|
||||||
|
潮人兼 I.T（999）大老闆沈嘉偉出咗名怕醜兼怕見傳媒，華華近年見過佢幾多劑，真係一隻手數得晒。但自從佢嘅「代言人」、前I.T副主席盧永仁辭工返歸湊仔 之後，沈生惟有焗住落場去記者會同傳媒過招！噚日又係「報案熱線」派成績表之時，唔知係咪今趟業績靚、股價又做到功課，沈生諗住傳媒同分析員都會錫住佢， 所以，噚日好明顯淡定有錢剩，企定定畀大家影相同發問，再冇急急腳鬆人。 但所謂三歲定八十，沈生人就坐咗喺度，但個口就撬極都唔開！佢全程 好留心聽大家嘅問題，但係有意見嗰陣，佢自己唔會講，淨係同隔籬個融資經理吱吱噚，再叫佢「轉告」大家，而就算佢忍唔住開咪，每句說話大概都唔會超過10 個字！望住台上嘅佢，華華腦海只浮現到「聽不到的說話」、「開不了口」、「沉默是金」、「沉默的羔羊」…… 搵人轉告自己唔講 而 全個記者會，歷時大約一粒鐘，華華聽得最清楚嘅，就係以下呢一截……I.T個股價上兩季俾芬佬笑係「must-buy item」，咁股價殘咗咁耐今日終於吐氣揚眉，沈生有咩感想呢？「唔講股價！」咁覺唔覺得自己掂呀？「唔敢講成功！」咁會唔會減持套現呀？「唔減持！」見 完沈生之後，華華突然驚到自己會患上語言障礙…… 李華華 |
||||||
| ||||||
現年四十七歲的鑽石王老五李澤楷，前年初跟為他誕下三子的梁洛施（Isabella）宣佈分手後，各自各精彩。人母梁洛施去年被發現拖猛男同遊巴黎，而「楷女郎」亦陸續浮面，包括八十後、家住屋邨的梁雯影，又被撞破跟名媛葉梁美蘭的中歐混血姪女、二十九歲大律師梁芳（Ella）在中環撐枱腳；日前二人再被本刊目睹在白沙灣遊艇會食brunch五粒鐘，小小超更李澤基爾上身，棄用司機豪華房車，做情聖親自揸開篷跑車，接送女大狀。 曬肌肉臂 李澤楷跟梁洛施分手兩年，專職在加拿大湊仔，有戲唔接的Isabella去年三月再度傳出新戀情，與男友把臂同遊巴黎羅浮宮。至於小小超，除被發現跟在天水圍屋邨出身的梁雯影外遊，又被傳媒影到跟葉梁美蘭姪女大律師梁芳，在中環日本餐廳Wagyu Kaiseki Den晚飯，惹來大批傳媒在門口等候，為怕Ella受驚，護花心切的小小超，臨時急召名媛好友葉梁美蘭出動，救走Ella解圍。日前，小小超跟Ella在西貢白沙灣遊艇會撐枱腳食brunch，入會費只需五萬蚊的白沙灣遊艇會，會所餐廳食物價錢亦十分平民化，不過未有影響二人雅興，在內嘆足五粒鐘。上午十一點，戴墨鏡、著polo恤、露出肌肉臂的小小超，跟同樣一身出海裝扮的Ella，刻意選擇坐在二樓餐廳內的角落位置。為免受到騷擾及引來注目，小小超吩咐兩名著風褸的保鑣，在會所大堂及遊樂場草叢一帶扮路人周圍行。 戒備升級 由於小小超帶同女伴出現，會所餐廳內的侍應早已自動波將戒備升級，每個門口均有人把守。食到下午兩點多，小小超起身離開座位，走去停在露天停車場的百萬Audi跑車，攞走一疊文件後，再折回餐廳繼續傾。「Richard（李澤楷）過往對女朋友出手好豪爽，豪宅現金話送就送；但對Ella就完全唔同，呢年佢變咗情聖，講感情，但早排睇中咗部新車，Richard就心思思，諗過送一部俾Ella。至於同Isabella（梁洛施），兩個已經冇聯絡，但對幾個仔的健康就好關心好緊張，搵醫生睇住，隨時向佢報告。」知情者說。 情聖揸車 當日小小超在餐廳內跟Ella有傾不完的話題，到下午四點左右才捨得離開。由離開餐廳到攞車一段路，二人邊行邊講邊笑，小小超更棄用司機，情聖上身，親自揸開篷車，送女友返屋企。據瞭解，梁芳早已有一個拍拖數年的男友，一一年九月被傳媒踢爆跟小小超在中環食日本餐，臨時到場解困的葉梁美蘭即表示姪女心有所屬，但其實當時梁芳跟男友感情已亮紅燈；小小超的出現，加上表現體貼，梁芳才決定換畫。 擴闊人脈 「大家知道Richard對Ella有意之後，都有啲出奇，因為覺得Ella唔係佢喜歡嘅類型，再加上有報導話Richard唔止一個女朋友，所以大家都叫佢睇定啲，工作行先，唔好輕易放棄事業。」知情者說。記者致電李澤楷求證他跟梁芳拍拖一事，電話長響無人接聽。至於介紹姪女給小小超的葉梁美蘭，回應二人拍拖時說：「佢哋唔係由我直接介紹認識，不過當日係一個商業性質飯局，我只係想擴闊Ella嘅人脈網絡，幫佢搵多啲生意，咁啱李生亦有出現，我唔知佢追Ella，亦唔知佢哋拍拖。」 叻女掌門人 李澤楷的情史豐富，身邊女友如走馬燈，儘管如此，小小超的擇偶條件絕非以貌取人，過氣女友十居其九「才貌雙全」，就算出身普通，也絕不失禮。92年在美國史丹福大學讀書時，與新加坡華籍女同學Margaret Chew拍拖，畢業後Margaret任職律師，二人拍拖一年後，性格不合分手。02年李澤楷被發現與任法官的李素蘭登上其價值3,000萬的遊艇共度週末，李素蘭出身於葡籍法律世家，父親是退休法官，哥哥是執業大律師。11年與梁洛施分手後三個月，李澤楷被拍到與八十後的梁雯影（Kirsten）同遊新加坡，當年26歲的她家住天水圍屋邨，中五畢業後於中環一高級西餐廳任職侍應而邂逅李澤楷，在餐廳做了三年多後，Kirsten辭工重返校園讀設計課程。 特工式約會 鑽石盤小小超拍拖鮮有高調，就算平日與女友撐枱腳，也甚少被外界撞破，全賴事前部署做得足。09年，梁洛施攜子李長治由美國秘密返港探親，李澤楷與梁洛施跟友人在ifc飯聚見面，亦先派人視察好場地，認為無可疑人或傳媒後，再搵司機接梁洛施及其他友人到目的地。除了事前各人均不知道飯聚地點外，有指小小超的保鑣會先在飯聚場地安上電話干擾器材，令出席飯局人士的電話受到干擾，失去信號，確保飯局地點不會即時洩露，保密行蹤功夫，做到好足。此外，12年與梁雯影約會時，也曾被傳媒拍到包下中環Classified整層樓，梁雯影更等李澤楷到埗後半小時，再由保鑣護送到達餐廳，同女伴一齊出現的情景，少之又少。 | ||||||