|
||||||
|
昨日講起「關愛 基金」籌款失敗，不能達標，順便講及大學籌款。五月七日賽馬，在馬場碰到一位大學高層人士，佢話今年籌募捐款比較困難，但冇講明原因。左丁山諗得出嘅理由 有：（一）「關愛基金」與大學搶捐款，（二）今年冇政府嘅配對基金，（三）香港大富豪來來去去嗰班人，佢地可能已患上捐款疲勞症。睇嚟香港嘅大學要諗多啲 新辦法去吸引富豪捐款，而且要吸引新紮富豪，例如中國民企主席而又入籍香港特區嘅。 彭博通訊社評論最近有一篇幾有趣嘅有關美國大學捐款報 導，題為"Schools Find Ayn Rand Can't Be Shrugged as Donors Build Courses"。美國最近有一套低成本（一千萬美元製作費）電視電影上映，名為"Atlas Shrugged: Part 1"，是否好睇，要視乎立場而定，右派話唔錯，左派話沉悶無聊，格林斯潘視Ayn Rand為老師，呢本小說被美國國會圖書館讀者投票選為聖經以外最具影響力嘅書，全書過千頁，非常難讀，但對美國人思想有極大影響。 有一位 退休銀行家John Allison為咗宣揚Ayn Rand思想，成立一個慈善基金，向不同大學捐錢，最高捐款達二百萬美元，已有六十間學院/大學，包括北卡羅連納大學之四間分校接受捐款。捐款係有條件嘅 噃，就係大學一定要開設一個資本主義課程，學生必須修讀Atlas Shrugged呢本小說，有幾間大學嘅教授撰文反對，指捐款人不應有權為大學訂下課程。但現在所有美國州立大學都「莫財」，大學校長為免大裁員，見到大 額捐款，根本難以拒絕。 最近中國五礦想收購加拿大礦業公司Barrick Gold，結果失敗。Barrick嘅主席Peter Munk同意捐款三千五百萬加元俾多倫多大學，附帶二十三項條件，除咗成立一間Munk School of Global Affairs之外，據說條款之中有一啲會令到Munk School嘅學者「不願意」批評呢間世界最大嘅貴重金屬礦業公司！（嗱，與此比較，OMD地鐵事件濕濕碎咯！），多倫多大學教授反對，學生在校董會開會 時示威，但校長David Naylor教授話抗議人士冒犯大學價值觀喎，一於收取捐款。 |
||||||