馮仁昭四圍超：夜蒲黐實 自稱婚前派對洪永城舊愛纏身挑機唐詩詠
1 :
GS(14)@2016-06-01 11:36:58■唐詩詠係城中出名好女仔，唔知洪永城會唔會好好把握機會娶老婆。資料圖片
感情是非不絕嘅洪永城「浪子回頭」，遇上「不能錯過的女友」唐詩詠，自此修心養性努力工作，但係佢兩個公開戀情之後，花邊新聞仍然傳個不停。噚日又有報道話2012年洪永城同金融業女友Emily拍拖嗰陣，向鍾舒漫嘅形象指導Bird出擊，兩個人喜愛夜蒲經常結伴到蘭桂坊，最終因為Bird嘅介入，令洪永城同Emily分手。之不過洪永城同Bird戀情都係曇花一現，雖然係咁，佢哋一直保持聯絡，早前洪永城仲被發現孖住Bird出席友人派對，狀甚親密。
■Bird同洪永城有過短暫戀情，最近似乎愛火重燃。資料圖片
■洪永城當年被指搭上Bird，先導致同Emily（圖）分手。資料圖片
親暱叫「熊熊」
洪永城被指趁唐詩詠同馬國明去拍旅遊節目呢個空檔，約埋一班朋友去夜蒲，人腳入面包括Bird，而舊愛就全程黐到實，事後Bird仲擺相上網，自稱呢個係佢同洪永城嘅婚前派對，附上一張合照加心心圖案，下面有一條圖片說明「明天我要嫁畀你啦。」嘩！呢一下擺明係向唐詩詠挑戰喎！其實Bird同洪永城關係密切有迹可尋，每逢洪永城出騷整造型Bird都會貼相，人前人後又叫對方做「洪寶貝」或者「熊大人」，甚至更親密叫「熊熊」。呢啲超越男女關係嘅行為，已經響起警號，近月Bird速速刪走所有同「洪寶貝」嘅相，唔知係咪洪永城怕正印唐詩詠誤會，定係驚無綫扎棍，勸退舊愛放佢一馬。撰文：馮仁昭
來源:
http://hk.apple.nextmedia.com/entertainment/art/20160601/19635635