📖 ZKIZ Archives

仍在上映的電影《竊聽風雲2》叫 好叫座，很多看過該戲的觀眾，皆指曾江飾演的股壇大鱷，角色設計參照港交所創會主席李福兆而來。李福兆出身香港的世家望族，家族成員皆是不同界別的顯赫人 物，而他更親手創辦聯交所，可惜八八年因貪污鋃鐺入獄。出獄後李福兆在泰國隱居十七年，雖然鮮有返港，但八十二歲的他，對香港金融界的人和事亦掌握透徹。 記者走訪曼谷，與李福兆侃侃而談，他仍老馬有火，破口大罵港交所延長交易時間是狗屁不通，說到其姪兒李國寶管理的東亞銀行，批評「皮費過重」，意指董事收 取豐厚花紅。說到興起，又要求不要透露是他所說，硬要記者說另有渠道「聽」回來。呢次，如假包換是竊聽風雲。

在整個訪問過程中，李福兆不下七八次講以下說話：「lan仔，我都八十幾歲咯，油盡燈滅，說話唔會有人理。我講好多猛料你知，你 當自己聽返嚟，咁你咪叻仔囉！」於是乎，記者好像竊聽老人家細說風雲，但另一邊廂，卻又容許記者錄音作實。李福兆定居曼谷多年，每朝起床便與香港的銀行家 傾電話，對方定期空郵香港最新的報紙雜誌給他，「最近香港政府派六千蚊，根本就唔應該，啲錢食兩餐飯就冇晒，更為未來政府帶來沉重壓力，唔俾實俾人嘈，倒 不如將筆錢發展基建。

港交所

他關注香港，其中親手創立的聯交所，更非常留意，主動提到上月有黑客入侵披露易網站，造成多隻股票停牌，他認為只屬小事，經一事便長一智；相反延長交易時 間卻是「狗屁不通」。「講交易所，我一定係權威！延長交易時間，目的是希望增加成交額，但到頭嚟成交反而縮咗，證明領導層掌握唔到情況。其實交易所好似跑 馬地賽馬，出閘頭一段肯定會衝一段，成交多啲，中段時間就留力，直到臨近終點又再發力衝刺。延長交易時間簡直幫倒忙，得個半鐘頭食飯，邊夠時間請大客食 lunch搵生意。港交所見到新加坡延長交易時間，所以腳軟照跟，其實我有獨步單方，保證可以增加成交額。」問他有什麼好橋，他不肯透露；記者假設港交所 管理層前來討教呢？他想也不想，立即回覆：「除非佢哋肯跪低求我啦！」

東亞銀行

聽到這句，一時之間記者也不懂得怎樣反應，嘗試轉移話題，見到茶几放了大堆香港報紙雜誌，醒起他剛剛提到是銀行家寄來，以為是其姪李國寶管理的東亞銀行， 豈料又換來冷言：「佢哋邊度有咁好心。」李福兆的父親李冠春，九十多年前與簡東浦創辦東亞銀行，近數十年一直由李家後人掌控東亞， 其父亦留下不少股份給他，惟他強調從未擔任東亞管理層，「東亞的皮費係全港銀行之中最貴，我都唔明點解， 唯一優點是大陸有好多分行。」翻查資料，李國寶○九年薪酬達五千七百萬元，被小股東炮轟人工太高，去年才減薪至三千萬元，仍較同年滙豐大班鄭海泉的薪酬二 千五百多萬元為多。近年國浩集團不斷吸納東亞股份，現時持股量逾一成二，有傳國浩希望進一步增持，打算向股權散落的李家後人逐個洽談收購。李福兆表示從未 收到國浩聯絡，即使對方真的出價，也斷然拒絕，「啲股份係祖宗留落，點都唔會賣。」不過，他承認與姪兒李國寶沒甚接觸，往來最多的親人，算是年紀相若的三 哥李福慶；○六年以李福慶命名的中學成立，他也專程返港撐場。李福兆出身名門望族，是家中么子，另有三兄八姊，故又有人稱他做「十二少」，特別受父親李冠 春疼愛，六歲已開始買股票，造就他對股票情有獨鍾。大學畢業後返港成立會計師樓，曾替多間公司籌備上市，但當年全港只有香港會一間交易所，對方表示事忙， 未能處理這些「股仔」，自認唔好老脾的李福兆，遂於六九年與兄長李福慶及王啟銘創立遠東交易所，打破單一交易所的局面，至今仍被證券界人士尊稱為「校 長」。

停市入獄

李福兆最令人記得的一幕，是八七年環球爆發股災，身為聯交所主席的他，宣布停市四天，有外國記者質疑停市關乎其個人利益，令他龍顏大怒，拍枱鬧該名記者： 「這是誹謗！你叫什麼名字？我現在就給你一張傳票！」即使三十多年後，他仍堅持停市是正確決定，「當年成交好大，行家之間習慣了交收不準時，假如不停市， 大部分停市前買了貨的股民，會輸了唔認賬，變得由經紀孭飛負責，經紀焗住斬倉，形成雪球效應，銀行隨時都執幾間。停市可以暫時止血，我命令所有經紀呢幾日 要如常返工，到交易所為以前的買賣進行交收。」他重申自己沒有就決定停市，有任何得益。而停市後翌年，李福兆被廉署拘捕，指他在審核公司上市過程中，非法 收受新上市公司配售的股份，從中獲利八十七萬元，最終入獄四年，後來因行為良好獲減刑，前後坐監三十二個月。他至今從未有向外講述這件事，僅輕輕以政治因 素帶過，說時面容嚴肅起來，「政治好黑暗，講出來，只會被外界覺得我自己幫自己講好說話。」據一名同樣長居曼谷的李福兆朋友所說，李福兆已寫下有關當年入 獄前後發生的事，並放在保險箱內，有待百年歸老後才會曝光。

朋友敵人

出獄之後，他兩夫婦定居曼谷，遠離香港這是非地，「我份人講嘢直得滯，得罪好多人，所以唔肯多返香港，費事眼寃。」他不肯講清楚誰是仇家，但有其朋友表 示，粉嶺高爾夫球會視李福兆為不受歡迎人物，曾有球會會員與李福兆前來打波，翌日便收到球會通知，要他不准再帶李來。李福兆極好打高爾夫球，未知是否因此 長駐曼谷，現時每星期例必打三場波，「每次打足十八個洞，一打便四個鐘頭。」撇開仇家，他其實也有不少老友在香港，由李福兆親自引薦做遠東交易所董事的李 和聲，更向本刊記者表示李福兆坐監是寃獄，希望記者代為平反。至於首富李嘉誠，原來亦與他感情深厚。七十年代，李福兆腰背常有疾痛，看了多名醫生仍未治 癒，李嘉誠知道後，親自帶他到一名隱居於香港的韓國醫師處針灸。「就算早兩年我返香港，去長江中心探KS（李嘉誠），佢都好客氣，親自在lift口接我。」

泰國生活

正所謂三歲定八十，李福兆自小開始沾手股票，如今仍緊貼大市，「我由朝睇到晚，早上留意港股，然後打波，臨瞓前會睇美股開市，現時比較睇好黃金白銀。」他現時所住的大廈，全屬自己所有，與太太居於其中一個單位，其餘用作收租，「原本我打算買大屋，但年紀大啦，始終多啲鄰居會好啲，而且大廈由我的員工負責管理，有起事都容易搵人幫忙。」三年前，他再以現金港幣約八千萬元，在曼谷興建了一幢迷你酒店，「生意仔玩吓啫，之前紅衫軍混亂，曼谷幾乎死寂，就算四季酒店，都只係得四間房入住。」記者問他既然泰國近年政局反覆，何不返港定居，他笑言不會了，早已視曼谷為家，更懂得說簡單的泰文。就算太太今年返港十天度中秋，他也不願回港，情願約友人打高爾夫球。

呢幾日香港「佔中」嘅情況，係無人估計得到；真正如火如荼，股市大幅震盪。小宗本週一搵來「股壇教父」、見證過多次港股風浪嘅李福兆詢問，他直指對股市的影響「很大」。他表示，每年十月都多數是淡季，佔中啟動，可說是「雪上加霜」。

全世界人都有影響，唔單只我，除非完全不揸股票！」李福兆認為，反對佔中不會有成效。「普選唔到你講，《基本法》、人大定咗，中央實唔會變，你做乜嘢，都不會改。」他對梁振英應否下台不予置評，但指現時亂局會為香港帶來損失：「香港是金融中心，有國際市場，搞衰咗佢，全香港人都受害。」對於恒指後市，李福兆承認暫時睇唔通：「要睇耐啲先知，最好係以不變應萬變。」

Joyce Ma女婿好猛料

老牌百貨公司先施的第三代掌舵人馬景華月初逝世，並於本週二舉行安息禮拜。馬景華最為人熟悉嘅係佢喺七Ｏ年同老婆郭志清（即係Joyce Ma），創立時裝王國Joyce Boutique。Giorgio Armani、Dolce＆ Gabbana、Hugo Boss等國際一線名牌全部係由Joyce引入本地。兩公婆只得兩名女兒美域及美儀，其中長女嘅老公，原來就係何添細仔何厚鏘（Norman）。Norman活躍於金融界，唔係時裝圈人士，所以無乜人知Joyce Ma有個咁猛料嘅女婿。本身係會計師嘅Norman，同何厚鏵係堂兄弟，又係何添私人旗艦公司德鴻集團嘅揸弗人，睇住約百億資產之餘，近年同彤叔掌櫃魯連城及誠哥頭馬陳國強經常拍住搵食，蒙古能源、海通證券、第一視頻、德祥地產等殼股都曾留下腳毛，如今仍任執董嘅Vision Values，又係由魯連城任主席，年初炒作過一輪，近期又歸於平靜，不過，根據往績結局都會係賣殼喇。

《文匯報》記者處處都在

毛主席要超英趕美，強國貴為當今天下第二大經濟體，革命可謂成功咗一半矣。咁另一半又點呢？冇有怕。只要十三億同胞發揮黨的喉舌《文匯報》「記者杜法祖」無處不在、處處都在嘅本事，爬花旗頭指日可待也。何以見得？你睇，同一日，藍田躁翁淋鏹水由「記者杜法祖」跟，法庭審肥龍又係佢跟，此外審反東北滋事分子、警長英文差、大專生傷人、樊偉軍打假波、龕場告地政署都係佢跟，但咁都唔止喎，佢仲跟埋深水埗班南亞漢群毆，以一敵九。十三億人個個學得杜法祖呢位記者哥哥咁，強國真係經濟唔起飛都難也！

中環寸嘴

楊國佳K.K. Yeung工廈大王楊耀松大仔，家族的收租物業，遍布港九，屬正牌收租公。自認寸得起，謂「有我咁得閒，無我咁有錢；有我咁有錢，又無我咁得閒」，經常流連富豪飯堂品嘗美食，仲喜歡到新開食肆「踢竇」試新菜。

中藥港到善終一條龍

寸嘴楊我今期無心情搵食，週日落咗去金鐘感受吓學生嘅氣氛；香港真係不×知所謂，之前睇報紙話老董成立個智庫，為香港未來十年road map策劃，嘩！香港係咪無人呀？愈玩愈老，個榮譽顧問饒宗頤九十七歲，名單仲有八十五歲嘅楊鐵樑，最後生嗰件梁錦松都六十二歲啦，人民銀行行長周小川六張幾咋，都話要退休啦，我哋咪同中央對着幹？老董嗰時搞嘅中藥港拉咗柴，呢班智庫可以再搞個人瑞中心以及殯儀中心，善終服務一條龍吖，笨！嗱，人人話香港係福地，所謂福蔭子孫，吸引吓啲人葬喺香港，大時大節，清明、重陽等啲人來香港拜山，咁智庫班友得閒又搞吓「千歲宴」，刺激吓消費囉。當年霍英東帶團去佢南沙考察，去到睇到個開荒咁嘅環境，喺佢眼中，我仲係僆仔，同佢老前輩講：「呢度無雞叫，搞唔起喎！」佢聽到頭耷耷，老霍唔聽我點，南沙夢依家咪飲恨……。我最憎搵啲「老嘢」嚟壓住啲僆，我啲嘢，聽落戇×，嗒落有味。睇到班學生企出嚟感同身受，呢班係香港精英嚟o架！梁振英當人哋LuLu，侮辱人智慧話受到煽動；大學生而家可以講無前途，有嘢做儲唔到首期都供唔到樓，公屋又無資格攞，計我話邊個做特首都無問題，honour個八萬五就掂啦。今年九月閏月，古時重九登高係為避難，今鋪要避難兩次，後市不容樂觀。

金牙大狀講嘢朗尼陳夠晒市儈

超級梁粉朗尼‧陳啟宗繼續撐689（搵勻全香港冇第二個似得佢咁有正氣、咁有能力，end of quote），進而鞭撻佔中，話大陸「俾你發達你唔要，仲要踢人上下五寸。」三個手無寸鐵嘅書生有冇咁狼死呀？聽講朗尼係教徒，而且諗過做牧師，咁佢肯定聽過呢句馬太福音：「人若賺得全世界，賠上自己的生命，有什麼益處呢？人還能拿什麼換生命呢？」（16：26）佢兩兄弟一次過捐咗差唔多成三十億銀俾哈佛，點都唔似係發錢寒嘅人，但把口又何其市儈也。況且佔中為咗乜啫？極其量要班人說話要算數、做人要有口齒之嘛，請問《聖經》上邊度話咁樣做係有罪先？

中環人語迷你版

侫佔領中環正式啟動侫估中邊個中環人講呢句說話，送你JWatch J-33藍寶石鏡面限定版手錶一隻有意參加者，請於十月一日（星期三）下午一時後，將答案、姓名及聯絡電話電郵至[email protected]小宗只接受電郵，郵寄免問。

上週人語揭曉

侫即使你只是想來觀禮，也是無任歡迎。侫答案：戴耀廷得獎者：葉劍迅中獎時間：1:00pm 24/9/14本刊員工及直系親屬不得參加。為求公平及杜絕偷步搶答起見，請於每個星期三下午一時後來電郵競猜答案；在此之前發出之電郵作廢。超過一位讀者估中，先到先得，恕不接受上訴。答案及中獎者姓名將於下期本欄揭曉。

廣告時間

你有某財團嘅黑幕想爆？你知邊間上市公司造假？你仲想舉報地產霸權嘅不公？歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！爆料熱線/whatsapp:6829 5929