|
||||||
|
香港申辦亞運， 好多人反對，連民建聯都話唔支持撥款，睇怕都會無疾而終咯，曾德成局長與民建聯嘅關係密切到極，佢與霍公子力主申辦亞運，左丁山仲以為佢地事先已經同民建 聯有咗默契o忝，誰知不然，令左丁山跌碎眼鏡。今時今日，呢啲係乜嘢政治手腕呀，唔通另有內情──即係政府其實都冇意思搞亞運嘅，只係虛晃一招，應酬吓霍 公子就算？不過咁就連曾局長都擺埋上枱咯。 左丁山反對辦亞運，但唔反對用三百億元建設體育設施。香港號稱與倫敦紐約爭鋒做金融中心，但文化 體育設施同倫敦紐約差天共地，羞家啫，左丁山參加中學女皇盃籃球賽嗰陣，在旺角伊館打波，今天甲組籃球對賽仍然在旺角伊館，呢個場只算係美國嘅中學籃球 場，香港人為之蒙羞。反正西九文娛藝術區要上馬咯，啟德運動場館講咗十年，仲係得個講字，毫無動工迹象，曾局長唔該加多幾錢肉緊。 問建築邦：「何解啟德運動場館仍然在規劃階段？」建築邦話：「有三大難題，（一）係交通配套未定，例如沙中線仲未定奪；（二）環評報告；（三）區議會諮詢，相信好耐都未得。」 人 人都話新加坡先進，從嚴禁賭博至起賭場，政策徹底改變，但話咁易就有豪華賭場開門營業。新加坡冇盛事？與F1談好黑夜賽車條件之後，眨吓眼已經辦咗三屆， 帶旺新加坡旅遊業，當地酒店旺場，F1連聲叫好，話希望以後二十年仍然在新加坡舉行黑夜大賽事，但新加坡政府即刻扭擰，話要研究吓F1賽車為新加坡帶來嘅 效益與成本喎，此乃談判前作狀啫，要F1畀更好條件之嘛。 新加坡能，為何香港不能？大概新加坡唔使有甚麼環評報告與區議會諮詢之類，如果 有，政府亦唔會怕阻滯，當然最好嘅係，新加坡冇《蘋果日報》與《壹週刊》。最近一位前跨國公司高層因事來港一行，與賓架Ｆ敍舊，話題講到新加坡香港之競 爭，呢位前高層話：「我地選亞洲總部設在那一個城市，只係在港星兩者之中揀一個，其他城市唔會睇。新加坡樣樣都好過香港，但如果要同政府打官司，我地只會 在香港先至有勝望，所以我地揀咗香港！」 |
||||||