| ||||||
「飯局事件禍延娛圈」,曾志偉涉「掌摑」事件,黃浩被圈中人圍剿,老婆徐淑敏不好過;黃浩自稱「老婆唔使做」,無綫順理成章,停止為徐淑敏接job祭旗,冇工開徐淑敏情緒受影響以致暴瘦,我見猶憐。 開刀祭旗 出口撐曾志偉捱告的梁烈唯,有無綫「超級」高層力撐;同人不同命,同是無綫藝人的徐淑敏(Suki),卻受老公黃浩牽連,不但暫停幕前工作,連快錢job都一律暫停。自殼王陳國強入主無綫,曾志偉在無綫儼如隱形高層,在公司內部有絕對影響力;加上梁烈唯事件,無綫眾「超級」高層對黃浩同仇敵愾,部署反擊,徐淑敏的處境更不好過。「雖然樂小姐同外邊講『聽話兩個都撐』。但有高層好唔高興,認為黃浩太寸,連老婆嘅同事都搞,又冇偈傾,又話自己唔使老婆做嘢,無綫見佢咁,咪借口話件事令到Suki形象好差,通令下面暫時唔好幫佢接job,直到另行通告!」無綫內部人員透露。夾心人難做,徐淑敏過去即使幕前工作量不多,但一直受到廣告商歡迎,一個月起碼有兩三個活動,如今做了祭旗犧牲品,外接job叫停,情緒難免大受影響。「佢成個人落晒形,瘦咗好多;之前同人講話要減少娛樂圈工作,專心搞美容,其實根本唔到佢話事,依家佢只係想件事快啲過去!」徐淑敏閨中密友透露。 寸黃浩吐口水 無綫冇面俾,公器寸黃浩。謝天華、森美主演的《法網狙擊》,當中強姦高海寧的大反派白健恩,便重演年前黃浩向記者吐口水事件,對白和場面亦如出一轍,擺明玩嘢。 重演吐口水事件 TVB擺明唔妥黃浩,現正播映的《法網狙擊》更重演黃浩吐口水事件。 向太插口有因 「飯局事件」演變成「掌摑事件」,黃浩被娛樂圈藝人圍揼,甚至連向太陳嵐亦開腔,暗寸有人借「向氏契仔」認親認戚,攞着數。有指向太力撐徐濠縈和梁烈唯,是因為與多位「飯局」成員關係密切,兒子向佐是徐濠縈老公陳奕迅的好友,而梁烈唯女友則是向太的公司員工。據了解,其中最關鍵原因,是「飯局」成員中的何超儀。近年「中國星」淡出電影圈,轉向澳門博彩業發展,向太跟賭王四太和何超瓊均屬好友。前年一月,何家爭產事件期間,由何超瓊擔任董事的澳門旅遊娛樂有限公司,以估值折讓四成、5.5億出售澳門東望洋四幅地給中國星,賭王何鴻燊退回之前中國星購買位於澳門南灣湖畔地皮的兩筆訂金,共3.6億,令中國星有足夠資金買下澳門蘭桂坊酒店全部股權。 |
| ||||||
樣靚聲甜的徐淑敏(Suki),○六年參選港姐,之後拍劇集兼做主持,成為宅男女神。○九年,嫁予飲食才俊黃浩,先後誕下兩名女兒。今個月,Suki結束無綫合約,正式轉型從商,演藝成為副業。她的女強人之路,始於一一年懷孕期間,突然皮膚敏感,啟發她創立自家品牌的護膚品。首次創業的她撞板多多,但以自己做生招牌下,成立一年,現時每月賺超過五十萬,公司由最初的三個人,變成現在十個人,未來還會進軍日本市場。創業‧勇敢 二十九歲的Suki,已是兩女之母,她的創業故事,亦與女兒有關。「佗住二女四、五個月時,突然塊臉敏感,唔可以再用平時嘅護膚品,之後睇書發現可以自己做護膚品,台灣已經好興,於是走去學。」Suki說,除了看書,她亦報讀香薰治療課程,用香薰精油製造護膚品。「材料有水、植物油、精油,全部都係天然,成本又唔貴。」開業初期,公司只有Suki、品牌設計師及香薰治療師三個,由商業登記、找辦公室、買原料、找生產商,都由Suki一手包辦。曾為罕有的白玫瑰花水,親自飛到保加利亞,向當地的花農「拍門」。一二年九月,護膚品牌SÈVE正式成立,但性格急進的她很快便有第一次失敗經驗:「我之前自己出錢製作咗個美容頻道叫《SÈVE TV》,教人化妝、講吓名媛衣櫃,用咗超過十萬,原本打算賣給電視台、報紙副刊,最後只係賣到俾《蘋果》嘅《add》,收視都係一般。」重新上路,最大困難是請人。「很多有經驗嘅人嫌品牌新,唔肯做,剛畢業嘅人玩一陣就走,試過做咗兩日就話唔做。」她檢討過後,明白員工要有歸屬感和滿足感,才做得長,「我以前要求好高,語氣亦較差:『你快啲俾我啦』,而家識得用獎勵及鼓勵,放手俾佢哋去負責搞活動,俾佢哋學嘢,又有滿足感。」整個投資成本約四至五百萬元,Suki坦言當中三百萬來自老公黃浩,但開業半年後,公司已自負盈虧。現時每月盈利超過五十萬元,今個月更會請全公司員工去日本旅行慶功,「我哋廣告費唔多,又無門市,都係靠同事幾乎廿四小時咁覆facebook訊息。客戶服務做得好,靠口碑先有咁好成績,希望今年可以打入日本市場。」 投資‧怕怕 創業大膽,其他投資就很謹慎。「咁大個女淨係買過兩次股票,以後都唔敢買啦。」七年前,Suki跟家姐男友買股票,「佢喺銀行幫人買股票嘅,諗住我都係佢未來姨仔,好天真咁靠晒佢,拎咗兩萬蚊出來。」一個月內,這股票令她大賺一倍,「我連股票名都唔知,以為好易賺,再拎咗四萬蚊去買,點知最後輸突,蝕咗五萬蚊。」自此,Suki就不敢再買股票,婚後改跟老公買入風險較低的外匯,「三年前見澳元跌得比較低,買咗二十萬港元嘅澳元,而家都有賺錢;最近日圓跌咗好多,我都買咗三、四十萬港元嘅日圓,再跌會再買。我哋好鍾意日本,一年都去三次,就算唔升番都可以自己用。」 家庭‧美滿 Suki兩個囡囡,一個四歲,一個兩歲,現在還未有金錢觀,日後教授理財的重任,由老公負責。「我理財好差的,未識老公之前,我係賺十蚊使十二蚊嘅人,同朋友食餐八千幾蚊嘅飯,我會爭住俾錢,又或者今個月接多咗show,就走去買架車。無諗過以後要供車,同埋下個月要拍劇,無咁多收入。」婚前她試過負資產五十萬元,結婚後,反是老公影響了她。「佢係嗰啲賺十蚊只肯花一蚊嘅人,如果我想買嘢,佢會講:『你鍾意就買啦』,但個樣好心痛,搞到我都唔捨得買。」她表示,兩個女兒都很懂事,很少會扭計買玩具,「佢哋好生性,我同佢哋講,爸爸啲錢要留番俾佢哋讀書。等佢哋讀小學,我諗住每日俾十蚊佢哋做零用,教佢哋點用錢啦。」 蘇民峰:馬年旺火木 馬年將至,金融界不少人都篤信風水命理。本刊找來風水師蘇民峰講解馬年股市投資運程,以及個人投資心得。為馬年大市趨吉避凶,同時亦向讀者推介馬年五隻「最旺」股票。 年中可入市 蘇民峰除了睇風水外,更愛投資股票及炒樓炒鋪,已有近十年投資經驗,保守估計身家逾四億元。他透露,今年從股票市場斬獲約三百萬元,回報率約一成多。一四年為雙數年,他指港股會先跌後升,雖然經濟逐漸進入穩固期,但不宜太過樂觀,要買防守性夠強的股票。「我已經開始沽啲股票,唔好咁快撈底喎,因為三月時仲有暗湧,五、六月先係入市時機。」以板塊來說,蘇民峰指馬年屬火及木的行業最旺。「去年旺水,所以賭股同科網股升得最勁。今年屬火,最旺嘅係電訊、電子電腦、石油、煤礦同能源,至於木就係紙、成衣、家具同紡織等。」蘇民峰透露正逐步買入中移動(941),「一來屬火,二來有4G概念。中煤(1898)都幾好,煤炭股去年回落唔少,估值相對較便宜。而屬火股份,仲有中石油(857)。」至於屬木的板塊,今年有機會翻生,「比較睇好波司登(3998)及安踏(2020)。羽絨幾時都有人著,今年生意一定升。體育股都開始炒復甦,李寧(2331)盤數好難睇,買唔過。」蘇民峰指,屬水的板塊將是今年表現最差的,建議持有賭股、金融股及航運股的投資者,在一月前要沽售。 利時大業主 不過,蘇民峰有八成的資產,都投資在樓及鋪位上。他表示,一五年前,香港樓市仍然會往下調整,以地理命格來算,西南方將會行大運,「用油尖旺區做界線,運氣會向左面走,去年條運走到深水埗,馬年就會走到荃灣區,買樓最好買荃灣啦!」由於樓市向下走,蘇民峰近年已出售中環地鋪、汀九豪宅及一間寫字樓,目前居所是租用,沒有自住物業,餘下一個舊樓單位租予風水學生作社團活動,並持有十多個尖沙咀利時商場鋪位,「唔會再買鋪啦,愈升愈貴,我賣個中環鋪已賣平咗(四千七百萬),而家又升咗三成。而家租金回報率得嗰一釐幾,計落點都唔化算。」他手上的利時鋪位乃○七年買入,他指一世都不會放,「一間一百呎鋪,月租成三至四萬蚊,邊度搵呀?」租樓住的蘇民峰,一直在物色擁有大露台的特色單位,但不心急入市:「而家樓價咁貴,租樓係好過供樓,啲人成日覺得幫人供樓唔抵,呢種心態係錯嘅。等一五年樓價跌,而家租樓仲化算!」最後,他指十二生肖中,屬兔的今年投資運程最好,羊、雞運程亦佳,最差的三個生肖則為鼠、虎、豬。 |