| ||||||
| 行家即是行家， 蔡瀾講佢欣賞小林斗盦作品展，幾有深度呀，同左丁山之浮面表面觀察，完全不同，好彩自己盡咗本職，就係為讀者帶來有趣資訊，讓行家如蔡瀾知道，急急走去三 聯書店參觀作品展，以免走寶。 藝術呢樣嘢，唔係人人識得欣賞嘅，唔係邊度有陽春白雪、下里巴人之分吖。小眾之精緻文化，始終難以普及，注定 係昂貴玩意。昂貴也者，即係需要政府撥納稅人公帑支持，否則冇得玩。香港某些文化人曾不斷批評西九舊計劃（即曾蔭權司長起錨，推動西九建設之舊大計，不是 被推倒重來，現正推行之新大計），指斥財團包辦藝術發展，將西九變成地產項目。當時又有不少人引外國例子，指香港唔掂。呢呢，經濟學道理始終係王道，歷久 不衰嘅，前幾日我哋咪睇報紙知道飽受世界讚譽嘅雪梨歌劇院原來只係得個殼，外強中乾，外表係澳洲偉大景點，內裏舞台設施失修，達至危害生命程度。點解會搞 成咁？一字記之曰「錢」，歌劇院好睇唔好食，澳洲人養唔起佢，遊客養唔起佢，入不敷支，故此莫財，冇錢維修，現在唯有向省政府及聯邦政府申請9億澳元，作 重修之用，數目之大，嚇壞納稅人。 因此左丁山好驚他日之西九公營模式，可能步雪梨歌院後塵，所有設施落成後，連年虧損。諗深一層，當年曾司 長佢哋嘅西九建設計劃，係判畀財團承辦一切，三十年為期，財團負責所有藝術營運，自負盈虧。冇一個財團願意虧本兼冇面嘅啫，既然財團得到地產項目補償，必 定諗盡方法去撐住西九藝術設施，三十年內唔使納稅人付鈔（實際上係由買樓人士付鈔，即係一大部份會由大陸富翁付鈔），幾高橋吖，可惜好多文化人不明其中奧 妙，逼住曾司長拋錨，真可惜。 發展藝術與體育，在在需財，政府未必長期負擔得起，愛爾蘭係歐豬五國之一，負債甚多，政府決心削減支出，今年 預算案削減開支40億鎊，明年再削30億鎊，公僕減薪20%，兒童福利削6%，其他失業福利亦然。一個特別委員會（Commission）更建議撤消一個 政府部門，就係「藝術體育旅遊部」，你敢話愛爾蘭人冇藝術細胞乎？只不過窮起上嚟，藝術發展就成為不能負擔嘅奢侈品！ | ||||||