【add】紅人主場：吳君如舞台插班生
1 :
GS(14)@2015-05-28 21:09:40Lanvin白色silk top藍色半截長裙Love金色頸鏈
要數香港喜劇女王，非吳君如莫屬，由《家有囍事》中的程大嫂，到近年《金雞sss》中的38G巨胸阿金、《12金鴨》騷人魚線的鴨界萬人迷Future哥。君如沒有玉女包袱，演戲更加收放自如，入行超過30年的她今年8月就首次挑戰演舞台劇，做舞台初哥，金馬影后更放下身段再培訓，繼續發揮搞笑本色，「我想挑戰同增值吓自己，有難度先好玩，如果唔係做嚟做乜！」統籌：林妙萍撰文及造型：顏英儀攝影：周樂恒化妝：Midco Chu髮型：Seiko Sin of Hip Hair Culture
入娛樂圈超過30年的吳君如，拍過無數電視劇和電影，出過唱片、電台開咪做主持，甚至棟篤笑都做過，唯獨是未試過舞台劇，8月她將首次演出舞台劇《狂揪夫妻》，君如說：「首次接舞台劇都要克服心理關口，首先排練時間長又唔係搵好多錢，感覺好負面，不過上咗個幾月堂，學習肢體語言、發音，舞台上嘅即時反應同拍電影好唔同，好有滿足感，今次合作嘅演員喺舞台劇都係神級演員，我想挑戰同增值吓自己，有難度先好玩，如果唔係做嚟做乜！」君如透露與黃秋生劇中做夫婦：「秋生佢好神化，好有性格，我識佢太耐知道點同佢相處，都唔會有太大壓力，我係舞台劇初哥冇得輸，秋生平時兇神惡煞又威武，今次就做俾我控制嘅小男人，Peter（老公陳可辛）都好支持我演呢套舞台劇，因為佢好鍾意電影版，話套劇好正，叫我做。」
■入行超過30年的吳君如首次涉足舞台劇，繼續搞笑。
■《12金鴨》反串扮Future哥。
■吳君如於《家有囍事》中的程大嫂造型，深入民心。
陳可辛話晒事
舞台劇講夫婦矛盾，君如外表強悍搞笑，大多數人會以為她會是大女人，不過現實生活卻是個小女人，「屋企冇話邊個話事，大家互相影響，生活上嘅細節當然唔會夾到，佢鍾意大魚大肉，我就鍾意清淡，會攞個平衡，但邊個話事，我覺得傳統嚟講最終都會畀佢話事，呢個係傳統模式，亦唔想改變，我覺得做個小女人幾好，好過做大女人，有時我哋芝麻綠豆都會研究一餐，乜都傾，某程度上關係最好就係咁維繫，無論大生意，其實聽唔明又傾，甚至乎一條魚、一粒豆都傾，不過有啲嘢就唔好踩到對方底線，有時over咗，一個眼神就知乜事，咁多年相處一齊磨合，都要互相遷就。」談到教育9歲的女兒陳是知，君如會跟陳可辛一齊傾，「教育同整車唔同，冇一本menu跟住啲步驟，每日面對嘅問題都唔同，所以要見招拆招，都會同自己講放鬆啲，我明白家長有好多寄望喺仔女身上，我自己就有底線，一定唔可以侵犯到日常生活同工作，例如明明要拍戲，我就為個女唔拍戲走去報8個課程，加上侵犯到小朋友嘅生活就唔係太好。」
Roksanda粉紅色背心裙/MATCHESFASION.COM
BOSS乾濕褸Tod's白色背心黃色西褲米色高踭涼鞋
女兒怕醜霸道
最近有電影公司將投資超過一億元籌拍傳記式電影《李娜》，找陳可辛做導演，君如即向老公推薦女兒做李娜的童年，她說：「嗰日見佢（陳可辛）畀記者問好煩惱，我見李娜性格好剛強，又霸氣，阿女都好霸道有呢個特質，我講笑話叫阿女做李娜童年。其實我個女好怕醜，我哋平日都會試探問佢做想唔想做戲，而家佢打死都唔肯做，不過我哋就不斷叫佢做，同佢講有乜理由阿爸係導演，媽咪喺演員，個女唔做戲？不過佢就『No』，人有個反叛心，你越叫佢做就偏偏唔做，可能有一日我覺得佢好有條件，我會諗盡辦法捧佢做超級巨星，但又唔會太鼓勵，等佢大個自己決定。」君如跟導演陳可辛一起接近20年，愛情馬拉松，雖然沒有註冊結婚，卻是圈中被認定的一對，早前君如的《12金鴨》電影首映時，陳可辛送上12卡巨鑽，到底何時結束愛情長跑？「我又唔使向人交代，又唔使同父母交代，女都生埋，如果有一日諗到一個好型嘅方法註冊，我會，大家唔使再替我擔心，啲雜誌成日話我始終都冇一個名份，我就覺得咁樣好型！哈哈哈！」
■童年李娜（圖）與陳是知有幾份相似。
■吳君如與陳可辛一起已有廿年，兩人育有女兒陳是知。
■近日以夫妻檔為珠寶品牌拍廣告。
《狂揪夫妻》講夫妻矛盾
將於8月在香港演藝學院歌劇院上演的舞台劇《狂揪夫妻》，是改編自法國著名得獎編劇Yasmina Reza的得獎作品《God of Carnage》，吳君如首次擔綱演出舞台劇，演員還有黃秋生、甄詠蓓和潘燦良，君如繼續其搞笑本色：「故事講述兩個家庭嘅父母因兒子打鬥受傷，兩對夫妻就相約商討解決辦法，點知漸漸暴露兩對夫妻之間嘅種種矛盾同問題，總之套劇有動作又搞笑，每個角色都有唔同層次。」
■《狂揪夫妻》改編自法國著名得獎編劇Yasmina Reza的得獎作品《God of Carnage》。
■君如跟黃秋生多年來合作無間，今次將於舞台擦出新火花。
更多精采時尚內容，盡在
http://add.appledaily.com。
來源:
http://hk.apple.nextmedia.com/entertainment/art/20150528/19162628