格由1996年開始接手阿仙奴,利物浦當時由伊雲斯執教。自此之後,侯利亞、賓尼迪斯、鶴臣、杜格利殊、羅渣士,有些成功,有些失敗,但個個都是唔啱就要炒,才有空間迎來高普的變革,至少讓利迷看到絲絲曙光。阿仙奴球迷不知還要忍受雲格多少年。星期日晚,社區盾,英超盟主車路士大戰足總盃冠軍阿仙奴。我一定買阿仙奴!因為,阿仙奴的故事軌迹永遠這樣循環:在不太重要的熱身賽表現出強隊風範,讓球迷引頸以待;一踏入戲肉,慢慢滑落;到爭逐英超或歐聯無望,球迷噓聲四起,要雲格早走早着,又會贏些足總盃、聯賽盃之類的安慰獎,讓球迷分裂,也讓領導層有藉口一成不變。如果你是阿仙奴擁躉,會否情願球隊要死就死得轟轟烈烈,似前季的車路士,或去季的李斯特城,才有決心引刀成一快?總好過似現在般半生不活,即是等死。


Profile:方俊傑

觀塘長大,壹仔打滾,偏愛西片、西劇、中日韓美女。利物浦悲慘球迷,非西人一個。編輯:馮秀珍美術:黃創泰




來源: http://hk.apple.nextmedia.com/su ... t/20170804/20110591
PermaLink: https://articles.zkiz.com/?id=339591

Next Page

ZKIZ Archives @ 2019