飛甩潘源良冇留戀李麗珍慳皮陪女長住加拿大
1 :
GS(14)@2017-02-12 15:22:492017-01-19 NM
與許愿離婚後，李麗珍07年跟離合多次的男友填詞人潘源良再復合，可惜一直未被女兒許倚榕接受，去年六月，二人宣布第四度分手。失去潘源良每月十萬生活費資助，李麗珍慳得就慳，由貝沙灣搬到黎耀祥老婆平租給她的深井碧堤半島單位；她在香港再沒留戀，上週決啟程飛加拿大，在當地長住陪女。平租視帝屋
上週四（一月十二日）下午，天氣回暖，仍著住長身羽絨的李麗珍，推住兩個大喼，一個人出現機場。跟潘源良分手超過半年，心情未完全平復的李麗珍雖然精神不錯，但身形腫脹，大了接近一個碼；辦完check in手續後，她便排隊入閘。「佢同阿潘（潘源良）一齊時，每個月有十萬蚊零用，除咗交租，珍妹基本開支唔算大，分手後冇咗呢筆錢，佢唔係成日開工，甚至一年都拍唔到一部戲，貝沙灣咁貴租，唔化算。知道舊同學Julia（黎耀祥老婆）喺深井碧堤半島個單位放租，珍妹就搬咗過去住。Julia同珍妹識咗好多年，又做過佢助手，係以低過巿價好多嘅價錢平租俾佢。」知情者說。
不積極復出
好偶然才接戲的李麗珍，女兒許倚榕一三年到加拿大升學後，她正式復出幕前，接拍好友曾志偉監製的大台劇《M Club》，以及在電影《紀念日》跟舊拍檔邵仲衡做夫妻。不過李麗珍不積極於搵銀，就算劇集受歡迎，《M Club》幾個中女人氣急升，大把登台騷拍門，她都是推的多，甚至試過以病為由，臨時甩底。
復合又分手
事業冇野心，但戀愛大過天的李麗珍，前年一度傳出會再婚做潘太，其時，潘源良亦公開承認珍妹已經是家人；去年六月，她突然決定，跟拍拖再九年的潘源良斬䌫。「甩咗阿潘，珍妹心情一直都係麻麻，佢兩個人唔同性格，成日嗌交夾唔到，但又好愛！同阿潘咁多年都係復合分手又復合分手，好難一時間放低。啱啱甩拖嗰陣，佢都會搵朋友陪周圍飛散心，不過大家都唔可以成日陪住佢，所以珍妹覺得最好都係飛去加拿大，同個女一齊生活。佢兩母女感情好好，咁做亦可以慳番好多，起碼唔使俾多份租。」
長住陪女讀書
其實當年李麗珍以百萬酬勞拍全裸寫真集及拍了三部三級片，目的也是賺錢，安排家人移民加拿大。「珍妹係宅女，平日匿喺屋企睇戲睇書唔多出街，都幾啱喺加拿大嗰邊生活。如果真係有job要返香港開工，隨時可以飛返嚟，好方便。」身邊人說。李麗珍入閘前，記者上前問她是否留在加拿大長住。「我陪個女讀書，佢返（香港）我咪返囉！佢好多假（期）嘅。（近期有冇接戲？）啱啱拍完兩部。」李麗珍說。
30歲炒樓賺千七萬
寫真天價100萬李麗珍14歲被星探發掘拍廣告，17歲正式入行，並火速於影壇走紅。演技好，身材亦好的她，曾撕破玉女形象，以九十年代的天價酬勞100萬，拍全裸寫真集，首批賣出六萬本銷量，前後推出過兩本寫真集都十分暢銷。
胞妹經紀做明燈當年30歲未夠的李麗珍，九十年代開始炒樓，專吼港島東及西半山豪宅，根據土地註冊處資料顯示，李麗珍當年在炒賣樓宇方面，累計有千七萬進賬。據知，李麗珍的親妹李麗敏是地產經紀，早年賣出寶翠園套現，亦是妹妹負責。多年炒賣只失過一次手，蝕約三百萬，可謂炒樓高手。
婚前最後三級96年，與音樂人許愿結婚前，李麗珍以四百萬片酬作最後大膽演出。由王晶操刀，夥拍舒淇接拍三級片《玉蒲團之玉女心經》。往後她大幅減產，甚至處半退休狀態。
戀愛大過天
李麗珍一生奇情，由十七歲初戀開始，段段情史都非一般，話題性強過連續劇。
林利中五畢業後出道的李麗珍，初戀奉獻給狄波拉胞弟柏德烈，但只得兩年貨仔，原因是珍妹與小虎隊成員林利合作電影《瘋狂遊戲》撻着，但之後又翻撻舊愛。
潘源良20歲拍《戀愛季節》時介入導演潘源良婚姻，令對方婚變，當時男方更寫了首《最愛是誰》冧珍妹。多年來二人四度離合。
錢嘉樂拍電影《殭屍叔叔》搭上嘉樂仔，當時珍妹更指對方為「一生中最愛」。
祁文傑87年邂逅漫畫家祁文傑，二人感情快來快去，拍拖唔夠一年即撇。
雷有暉九四年公開與太極樂隊主音雷有暉拍拖，不久更宣布訂婚，但最終被許愿撬牆腳，一年玩完。
許愿因一次撞車意外而撻着，九六年，二人於加拿大閃婚，同年誕下女兒許倚榕，被指是「美女與野獸結合」。有傳○○年許愿破產，珍妹缺乏安全感而成離婚導火線。
Jacky Ma○四年正式離婚後，珍妹介入已婚髮型師馬桂燦（Jacky Ma）婚姻，事後馬太李靜婷出書大爆三人迷幻性史，轟動全城。
撰文、攝影、攝錄：娛樂組