| 2014-10-30 NM | ||
亞視賣盤，講咗咁耐都未賣得出。潛在買家究竟係邊個？早前有消息指，他的姓氏有一個「木」字，答案至今已經呼之欲出。「木」姓商人本來和王征傾得七七八八，開價五億元，但到最後卻嫌價錢太貴而拉倒。 有傳王征曾找一名金融界猛人接手亞視，猛人雖然大把錢，但份人絕對唔蠢，做晒盡職審查，睇晒數簿。計計數發現，過去幾年，王征已注資十八億元，家吓仲「莫財」到連人工都要拖（剛剛先搵到錢出九月份嘅糧），最難搞是每月要還成過千萬債務利息，金融猛人最終亦決定唔買。亞視被人睇完全相再彈鐘，認真慘慘豬。 除咗金融猛人，銀娛主席呂志和，同太陽國際主席、有「洗米華」之稱的周焯華一樣被傳有興趣買盤。不過據理性分析，呂志和為人精明、甚少做蝕本生意，亦非喜歡擦鞋之人，未必會接手亞視這個燙手山芋；而洗米華一向低調，買入電視牌照做大亨，未必是他那杯茶。王征現階段，要繼續尋覓「非理性」買家之餘，還要搵錢出下期糧！ 冼國林論佔中無得輸 喺香港，言論自由愈來愈細；現時連沉默的自由都無。近日，中央點名指香港大孖沙誠哥、四叔等唔出聲反佔中。唉，撐又死、唔撐又死，埋錯邊仲死，好難怪他們龜縮。其實他們可以學食過夜粥的第一財務（8215）主席冼國林，買兩邊（或者係兩邊都唔買）。上週六，他舉辦了一場武林大會，有六百幾位武林人士出席，一齊遊行到灣仔警察總部支持警察不偏不倚執法，他說：「其實我兩邊都唔幫，只要求雙方和平表達，唔用暴力！所以反佔中陣營訴諸法律，我係十分支持。」他指曾有佔中及反佔中人士想在他的活動中擺檔，但他堅持中立，兩邊都say no！練武之人，來一招「推手」，咁咪無得輸囉。 本週最包容金鐘海富 佔領行動持續一個月，建制派「恐嚇」佔領會令街鋪被破壞、損失慘重，但事實係商戶根本無穿無爛，希慎開到聲話銷售額無乜影響。講影響，要數位於「主戰場」嘅金鐘海富中心。不過喺商場港鐵出入口兩邊的牆壁，除咗商戶嘅櫥窗外，都貼滿了好有愛的標語，一張都未被清理過。保安對佔領者友善，廁所任用之餘，早前仲借出電力，讓佔領者叉電，有佔領者大讚海富中心夠包容。大家應該仲記得，一個月前、警察施放催淚彈翌日朝早，海富中心職員「唔覺意」將中國五星旗倒轉升起，大快人心。睇番資料，海富中心的管理公司原來係港鐵。雖然叫做半個政府機構，但管理嘅始終係人，呢啲咪叫做良知。 本週圖片 港交所本週日宣布滬港通未有期，大家以為股市唔瀉番一千點，都有八百點啩，點知本週一收市只係跌百幾點，仲唔係習總撐起雨傘為大家擋住？ 金牙大狀講嘢 老董道德標準不如689老董為689背書，話佢收UGL五千萬銀「從道德至操守都完全冇問題」，甚至話即使有人一路查落去都「會失望，因為搵唔到新嘢」，直情寫埋包單咁嘅款，莫非佢係689肚裡面條蟲？憶昔澳洲記者要爆呢單料，為求慎重，先向689求證。你估佢得到個乜嘢嘅回應？689第一時間出律師信，警告佢如果單新聞見報，即構成誹謗，打擊689嘅信譽，令人覺得佢犯下五宗罪：（一）貪污；（二）不道德；（三）營私舞弊；（四）不誠實；及（五）無德無能出任公職。若然689自己都話爆呢單新聞出嚟會有咁大鑊嘅，咁老董又憑乜嘢話「從道德至操守都完全冇問題」呢？莫非老董嘅道德標準連689亦不如？當今之世，呢個係冇可能嘅喎？ | ||