我主場：痛心祈求天下無拐Thank you Andy！
1 :
GS(14)@2015-03-29 13:42:50
■劉德華希望觀眾看過電影《失孤》後作出反思，終有一日會天下無拐。攝影：郭賢興
如果不是特首梁振英早前公開感謝警隊一哥曾偉雄（Andy），普羅大眾也不知原來曾偉雄也叫Andy。我們確實有一位Andy必須感謝的，他就是身為人父的劉德華（Andy），早前華仔接拍講述尋找失蹤兒童的新作《失孤》，不是為求電影多感人或自己的民工形象有多突破，而是希望世界上只要有人看後作出反思，好好保護子女或停止傷害兒童，便是電影價值所在，那句「Thank You Andy！」華仔是應得的。撰文：文國駿電影《失孤》參考了眾多兒童拐賣真實個案改編，劉德華在電影中飾演尋子15年的民工，實在是無數骨肉失蹤父母的化身。劉德華日前為電影《失孤》接受本報專訪，談到他如何被劇本觸動及對拐賣兒童的認識時，他謂：「我喺農村出世，細細個已經聽人講拐子佬，所以嗰時見到陌生人好怕，入行後去泰國或者中國大陸較落後地方，都會見小朋友乞食，香港好耐以前都有呢啲現象，當我睇到劇本時，自己突然希望大家都知道呢啲事，我冇諗過要故事有幾感人或自己有幾突破，而係單純希望透過自己演呢一部電影，終於有一日可以令到天下無拐，咁就係最理想，透過呢啲善念，少啲人做呢樣嘢，由根到因，係我最想做到嘅。」
抱民工心態食茶記
籌備拍攝到電影宣傳期間，外間注目的是天王氣場的華仔要扮演低下層民工，問到他如何入戲？華仔說：「任何人得到信任時就可以做到，導演信我，佢喺我接拍過程間都花好多唇舌去說服投資者。我諗過自己投資，但因為成個計劃係人哋嘅，我唔可以搶人嘢。民工形象方面我唔會刻意話唔做劉德華樣，反而係喺心態上面着手，我心態好正常人，我可以喺大排檔食飯，我喺拍攝現場係坐茶餐廳食，只係通常都俾導演趕返入去，我對中下層生活都好了解。」
■為投入角色，華仔主動與其他演員一起吃大鑊飯。微博圖片
■井柏然與劉德華在尋親路上相識，一起開着電單車踏遍全中國。劇照
戲中雖然講述華仔已經尋子15年而不獲，但是他兒子從沒有在戲中現身，問到面對如空氣一樣的兒子，他是如何投入角色？他謂：「其實我自己冇將搵小朋友件事放最重要，我係代表關心身邊人，用生命影響生命，希望盡量減少失蹤兒童。至於我點投入角色，第一我生命入面都照顧咗好多小朋友好耐，見到有啲由壞變好，面對過唔少，而且我自己都係一名父親，所以唔使準備。」
反思電影背後意義
電影中有一幕當華仔以為找到了失蹤15年的兒子，但原來只是搞錯了，希望落空，本以為華仔會哭得呼天搶地，但那場他竟只是淡然笑笑，華仔解釋：「我喺戲入面搵仔搵咗15年，好老實錯咗好多次，佢反而擔心小朋友失望，我係想去安慰小朋友，唔可以破壞佢希望，要畀信念人，宣傳發行都有諗點解嗰場唔係喊到呼天搶地。我見過超過一百宗案例，佢哋見面唔係想像中咁，有父母冇辦法面對虧欠同內疚，小朋友都冇乜喊，佢哋唔習慣，太突然太多嘢。」
■華仔與老婆朱麗倩育有一女，早年他們分享過一家三口的手仔合照。資料圖片
朱麗倩《忽然1周》圖片
■華仔從心態着手，完全變成戲中角色雷澤寬。
華仔曾表示只要有人看了電影後反思，這已是電影的價值。問到他是否希望接拍多一些可以令人思考的電影？華仔表示：「其實電影事業應該闊啲，唔應該係直向發展而應該係橫向，我唔排除搵我再拍《賭神》我都拍㗎，人生都係咁咋嘛，有巨星生活，有平民生活，咁先係成個人生，我久唔久一定出一套呢類電影，係我其中一種興趣。」
來源:
http://hk.apple.nextmedia.com/entertainment/art/20150329/19093701