|
||||||
2010-9-9 AD
|
||||||
近排新股市場又熱鬧番,十幾隻新股排隊登場,要sell到俾啲客,無條絕世好橋真係搞唔掂!好似面膜生產商美即控股(1633)咁,竟然搵到自己嘅策略投資者、女股神劉央,喺投資者推介會上面幫手站台,推銷自家嘅MG面膜! 有 份睇劉央獻技嘅芬佬朋友同華華講,佢大姐噚日一上台,就勁讚美即啲面膜有效,話自己用咗成兩年,發覺用70蚊一塊、劉嘉玲有份代言嘅SKII,同用10蚊 一塊嘅美即效果差唔多,佢仲自爆用完美即之後,佢老公都覺得佢唔同咗;不過邊度唔同咗同埋點樣唔同法,佢就無講落去喇。 金利豐老闆娘朱太幫腔 除咗劉央勁讚MG,美即另一個策略投資者、金利豐老闆娘朱太都一樣激撐美即,佢話美即嗰款「流金絲語」面膜,論質素已經打敗SKII,自己都有用喎。 SKII班代言人,好似劉嘉玲、琦琦、李心潔等靚女,又真係幾夠號召力,睇怕美即都要喺代言人方面諗諗嘞! 李華華 |