網上街市土炮靚料送上門
1 :
GS(14)@2010-09-05 23:01:562010-9-2 NM
今晚想入廚炮製大餐，卻沒時間落街買靚料？或者一想到濕滑腥臭的街市就怕怕？傳統北角春秧街街市，有一個很「潮」的街市佬鍾耀華，將客人的不便轉換為商機。由他一手打造的「摩登街市」 ——和平優鮮店，將街市變「網市」，新鮮豬肉、嘉美雞、瓜菜通通可以網上訂購，即日速遞上門。
劏雞佬出身，偏偏遇上活雞業式微。○八年，四十五歲的鍾耀華說服經營本地豬場及雞場的羅柱康入股做靠山，將經營半世紀的家族雞檔轉型，主攻本地製造的農產品，門市、網站雙線發展。捱過拍烏蠅、入錯貨的蝕本期，過去一年終於有錢賺，各股東已磨拳擦掌籌備開分店，進攻九龍市場。
上週五下午一點，住在香港仔海怡半島的徐太，悠閒地在家看電視。「叮噹！」門鐘響起，徐太看一下牆上的鐘，心忖：「應該是送菜來了，真準時。」開門，果然是和平優鮮店的送貨員。一手交錢一手交貨，今天買了豬排骨、半隻嘉美雞及豆卜，剛好二百八十元。半年前，徐太在朋友介紹下，開始幫襯和平優鮮店。 「先去鋪頭睇過一次，見佢賣嘅豬、雞及醬料等，都係經過驗證嘅本地貨。我一向唔鍾意行街市，又濕又熱，而家早上九點打電話落單，中午就送到了，每星期都會幫襯一、兩次，有時會一次過買定兩、三日的餸。」徐太說。
一站式網上街市
「嘉美雞、烏頭……幾時要？下午？冇問題……」鍾耀華開工時一直戴着藍牙耳機，親自接聽電話訂單。「豬扒？唔好意思，賣晒啦，聽日呀……」收線後，鍾耀華興致勃勃地走到收銀機旁的電腦，打開公司的新網頁介紹道：「仲未整好o架，全部相都重新影過，多咗好多貨。」網頁內，豬的各個部位、各種鮮雞、魚、菜及糧油雜貨等，均圖文並茂，分門別類，有齊名稱及價錢。港島、九龍及新界（除屯門外）分別買滿百五、二百及三百元，就免費送貨。店鋪每月用兩萬元，以外判形式包下一部客貨車及一部電單車送貨，中午十二時前訂貨，下午就可送上門，收貨時才找數。
街市檔口到處是平價「內地貨」，和平優鮮店以近年買少見少的土炮新鮮菜、肉做賣點。其中，獨家售賣的健營豬最受歡迎，一斤瘦肉賣四十八元，比普通豬貴四成，仍其門若市，佔生意額五至六成。「健營豬冇吃激素或減肥藥等，豬肉煮熟後沒有『騷』味，但瘦肉比例只有六成，比普通豬的八成低。」身材高大，穿着圍裙的鍾耀華，看起來像個「豬肉佬」，但其實不會「斬豬肉」，用二萬元請了個正牌豬肉佬。「斬豬肉都係一門手藝，所以人工好貴，我大哥學緊啦。」鍾耀華指着身材樣貌跟他有八成似的大哥說。
店鋪熱賣第二位是鮮雞，有嘉美雞、石岐雞，以及冰鮮的音樂雞等，售價由七十到一百五十元不等，比街市普通的鮮雞高出四成幾。「平均一日可以賣出兩隻豬，一百五十隻雞，毛利都係三成左右。」鍾耀華表示，時值暑假，不少中產熟客離港度假，加上新網頁剛推出，網上生意略跌，但仍佔生意額超過四成。
撞板多過吃飯
在平民街市賣貴價貨，鍾耀華坦言店鋪開業頭兩個月十分冷清。「好多街坊都接受唔到，日日拍烏蠅，試過半隻豬兩日都賣唔去。」當日的艱辛，現在說起已一笑帶過。「不斷同客人解釋健營豬嘅優點，賣不去寧願蝕本價清貨，甚至免費送俾客試食，講冇用，一定要俾佢哋吃過，先知唔同。」另外，鍾耀華還在港島區地鐵站派傳單，及在筲箕灣到西環的小巴線上做了一年半的車身廣告。
當時，不但濕貨滯銷，店內的乾貨亦無人問津。「我淨係識賣雞，唔識入貨，入過家樂牌雞粉、史雲生雞湯、韓國杯麵，但攞貨少，唔夠超市平，最後要用成本價傾銷。」鍾耀華笑着自嘲道：「初時真係撞板多過吃飯。」直至見到本地健營豬開始有客路，便索性連乾貨也以香港製造做賣點。
鍾耀華透過上網及翻閱雜誌，捐窿捐罅搜羅本土品牌。「睇《飲食男女》、《新假期》等，仲有蘇絲黃、高師傅的飲食節目，搵佢哋推介啲醬料。呢隻檳城麻油阿蘇成日講，其他如頤和園及大孖牌醬料、元朗康寧牛奶等，都係咁搵返來。」鍾耀華在店內貼滿雜誌介紹產品的剪報，甚至阿蘇的照片。「雜誌講一句好過我講十句，有客人以為阿蘇來過添。」鍾耀華表示，他入貨都用現金即時找數，所以大部分品牌都肯供貨，沒有限量。至於定價，一般較city'super略低，由於入貨少，毛利只有約三成。
大膽變通化危為機
捱過大半年的蝕本期，和平優鮮店才有錢賺，現時每月扣除鍾氏兩兄弟的人工後，已有三萬元盈利，大部分顧客都是來自中產屋苑，如附近的寶馬山花園、康怡，甚至紅磡海名軒等。「我嘅客戶都係唔鍾意或冇時間去街市買餸嘅中產階層，佢哋對食材有要求，亦消費得起。」鍾耀華表示，有熟客於○四年，他創立網上「每日鮮雞速遞」時，已開始幫襯。
「有次見到個菲傭來買雞，攞住電話影來影去，原來係影俾女主人睇，再決定買邊隻雞。」當時鍾耀華靈機一觸，與推廣網站天天有魚合作，推出網上訂購鮮雞服務，並效法pizza店，用電單車送貨，反應出奇熱烈。「一隻龍崗雞，網上價比街市貴三、四成，都有唔少熟客訂購，報紙、雜誌都走來訪問我。」鍾耀華說。直至兩年前，政府回收雞牌，並要求「活雞日日清」，業內怨聲載道，鍾耀華幾番掙扎後，以一百二十萬出售雞牌予政府，將雞檔轉型。「（禽流感）爆發一次就冇人買雞，但市民不食雞，都會食豬，不食豬，都要食菜吧。」這個想法得到健營豬供應商羅柱康的支持，二人遂合資七十萬，開設和平優鮮店。
早前，另一個投資者黃志毅主動加盟，與羅柱康合資開設只做網上速遞的「和平優鮮餸」。「嚟緊兩間店會合併，我哋發覺淨係做網上唔可行，客人一定要先到鋪頭睇過摸過，有信心先會選擇網上訂購。」鍾耀華表示。上週五，他們剛與長實簽訂租約，租下美孚盈暉臺商場的鋪面，分店將於十月開張，到時會加入急凍海產。「做生意不能一味死咕咕，要試吓又變吓，變吓又試吓。」看起來憨厚老實的鍾耀華最喜歡將這句話掛在口邊。
開業資料（08年11月）
租金*︰$150,000
裝修△︰$470,000
入貨︰$50,000
人工︰$20,000
雜費︰$30,000
總投資︰$720,000
*兩個月按金，一個月上期
△包括添置器具：$170,000
營業資料 （10年7月）
營業額︰$450,000
入貨︰$270,000
租金︰$50,000
人工#︰$80,000
雜費︰$20,000
盈利︰$30,000
#包括鍾氏兩兄弟人工共$30,000
一點意見
1. 年輕一代只會去超市，不喜歡落街市，一站式網上街市有得做，但現時店內的濕貨種類不夠多，如魚類只有烏頭，可考慮向售賣本地天然飼養魚的魚販譚強入貨。另外，要加入家常菜常用的牛肉，令不同顧客都可以一次過買齊所需餸菜，不需要再去街市。
2. 針對師奶客，產品包裝要有大大個健康驗證嘜頭，增加信心。另外，師奶大多有種「大人唔捨得食，都要買俾小朋友吃」的心態，可增加針對小朋友的優質食材，如日本蔬果及雞蛋等。
3. 可為店內的王牌產品提供簡單的食譜，甚至可考慮在店內即場烹煮予客人試食，食物香氣亦可提升購買慾。
麥麗敏
著名食譜作家江獻珠首徒，人稱大師姐，精通本地優質食材，著有《全港食材最強》及《要省，不如不吃》等，曾幫襯和平優鮮店。