中環在線：債仔冇錢還收數佬生意減 李華華
2008-11-17 AppleDaily
金融海嘯打擊下，各行各業喊晒口，唔少中小企頂唔順執笠收場、個人申請破產數字激增、各種爛賬有增無減。經濟不景，收數行業按道理最當旺，好多人以為收數佬生意一定接唔停手，賺到盤滿缽滿，但勢估唔到，連收數公司都話自己係金融海嘯受害者，嗌晒救命。
追數公司蝕逾億
上 個禮拜《華爾街日報》報道，花旗國經濟不景，雖然令收數公司多咗唔少追數生意，但唔代表收入增加。點解？原因其實好簡單，好多債仔身家已經俾海嘯榨乾榨 淨，收數公司想話喺佢哋身上刮粒沙還錢都冇，結果，追收爛賬嘅公司追唔到數，一樣盈利大倒退。好似摩通旗下嘅收數公司NCO Group，由於收到嘅爛賬比預期少，所以6月底季度業績虧損1480萬美金（約1.15億港銀）。另一間追數公司Asta Funding，截至6月底頭9個月盈利就勁挫八成，只剩800萬美金（約6240萬港銀）。債務收購公司Encore Capital Group公佈最新第三季度業績，盈利下跌三成至380萬美金（約2964萬港銀）。
收爛賬投訴居榜首
收數難度高咗，搞到收 數公司要諗盡辦法追數，電話滋擾奪命追魂call當然唔少得，後果會點？梗係俾債仔勁投訴啦。據美國全國州檢察官協會最新公佈嘅消費者投訴報告，高居投訴 榜首位嘅就係收數公司，取代咗家居維修公司同建築商嘅榜首位置。美國聯邦貿易委員會（FTC）舊年就接到7000宗關於收數公司嘅投訴，數字係5年前嘅一 倍。所以話，喺金融海嘯下，追債搵食一樣艱難。李華華
[email protected]