📖 ZKIZ Archives

李氏樓刁（下）

開咗個頭，已經過咗三個月，係時候埋單，HEA埋佢。

兩單李氏樓刁，仲未大結局，勢估唔到，順叔幅改圖會批中，長實(0001)誠伯件雍澄軒，擺出一副摟屌姿態，結果「APEX」真係變咗「appendix」，分拆「闌尾級」酒店出售的偉大創舉，已經爛咗尾；嗰邊恒地(0012)四叔要捐出「環尾」級農地，幫後生仔上車，不過俾你做政府地政，一嚿「環尾」豪過嚟，冇路冇配套，要又唔係唔要又唔係，拖得就拖，大東北計劃當然仲係冇突破。

有心人可以計吓數，誠伯唔可以分析酒店出售，對腸實財務有乜影響；四叔私人向恒地股東購回農地，價錢係咪合理、對恒地新界農地的價值有乜影響咁。不過呢啲數字遊戲，留返俾分析員做，財經茄哩啡最有興趣的是，兩單李氏樓刁的結果，對兩位最有錢的「李」日後在香港的運程，有乜啟示。

之前兩篇李氏樓刁重覆提及，誠伯及四叔兩單樓市大刁，好有弦外之音，同香港的政治變奏，絲絲入扣。

四叔善心大發，放細魚鈎大魚，同一招式已經出過好多次，最經典例子，包括在1995年，在天津發展所謂「微利房」，變相捐錢幫天津搞基層房屋福利，一年後恒基中國就上市，今次捐農地，唔使問阿桂，舊曲重彈，為咗早日推動大東北的發展，而呢個位處中港之間新市鎮的，正正係融合中港社會經濟的重要規劃項目之一。

掉轉頭，誠伯分拆酒店出售，從供應角度出發，最重要弦外之音，查實就係香港市區唔少土地，用咗嚟起酒店，如果香港政府願意拆牆鬆綁，容許分拆酒店出售，即時會有大量市區住宅單位應市，不過代價就係，要放慢內地遊客自由行的步伐，換句話講，同四叔推動大東北計劃、令香港社會經濟向大陸靠攏的方向，完全相反。

如果誠伯代表「兩制」，四叔代表「一國」，兩位最有錢的「李」，大唱對頭戲，成件事會變得好有意思。

先講少少歷史。

誠伯同埋四叔，聽講以前係老友底，廿幾年前的富豪八掛新聞，仲講到兩條友係高而富波友，同埋鋤大弟鐵腳，呢啲傳言唔知有幾真，不過可以肯定誠伯及四叔，在香港某時空曾經有重大共同利益及合作空間，前身係嘉諾撒聖心書院中學部（而家搬咗去置富）的西半山嘉兆臺，就係合腸實恒地兩大地產商之力的杰作，樓盤合都結合咗誠伯及四叔兩大孖沙大名，八十年代尾，誠伯帶隊衝出世界，去咗加拿大重建溫哥華世博會舊址項目，四叔同埋新世界(0017)彤叔，都係中標發展商太平協和的主要股東。

腸實及恒地，近廿年已經冇話有乜合作項目（查實誠伯已經好少同其他孖沙合作，西九同新地合作的「活力星」係罕有例外），早幾年四叔「亞洲股神」上身，日久日公開講股經，誠伯忍唔住向傳媒暗串四叔，可見兩位孖沙近年可能已經冇乜計傾，甚至臉阻阻。

可能2007年炒股太容易賺錢，四叔可能開心過籠，「亞洲股神」一度上身，除此之外，以佢超級富豪身分，算係非常低調，不慍不火，對人和和氣氣，甚至帶少少傻戇，扮豬食老虎，好少話同人公開嗌交，四叔同誠伯，為咗商業利益公開拗手瓜，只有兩鑊，包括1993年，四叔靠人情牌，擊敗誠伯及中信泰富(0267)紅太子榮智健，成功收購美麗華酒店(0071)，連首席香港大孖沙及紅色資本第一紅人都可以砌低，四叔行情看漲，1995年曾經一度超越誠伯，成為FORBES有銀榜的華人首富。如果話美麗華酒店一役，誠伯及四叔都仲係良性競爭，1995年腸實及恒地，在馬鞍山兩大樓盤對撼，同時搶客散貨，就擺到明互砌，當年壹仔的壹仔封面，大字標題二李「決戰馬鞍山」。

商場上明刀明槍，已經唔係咁多，政治暗戰又有冇？

唔係冇，不過冇乜痕跡，又或者好多人都唔記得。

2003年港交所更改權益披露要求，持股5%的股東要公開身分，公眾赫然見到誠伯持有東方海外(0316)近10%股權，披露咗誠伯早在十幾廿年前，已經押注在董建華，不過當年的董伯伯，未成為「江握手」之前，只係一隻冇乜人留意的黑馬，八十年代尾九十年代初，問鼎首任特首大熱門人，叫做羅德丞（何東外孫），本來係港英陣營重量級人物，突然倒戈幫北京做嘢。

四叔向來俾人的感覺，不問政治，但當年羅德丞係恒地副主席（聽講四叔係羅德成老母契仔，即係大羅契細佬），大羅住四叔樓下（麥當奴道惠苑），大羅個「新香港聯盟」（當年梁振英係中堅份子之一）的麥當奴道會址，更加係四叔名下一口釘，友情價租俾大羅使用，雖則話四叔唔多出現「新香港聯盟」的活動，不過大家可以想像下，如果香港首任行政長官，唔係好好先生的董伯伯，而係行事霸道、深諳英國佬管治秘術兼情治陰謀的羅德丞，回歸後的香港管治，會唔會較為順暢，回歸之後，「李氏力場」又會唔會咁霸道？

好喇，歷史恩怨講完，到咗今時今日，除咗今日兩單李氏樓刁，仲有邊個戲棚，見到四叔及誠伯，喺度唱緊對台戲？答案係越搞越柒的佔領中環。

面對敏感的政治話題，四叔當然彩你都傻，唔會公開阿吱阿咗，不過好似當日同大羅的關係咁，唔高調出聲，唔代表冇落注。

今年三月人大兩會期間，四叔大仔家杰，平時木木納納，唔好話論政，在香港絕少浦頭見記者，以政協身份去到北京開會，據傳媒報道，竟然破天荒大鬧香港後生仔，「搞對抗」、「搞唔掂就將所有責任推到政府」，更加直拆揮舞「英國旗」的人「豈有此理」，最激一句，鬥埋佔領中環的人，是「想攬住香港一齊死」，心態唔好咁話。

有冇留意，由以前的港英二奶四萬陳師奶，到誠伯跟班霍建寧，以至好似四叔大仔的富二代，在香港唔多出聲，去到天子腳下，特別生猛多口水，好鍾意在北京酒店見記者？斷估班友的目標聽眾，唔係普通香港蟻民，而係北大人，北大人有心要聽的話，亦冇需要透過香港傳媒的二手料，而係直接現場原汁原味收音（偷聽），所以四叔大仔在北京的一席話，仲有四叔舊年去北京捐錢時接受香港傳媒訪問（見李氏樓刁第二集），其實已經算係交咗心。

當然啦，「一國」同「兩制」之間的拉扯抗迎，又點會只係誠伯同四叔的遊戲，九倉(0004)船王女婿吳乾淨，早日已經大大聲就佔中表咗態，近年在澳門跑到好出的銀河娛樂(0027)主席呂致和，亦都公開呼籲唔好阻人搵食，新世界純官去咗扶貧，好似個個都吼住誠伯首席大孖沙個位咁。

誠伯嗰邊，以前佢揸正牌做香港辦事人的時候，成日掛住咀邊一句，就係嫌香港事事太政治化，影響投資者信心、營商環境咁，無他的，「港人治港」的港人，由行政長官到港交所主席，個個都係自己友，李氏力場法力無邊，又有邊個想變，俾你都會大大聲講一國兩制港人治港係咪？

早幾個月腸實禾米記者會，例牌又係誠伯答問大會，有人問到誠伯，點睇佔領中環，誠伯個答案竟然係：冇好答案！呢個「冇好答案」的答案，嗱嗱嗱，去到呢啲位，財經茄哩啡唔識分析咁多，呢度借用咗佔中嗰位戴學者的說話，「首富李嘉誠日前無明言反對佔中是玄機所在，相信對方正採取觀望態度，一旦運動成勢，就有機會歸邊。」

咁係咪即係話，佔領中環呢個遊戲，等緊誠伯歸位，等住「主場」同「力場」滙流合體呢？

得閒再講。

關連文章:
1. 李氏樓刁（上）｜（中）｜（下）
2. 大話東北遊（下）

伸延閱讀:
1. 九倉吳光正: 佔中是與中央爭權
2. 恒地李家傑: 佔中如「攬住死」
3. 新世界純官: 佔中屬違法行為
4. 嘉華呂致和: 佔中礙繁榮不應支持
5. 香港倒後鏡: 末代貴族羅德丞

李氏樓刁（中）

上回講到，長實(0001)誠伯及恒地(0012)四叔，最近不約而同拋出兩單樓市大刁，一個破天荒拆售「闌尾級」酒店，一個可能將新界「環尾級」農地捐獻俾納稅人。兩個最有錢的李，兩單樓刁，一個摟屌，一個賣俏，可能代表咗「一國」及「兩制」之間你推我拉的兩股重要力量。

政府同腸實就拆售酒店單嘢開晒大拖之際，日月報忽然爆單大嘢，引述「接近李兆基消息人士」報道，四叔已經在農曆新年前，向政府建議在「環頭環尾」大搞面積300平方呎、樓價約100萬的上車盤，政府即時提出反建議，叫四叔不如將農地捐出，由政府興建廉價私樓咁話，「據悉四叔對捐地建議並不抗拒」，不過「堅持要以年輕人為協助對象」。

自從天匯單嘢之後，日月報同恒地關係有幾好，眾所久知，呢單捐地獻環尾的消息，十居其九係政府爆料，恒地發言人據報證實咗消息，近日更有傳媒報道，四叔已經整好份「捐地表」，俾政府任揀添，更妙者，隔離新世界發展(0017)亦表示，會「睇四叔頭」，決定未來係咪將部分囤積多年的新界農地嘔返出嚟。

所謂好人有好報， XIANGGANG大孖沙做善事，好少死錯人的，大家睇吓舊年特首換屆之後，新世界「SOLUTION」走咗去「扶貧」就知道乜事，又例如七十年代尾中國改革開放之始，誠伯一直唔肯在大陸大舉投資，不過捐錢就從未手軟。假如未來坐館要氹你心口，作為一個古惑仔，就算肉痛都要舉起五肢支持係咪？那些年中國共產黨要全方位同香港大資本家埋堆，唔少統戰動作聯誼活動，都由「善舉」而起。

舉個例，四叔最為人津津樂道的善舉，出現在1978年。話說現時跑馬地樂活道比華利山豪宅，當年叫做「簡氏別墅」，亦係培僑中學的舊校址所在，恒地買咗地皮重新發展，同時向政府投得天后廟道地皮，幫培僑中學重建新校，地價連建築費，恒地拍心口負責70%，等如捐咗二千萬幾萬港銀，當年長實一年純利都係1.3個億，可以想像，四叔「義助」培僑中學拆遷的「善舉」，有幾大手筆。

培僑中學校長何許人也，叫做吳康民， 2012年香港特首選舉之前，總理溫家寶突然親自召見康民叔，之後康民叔就發表咗特區政府新班子的「鐵三角論」，可見康民叔在中共的地位。據康民叔自己所講，在1978年的時候，佢親自多次同四叔講數，更加多次進言，大陸在中共十一大三中全會老鄧坐正兼正式啟動改革開放路線之後，「內地與香港均有美好前景，投資地產肯定有前途」，成功打動四叔「善舉」。（不過當時的新華社香港分社統戰部部長何銘思，亦即係後來霍英東身邊的紅人，對康民叔大發雷霆，話佢成日纏住四叔，「破壞他們所做的統戰工作」）呢個比華利山的動人故事，在康民叔及四叔的口爆自傳都有記錄，可以見到，為咗完成香港回歸祖國的統一大業，當年中共統戰陣線全方位向香港大孖沙傾斜，你有你統我有我統，齊齊善舉愛心爆棚。

四叔第一次擲出「環尾」農地起上車盤的建議，查實已經係舊年5月的事，當時梁振英隊冧唐唐成功上住做特首冇耐，哈，又係咪啱，四叔又係做善事，仲飛到北京咁遠，出席自己30年前創辦的「培華基金」的一個卡啦蘇捐錢活動。八十幾歲人飛嚟飛去，你估好玩咩，四叔在北京自咗邊個就唔知道喇，不過即時罕有咁接受咗香港兩三份財經報章的專訪，更罕有地就樓市政策指手劃腳，提出可以幫助香港人置業的三招政策，當時四叔的「開價」，係政府免農地補地價，等發展商起上車盤幫年青人置業，當時冇乜人留意，去到舊年底，四叔個農地免地價方案，公開又講得具體咗，300呎一個，每個100萬，唔少人先驚覺四叔想請大家食大茶飯，好喇，到政府同誠伯為咗酒店拆骨出售單嘢打晒拖，四叔叫價好似忽然大降，由免補地價，變咗捐獻農地。

以前港英政府要在新界發展新市鎮，你估先行部隊係乜？當然唔係寮仔部，而係政治部，搵人去新界收料放水，隻眼開隻眼閉，總之班鄉紳搞得搞班父老，最緊要冇人武裝起義（可以睇返羅亞本「政治部回憶錄」），今時今日政治部解散咗，老共有冇搵人做同一件事，唔知，不過政府今日要大搞新界大東北，唔通真係怕咗班香港八十後或者環保團體咩，最重要阻力，就係要講得掂大東北的大地主四叔。

就大東北計劃，政府而家話仲未決定，由政府收地發展，定係同發展商合作發展，查實早在舊年6月（即係四叔忽然訪京善舉後冇耐），當時仲做緊發展局局長的政務司司長林鄭月娥，曾經在立法會講講，預留400億元在大東北收地，取代公私營合作的模式。（政府收回大地主手上的農地自己發展新市鎮，有個極具爭議先例，見「大話東北遊（下）」）

四叔閹住大抽農地幾十年，就係等呢一舖，又點會咁易放過你，可能佢老人家聽到400個億都呆咗：咁少？！

計條簡單的婆毑數，恒地在新界東北有510萬呎農地，即係大東北計劃（2,852萬呎）的五份一左右，政府用400個億收地，恒地只係收返80個億。

好喇，如果按照四叔最開頭建議，免補地價由地產商發展，當佢3倍地積比率，510萬呎農地可以起到1,530萬呎樓面，300呎的單位，可以起到51,000個，每個賣100萬，可以收返510億。

當然啦，婆毑數還婆毑數，發展成本、市場轉角風險、政府收地拗數金額，樣樣都係變數，但係兩個唔同發展模式，邊個著數啲，好易睇得到。

下回再續。

關連文章:
1. 李氏樓刁（上）｜（中）｜（下）
2. 大話東北遊（下）

伸延閱讀:
1. 李兆基：向政府獻計三招助港人置業

李氏樓刁（上）

The Appendix of Apex (按圖放大)

牙痕，講幾句。

香港大孖沙界，唔少已經七張幾八張，新世界彤叔同埋澳門賭王，最近已經鮮有露臉少問世事，不過仲有一對活寶，仲好精靈，最近兩個星期，仲不約而同搞咗單大新聞添。

呢邊長實誠伯，失驚無神將間「闌尾級」的酒店分拆出售，擺明同政府挑機；嗰邊恒地(0012)四叔，你估佢唔到，慈善家上身，閹埋幾十年的農地，都話要捐啲「環頭環尾」出嚟，幫年青人上車咁。

兩個最有銀的「李」，兩單樓刁，一個摟屌，一個賣俏，放埋一齊睇，香港成個局，當堂立體咗唔少。

先講誠伯單刁。

長實間雍澄軒，三星級都唔知入唔入流，就算在腸實唔係咁出色的磚頭組合中，都只可以話屬於「闌尾級」的三四線物業，連改個無厘頭英文名「APEX」，都好有「APPENDIX」的味道，件嘢如果只係睇外表，唔講仲以為係「腸乾屎頓凸」又一發水住宅杰作，一個酒店則搞成咁，一望就知有古怪，查實早在2004年，長實曾經向地政總署申請預售樓花（當日新聞報道），不過即時俾人屌到開巷，最後拆骨出售計劃無痴而終（到前年申請埋分契，政府冇理由唔知誠伯想做乜）。

誠伯乖咗唔夠幾年，早兩個星期超人硬上弓，將件嘢拎出嚟賣。當日銀行可以成功老滾散戶「迷債」係「債」，不過香港人炒磚頭大半個世紀，你同佢哋講「酒店」係「住宅」，就唔係個個接受到，樓刁出街，主動摟屌，誠伯腸實自然被人屌到反肚。

通常涉及誠伯的新聞，又在香港炒到好大件事的話，鬼佬傳媒多數會跟進，不過呢單嘢香港炒到打使咁，國際傳媒幾乎冇提及，在鬼佬眼中，可能覺得明明一個好普通又合法的商業動作，唔明白點解香港人會炒到咁大鑊。將酒店分拆出售，無論係「公寓式酒店」又好，「酒店式公寓」都好，在外國都普遍過普遍，普遍到2006年，DONALD TRUMP喺佢個電目THE APPRENTICE裡面，宣布自己公司TRUMP SOHO的計劃（最後項目幾乎爛尾，有買家更加以「銷售誤導」為由，將DONALD TRUMP公司告上法庭，此乃後話）。

好喇，既然分拆酒店出售咁普遍，香港人點解又覺得腸實條APEX咁大碌？

好簡單咁講，磚頭市場作為香港經濟支持幾十年，香港（及內地）投資者，又係出咗名鐘意炒磚頭，但係香港房地產市場的創意，近乎零。講條春咩，俾你做地產商，撓起兩隻手可以年復一年咁賺到底褲都著唔落、肥到屙尿睇唔到條撚，仲要肥田冇人爭冇競爭，又點使搲爆頭諗吓類似「TIMESHARE」、「CROWD-FUNDING」的另類物業發展模式，所有創意，咪去晒起發水樓賣縮水樓，點樣「賣樓送窗台」咁，香港人咪一路以為酒店就係酒店，住宅就係住宅，未見識過中間其實有好多「CROSSOVER」的彈性囉，所以今次誠伯查實用心良苦，做緊一場香港地政界好耐冇人肯做的投資者教育。

唔少人話腸實向政府挑機、宣戰，以特首梁振英（測量師行老闆）及政務司司長林鄭月娥（前發展局局長）最熟悉的題目，兜巴刮返政府一二號人物，不過誠伯呢鋪牌最高章之處，查實係打咗張表面好毒但查實又好正的牌，令下家都唔知上唔上佢好。

而家政府唔係冇錢，而係日九日呻冇地起樓，搞到要填海開山鑽地洞，撚嚟撚去都話幾年後先有土地供應，好喇，誠伯在腸實求其扯條「闌尾」級酒店出嚟，已經有幾百個單位，聽講腸實擁有類似地契條款的酒店單位（冇規定唔可以拆骨出售），超過四千個，全香港加埋（一路冇人問政府有幾多個類似酒店項目、有幾多單位），分分鐘有十萬八萬個，如果政府肯接受呢個「酒店」及「住宅」中間的灰色地帶，隻眼開隻眼閉，即時有大量住宅單位供應，土地用途用「酒店」變成「住宅」，發展商當然賺到笑，但可以解決到冇地起樓的燃眉之急，發展局膠波局長亦唔需要咁頭痕。

當然啦，如果出現呢個咁政策轉向，間間酒店變晒「酒店公寓」或「公寓酒店」，班自由行住邊先？財經茄哩啡忽發奇想，誠伯出得呢一招，用心良苦，潛台辭唔通係希望香港政府反思一下，自由行實施十年，係咪時候剎吓車？講得白啲，誠伯呢單樓刁，查實話俾大家知，如果唔係自由行，唔會咁多市區土地變咗酒店，市區土地供應亦唔會咁緊張；講大一啲，就係香港同中國關係，唔通，誠伯對於中港融合的大趨勢及速度，好有意見，咁願摟屌，亦要借呢單樓刁帶起香港人的討論？

所謂「中港融合」，查實亦有好多其他辭彙，例如「同化」、「兩制變一國」咁，最多香港人最易理解，最易感受到磨擦衝突的政策，一個叫自由行，一個叫新界東北，講到呢度，就係四叔出場的時候，四叔的樓刁，同誠伯單嘢，朝完全唔同的方向推進，下回再續。

關連文章:
1. 李氏樓刁（上）｜（中）｜（下）
2. 買褲送褲袋（上）｜（下）