|
||||||
|
百年老店李錦記，賣蠔油賣到盆滿鉢滿。上個月，佢哋一次過做咗兩單大刁。第一單係以四十三億元從澳洲幫麥格理手上買入上環全幢維德廣場，改名為無限極廣場。跟手再以一億三，買入紅山半島董事屋。接連大刁，完全當財爺打擊措施無料到。 江湖傳聞，李錦記呢兩單刁都係茄殊找數，認真唔講得笑。依家負利率，茄殊買磚頭又豈為善用資源之道乎？我哋向李錦記求證。果然，佢哋財政充裕，一砲過茄殊買嘢，冇研究之至，事關經營健康食品嘅無限極，非常搵錢，盈利多過醬料部好多好多，直情會生金蛋。 不過，李老闆見到負利率，唔上會做按揭，又豈非同荷包鬥氣？可惜吖，李錦記冇上市，大家只可以做其疍家雞而已。 港大之合約精神 香港大學百年校慶，活動之一，係展出大學之歷史檔案。當中有張「興建香港大學捐款收據」，中環特派專員有幸過目，覺得饒有意思。 張收據係於宣統元年（即係一九○九年），發俾捐咗六百元建校之乾泰隆者。上面訂明，「如大學興建不成攜回此收條將原款送復幸勿遺失」。有意思喺邊？ 特派專員覺得即使一百年前，有幸得到港英真傳，香港大學華人勸捐董事局已經好曉得乜嘢叫做合約精神，施與受兩方權責冇花冇假，寫得一清二楚。就係呢個合約精神幫香港發展為國際金融中心矣。若果要喺雞蛋裡挑骨頭，咁「原款送復」當然唔夠啦，起碼都要加番利息，係咪？ 趙渡歡喜過執金 中科礦業（985）主席趙渡「造人」同「做礦」一樣咁掂，佢同太座梁綽姿結婚無耐即「投產」，至今個仔已經差不多半歲矣。趙公子生得同老豆餅印一樣。 初為人母嘅趙太話：「以前做記者或公關，做完一個project就可以抖吓；生個仔出嚟，呢個project都唔知幾時至完！」其言有憾，實則喜之。佢抱住個仔，仲歡喜過執到嚿金也。 至於中科，佢哋個澳洲銅礦今個月正式投產，預計今年出產二萬五千噸銅，肯定好似「湊仔」咁，「長做長有」也！ 放工時分洗街 下晝六點，放工時分中環皇后大道中H&M周圍行人眾多；即使唔係踩死人，亦舉步維艱也。你估急香港人所急之政府會唔會揀呢個時辰嚟洗街呢？ 可以好肯定咁講俾大家知，會。天寒地凍，外判商碧瑤非但揀呢個時辰洗街，阿乜太俾水射濕，打電話去投訴，則熱線長鳴。唔通啲大老爺自己唔使出入中環者？Sorry, sir，六點幾，仲唔返歸乎？ 㩒機送餅 退役賓架御駕親征中環獅子銀行。非為其他，㩒機攞錢是也。佢剛啱收好錢入荷包，佢即刻為美少女截住。 唔使慄，退役賓架唔係劉健威，包保冇人搵佢過手癮。位美少女只係想請佢食件鳳梨酥，同埋答幾條有關獅子銀行服務水準嘅問題而已。既有餅可食，又有美少女對談，退役賓架又焉有不『舌累』飯應之理者？佢話件鳳梨酥既香且甜，好味到得未曾有。信焉。 本週品牌︰國貨殺入銀座 設計大師聖誕節到東京打個白鴿轉，喺銀座抬頭一望，赫然見到祖國品牌海爾已成功登陸東瀛購物核心矣。唔只登陸，更加同世界級名牌Dior平起平坐。犀利。 據稱唔少大和民族壯男周不時搭飛機到特區採購「今晚你就知」之印度神油。他朝印度神油亦學得海爾咁登陸銀座，則特區產品真正殺出鯉魚門，揚威海外矣。 |
||||||