| ||||||
舖王波叔鄧成波轉戰股壇,噚日以業主兼老友身份,出席由許照中揸fit嘅僑豐金融分行開張儀式,華華自然唔放過請教波叔投資心得。佢話較鍾情中資股,尤其內銀股同保險股,現時持有工行(1398)、建行(939)同中行(3988),又睇好國壽(2628)。 波叔亦有投資藍籌地產股,如恒地(012)同新世界發展(017)。既然波叔都唔睇好個樓市,點解又買地產股?佢話對鄭裕彤好有信心,股價一定會倍升。 講 到呢到,波叔叫華華唔好當佢係股神,佢話投資策略放係唔同人身上,有唔同效果,好似佢自己,因為每次都係大手買入,即使只升少少,利潤都好可觀。波叔仲舉 埋例子,例如一注買入中行1000萬股,中行即使只微升1仙,賬面已賺10萬蚊,但散戶買少少,賺一仙分分鍾唔夠畀佣金。波叔一再叮囑股民要識轉身。 據悉,波叔自07年至08年金融海嘯前,賣咗約30億物業。佢又話o依家舖市「冇乜平貨」,年尾先會考慮入市。 | ||||||
財爺波叔邀請天水圍低收入家庭到其官邸作客,「騷」其獅子山精神,如何由大坑西木屋區一步一步攀上住南區獨立屋,追求社會名譽、地位,成為波叔向上爬的強勁動力。 港英時代,以進身香港會及馬會會員為成功之士,家陣唔少高官都以攀上此等會所為成就,官場上仍以波叔至為「尊貴」;同時成為香港會及馬會遴選會員(Voting Member),其次為傻強——財經事務局局長陳家強,與波叔睇齊,不過就遲波叔少少先攀得上馬會Voting Member。兩位仁兄均「尊貴」過林鄭,林鄭只是馬會Full Member,級數低過Voting Member之餘,佢香港會個會籍都只是年半前獲批;不過名譽呢家嘢,睇大家如何定義,已被定罪在赤柱服刑的前特首曾蔭權,在三月一日馬會公布的名譽遴選會員(Honorary Voting Member)依然榜上有名,如果以馬會規矩,年過七十之Voting Member自動升呢做Honorary Voting Member,今年七十二歲的曾蔭權當之無愧嘅。 患難見真情又一例證 別以為「頭號梁粉」張震遠破產後就「鵪鶉」,聽講佢依然活躍於商界,早排仍西裝骨骨在四季酒店出入與友人午膳,失意商場嘅啤梨張幸有架寶馬X5 SUV車代步,唔使話要坐公共交通工具同人逼,因為架車由老婆Josephine持有,而住的跑馬地千五呎單位,都係由老婆外家交租,體現夫妻「患難見真情」的真諦。 中環寸嘴新發財與世家子弟之別 工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。 城中「某君」狠批福臨門啲廚,今鋪真是不謀而合兩父子都討厭福臨門,等我去福臨門飲餐茶慰問吓,睇吓佢哋有冇反省!須知道愛之深,責之切!福臨門新星行政總廚「良仔」,都好尊重啲有錢佬,以大路菜式為主,雖然已親自briefing新紮師兄去煮啲健康餐,咁unique餐單就無謂鑽牛角尖,加上五個廚榮休導致人手不足,啲咁濃縮版真味,即係等如真愛,唔係咁容易求到,要大量銀紙堆砌出嚟。我去幫襯福臨門有時都好谷氣,要做埋武術指導,尤其啲新紮師兄放例假,簡直做白老鼠,但價錢又收足。上個禮拜整味苦瓜魚片,條鯪魚片煎得唔夠香口要彈鐘,叫佢加紅辣椒再爆香佢,重新再上枱,你估真係唔勞氣o架?我乃念總廚安叔同埋良仔由細睇到我大,我當作承先啟後,半個大師兄咁做。我雖然較「某君」嫩口啲啲,細佬我對福臨門啲古仔都略知一二o架,創辦人徐福(肥佬福)以前喺何東屋企做家廚,所以何佐芝未死前,可以叫佢煮番何東食過嘅幾味撚手小菜,咁先至有台型嘛!此乃新發財同世家子弟之別也! 奀股背後的傷感 本週有隻由創業板轉上主板不久的上市公司——均安控股易手,雖然市值奀豬豬只有十五、六億,不過其控股股東黃宜通Tony大有來頭,他是新地郭老太的女婿,說來傷感,黃宜通七四年娶郭家大小姐郭婉君為妻;呢位大小姐在英國倫敦大學化學碩士畢業後,返港在新地主理行政人事嗰瓣,黃宜通於倫敦帝國理工學院碩士畢業,家族本德置業早於二、三十年代在香港搞地產,發跡早過霍英東;所以當時黃、郭對親家乃是門當戶對,婚禮成為城中盛事,只不過婚後四年,郭婉君於一九七八年因腦癌早逝,遺下兒子黃纘嘉,估計年近七十的黃宜通賣殼部署退休。 |
過緊財爺癮的陳茂波,攀上司長級位置後當然無人不識,就連鄉紳都想黐吓其官威,聽西貢村民爆響口,波叔與太太結婚之初都好誠心,有次包隻艇,傍晚時分到達清水灣佛堂天后廟(俗稱大廟)拜神,戲肉係入去廟內摸龍床求子,哇,後來波叔果然一索得男再生個女湊夠個「好」字,咪理波叔係基督徒,work就得啦,每樣嘢都有個價嘅,家陣入大廟摸龍床盛惠十八元,廟內有三張床,分別求財、健康及求子,以每張每次計,明碼實價十分均真! 紅底新抱旺老爺 與李國寶同李國章同輩的李國棟(Donald)醫生,雖然去年卸任醫專主席一職,接着就當選為世界家庭醫生組織候任主席,其政治行情看漲,成為名醫飯局中的焦點人物;今時今日要做名醫,並非要搭橋通波仔,最緊要搭通大陸天地線,飯局中有名醫謂Donald Li是目前在市場上最搭到路去大陸的醫生,此乃非靠其「李氏家族」助力,而係佢娶咗個背景非凡的新抱,親家就是中國駐紐約的外交高官;潮流大趨勢也,內地高幹子女已成為「世家望族」之後的目標「筍盤」,唔少名人之後如前大法官胡國興及新地主席郭炳聯新抱都係好紅o架。 中環寸嘴過萬蚊支酒……渣燴牛尾 工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。 睇電視ÉPURE呢間法國餐廳sponsor紅酒節目,話酒窖有成千支酒,同半島酒店有得「撼」,即管又book間房去食餐晏仔,不過睇完set lunch餐牌,都唔想難為自己,都要叫 la carte,呢間餐廳重金禮聘三個正宗法國佬做Sommelier、廚師同經理,都好揼本。即場考吓個Sommelier,睇吓食餐小便飯介紹乜春春俾我,任你斬,睇吓有幾多斤兩,介紹過萬蚊嘅Burgundy 2000 Domaine Comte Georges de Vogue Musigny Grand Cru,話晒法國佬都有啲料到,飲到剩番啲渣,Sommelier考番我轉頭,問啲紅酒渣點處置,我話拎走佢,粗粗哋過萬蚊支紅酒渣攞返屋企醃吓牛尾「揦」鬆啲肉都唔知幾過癮。嗰支法國礦泉水仲話係全港只有呢家餐廳至有。再考吓鬼佬,問佢有冇甜品Souffle,須知道喺我個年代,所有在英國貴族High School讀書嘅女仔,上家政班必須學曉整Souffle,才為之大家閨秀,而唔係好似香港啲土炮高官去海外修讀短期course就當自己有卡士,食呢個Souffle最緊要攪屎棍,沉咗底嘅酒好重口味呀。 本週壹篤 福臨門下週搞Wine Dinner,成兩千銀一位,不過中英文字欠兩點,美點「雙輝」英文寫作Signature Petit Fours,之不過要福臨門補多兩點都唔係難事! 路易十三欲借何猷龍過關 澳門的「路易十三酒店」老細洪永時(Stephen Hung),以往衣著品味突出,拖住個model老婆揚威波場,酒店以全球最奢華作招徠,但動工多年至今仍未開張,睇嚟世界難撈,賭業吹冷風,手揸賭牌嘅公司都唔容易捱,純粹做酒店的「路易十三」可想而知;不過公司的跑腿四出度橋,聽講有意向Studio City何猷龍借賭牌,跑腿仲話只要何猷龍肯借出賭牌,就可以向銀行借定錢開賭枱,講到好容易咁。不過洪永時間上市公司去年已改名,由本來的路易十三酒店改為十三集團,奉勸開賭的話不要玩廿一點,事關手揸十三點就好容易爆煲。 本週圖片 週六,何超瓊匆匆忙忙在IFC Robuchon餐廳同閨密俞琤食晏,三扒兩撥就搞掂,不愧女強人本色! |
財爺陳茂波(波叔)兩度反駁穆迪(Moody's)調低香港評級,大概話祖國經濟強大,香港又衰得去邊云云,插穆迪理據膚淺咁話,其實被評級機構down grade,作為國際金融中心影響層面深遠,波叔雖然都係專業會計師,但此舉暴露其膚淺一面,他非Big Four出身,所屬的香港會計師公會,俗稱華人會計師公會,專門接中、小企生意,波叔可能慣咗服侍中、小、微企老闆,一時間適應唔來以此思維來說話;中、小企有乜幾何發債籌錢,唔搵穆迪或標普等評級機構為發債做評級,都幾難有投資者落疊,rating一跌,債價息口都受影響;香港係國際金融中心,雖然唔少國內企業發債都冇rating,一樣有銀行買,但此乃閂埋門自己友打麻雀抽水伎倆而已! 李寶安睇晒 TVB TVB早前提出回購股票方案有阻滯後,仲被踢爆來自大陸的黎瑞剛才是終極大股東,涉違反廣播條例,接住主席殼王陳國強又墜機執番條命仔,在此多事之秋,公司有乜風吹草動都會搞到人心惶惶,Big Four會計佬出身的行政總裁李寶安聽講進一步控制TVB營業部,呢個部門本來係由老臣子鄭善強(S.K)揸旗,以往坐鎮銅鑼灣禮頓道,家陣都要搬返將軍澳電視城坐七樓,李寶安又引入亞視的David徐及謝偉光出任助理總經理,以接手營業部,此舉令人推測是架空S.K的布局,不過李寶安有track record,在林伯掌管亞視期間曾令亞視轉虧為盈,即使林建岳高價買富麗華酒店一役弄致債台高築,都發揮其鍊數本色減債救亡得而保命,今鋪可謂英雄有用武之地。 中環寸嘴拒絕被四叔「包」起個場 工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。 返去溫哥華打個白鴿轉,臨走前梗係去前遠東交易所飲食部大佬——海棠酒家搵「棠叔」食番餐清清哋嘅順德手勢。吖,咁啱俾我撞到玄學大師蘇民峰,佢都懂得去溫哥華有山有水吸吸靈氣,又「奶」架步,識得走嚟搵「棠叔」搵食。有時食幾多著幾多整定,四叔李兆基想嚟食,棠叔怕地方細招呼唔到,而拒絕被「包」個場,皆因四叔子孫保鑣眾多,加埋其世姪,溫哥華僑領湯馬仕馮(馮景禧長子馮永發),一大棚人o架!返到港,開雪櫃飲支日本仔「神能水」,嘩,真係咁×清涼,仲正過我返加拿大飲嘅冰川水,呢支嘢係有條友醒我,話成三百幾蚊一支,加埋運費成八嚿水,真係一支水都講功架。條友仲話好難先至班得到,因為貨唔多,唔好以為有錢就買得到,初時仲以為係乜鬼傳銷伎倆,搵人check過又唔係,有時乜都要試吓,但飲上癮唔知點搞,我都幫你唔到啦!記得我老頭子講,六十年代帶過唔少當時仲未係猛人嘅朋友,去日本歎男女共浴溫泉,如果唔係又點會有條友醒我支水呢啲回報吖! 靚酒+股票=夢寐以求飯局 呢排富豪飯局,唔係講食得有幾「貴」,而係要有台型,請到位Master of Wine——葡萄酒大師傍住教飲靚酒,邊講邊食此為之高尚情操也,要獲此資格殊不容易,自一九五五年起全球得358名人士考獲此資格,香港只得兩名,包括是全亞洲首位女性獲Master of Wine資格的美籍韓裔Jeannie Cho Lee(李志延)這酒界大紅人,近排因主持一個靚酒電視節目而人氣急升,愛酒之人都想與她飯局品酒,而Jeannie Cho Lee的老公Lee Joseph B,就是美銀美林亞洲股票銷售部阿頭,兩夫婦簡直係perfect match,一餐飯局美酒加埋靚股票,成為城中大客夢寐以求飯局。 |