老婆接機 錫錫打氣陳國邦拒回頭 「公開信當求職」
1 :
GS(14)@2015-10-12 14:25:07■陳國邦越講越感觸，羅敏莊一度想中止訪問。
陳國邦上周五一封「給無綫電視的公開信」，宣佈結束他與無綫15年賓主關係，也感動了無數電視迷的心。阿邦昨由台灣返港，指數年前已為前途問題考慮離巢，公開信其實是求職而絕非「勒索」，縱使無綫高層稱極力挽留，但阿邦以分手情侶來喻謂：「自己都唔想有彎轉！」身為太太的羅敏莊昨日接機，與阿邦咀嘴打氣，給予支持。
現年47歲的陳國邦，演技雖然出色，但卻一直苦無機會發揮，多年來屢被派演行行企企第三、四線角色。為免自己長此下去變成「一潭死水、發黑發臭」，阿邦上周五在網上貼出一封「給無綫電視的公開信」，宣佈不與無綫續約。這封公開信，大大感動了觀眾、網民甚至台前幕後，反應之熱烈，連他本人也始料不及。昨午阿邦與恩師鍾景輝在台灣演出完舞台劇《相約星期二》返港，太太羅敏莊專程往接機，也有市民認出阿邦，主動邀合照與他打氣。問阿邦發公開信後心情如何？他說：「冇乜點，封信唔係因衝動而決定。考慮咗幾年，點解而家先寫？真係時間惹的禍，因為喺加拿大演出（上月舞台劇巡迴）有好多時間，思考好多嘢，自己真係應承咗簽約，唔想傾約同事受責罰，希望高層唔好怪佢。呢個念頭孕育咗一段時間，諗吓應該幾時，定係等吓再抱希望呢？諗完之後就決定做呢件事。」
暗示高層官腔挽留
發公開信後無綫高層可有「打鑼」找他傾約？阿邦支吾以對，身旁的羅敏莊代答說：「冇打鑼，但有搵囉。」問是否無綫高層樂易玲時，阿邦只笑而不語。對於樂易玲謂會極力挽留，阿邦說：「無綫同演員有事發生，佢都會出嚟講說話，好似公司一個橋樑，唔通佢話陳國邦你應該走咩！」羅敏莊亦忍不住插嘴問阿邦：「你係咪覺得好官腔呀？」阿邦又笑而不答。是否與無綫沒彎轉餘地？阿邦說：「自己有同太太傾過，太太都話既然決定咗就咁啦，唔係有冇彎轉，自己都唔想有彎轉。好似一對情侶，我已經單方面講咗分手，對方一定做番相應嘅嘢挽留。」樂易玲表示會再與阿邦再傾，看看他有甚麼想做而未達到，對此阿邦說：「自己想做嘅嘢，喺封信嘅文字已經交代得好清楚，呢封唔係勒索信，唔係封信出咗之後，你講乜嘢條件就喺番埋一齊。唔係話留喺TVB就錯，走係啱。」
■陳國邦昨由台灣返港，多次強調公開信不是要脅無綫，其實是他的求職信。
■羅敏莊錫錫老公陳國邦打氣。
演舞台劇重拾熱誠
信中阿邦謂不想自己作品變作一潭死水及發黑發臭，莫非他見到現時有此情況？阿邦謂：「唔關人哋事，只係自己等咗咁耐、盼望咗咁耐，但隨住年月，心智會被磨滅，唔係公司或邊個令我變成咁。好在自己每年同老師演舞台劇，唔同地方演出，觀眾畀我嘅反應，維持咗演戲衝動同熱誠。」說話至此，阿邦顯得有點口窒窒相當感觸。之後阿邦說：「呢封唔係要脅信，係求職信，等外界知道我係自由身，可以嘗試好多唔同嘅嘢。」可有後着？阿邦說：「真係冇，可能試吓教學，做舞台劇同湊女。」問羅敏莊可擔心老公前景？她說：「冇㗎，佢演舞台劇之後冇乜大project，不過我又唔介意，我都有工作能力，如果人生唔開心，即使賺幾多錢都冇用，不如轉換環境。老公演舞台劇返嚟開心好多，我鼓勵佢喺舞台劇發展，雖然唔係搵好多錢，但都夠使啦。」訪問後，羅敏莊還與阿邦咀嘴打氣，給老公無限量支持。採訪：譚倩宜攝影：陳慧安
■陳國邦和鍾景輝日前在台灣演出舞台劇及出席座談會，反應熱烈。微博圖片
■陳國邦昨與恩師鍾景輝返港，對陳國邦決定，鍾景輝不欲多言。
來源:
http://hk.apple.nextmedia.com/entertainment/art/20151012/19329416
有話兒：醉心演戲 怕變求其甘草陳國邦瀟灑出走
1 :
GS(14)@2015-10-13 07:37:45■陳國邦：「My name is邦，陳國邦。」攝影：陳志嵐
正如周星馳所講：「做人如果無夢想，同條鹹魚有乜分別？」入行26年的陳國邦，因為不想變成發黑發臭的一潭死水，日前向效力15年的無綫發公開信宣佈不再續約。阿邦不諱言今次可以如此灑脫作出決定，全因有個偉大老婆羅敏莊給予無限量支持，不論經濟上和精神上。阿邦說：「有個咁特別嘅人去支持我，呢條路行得特別開心。」成功男人背後總有個女人，有羅敏莊這位賢妻，阿邦其實已邁向成功一大步。撰文：魯吉陳國邦日前一封《給無綫電視的公開信》，宣佈結束他與無綫15年賓主關係，也道盡他工作上心路歷程。不少人大讚阿邦今次發公開信夠膽識，阿邦卻坦言今次決定，最大功臣其實是他結婚4年多的賢內助羅敏莊。昨日接受本報專訪的阿邦說：「Mimi（羅敏莊）好偉大，有屋企人支持差好遠，好難得佢好支持我做鍾意嘅嘢，甚至去到生活層面、經濟上，我有咁嘅生活環境，好大部份係佢去唱歌做騷，經濟上係佢去支持。一個人搵幾多錢都要講際遇，簡單嚟講係你紅唔紅，佢好欣賞我、明白我，知我好用心工作、醉心演戲，唔介意我搵幾多錢返屋企。好多人都知，佢係我fans，主動追求我，有個咁特別嘅人去支持我，呢條路行得特別開心。」
■羅敏莊給阿邦無限量支持，讓他可以瀟灑地跟無綫道別。攝影：林德雄
■阿邦家中雖然已有9隻愛貓，但見到兩隻可愛小花貓，仍忍不住踎低逗玩一番。
■90年代阿邦在電影《廣州殺人王之人皮日記》中曾擔正做男主角。劇照
離開娛圈揸的士
阿邦強調，今次選擇離開絕非一剎那衝動，他說：「今次我走，理由好簡單，我唔想喺創作生命裏面隨住年月磨滅，希望用我能力去換取做主角機會，我得到嘅讚賞好多，但機會越嚟越渺茫，好似一個打工仔心態，你唔想升職咩？我好難相信。」2012年《大太監》彭三順角色令阿邦備受觀眾注目，但台慶頒獎禮最佳男配角，他卻敗於《巴不得媽媽…》中飾演蘇基的古明華，今次離開，彭三順事件會否是導火線？阿邦說：「唔係。呢個念頭06、07年仲大，對我傷害性仲大，我直情想放棄演藝事業，我想離開娛樂圈唔做戲，去揸的士或其他工作。但你問我當日事件，我真係唔記得。」演技同樣受讚賞的許紹雄和劉江，其實也一直未有機會當男主角，若如阿邦公開信所講用能力換取主角，那他們豈非該一早離開大台？阿邦笑說：「佢哋可能過渡咗，或者冇呢個心態，呢個心態係一個唔好嘅心態，所以我選擇行開。」是否擔心繼續留在無綫會變甘草？阿邦說：「我繼續留喺度有兩個結果：第一，係我過渡到呢個心態，我遲啲可能會做陳老師，一個好好嘅綠葉、配角，但我過渡唔到，我就會變成一個『得啦，求其啦，收工啦！』嘅演員。我見過一啲咁嘅人，呢啲人畀我一個喪鐘，當然我見到劉老師（劉江）係一個好榜樣，但我唔知我會變成邊一個，所以變黑發臭唔係因為我留喺TVB而變成咁，係我怕變成一個趕住收工嘅人。」
■大前年阿邦在台慶頒獎禮最佳男配角敗給古明華（右），不少網民為他大感不值。
■眼見15年努力仍未能登上主角之位，陳國邦為怕變成求其甘草，決定離開無綫繼續尋夢。
演員有好多怨言
一個演員無論演技多好，也需要有好劇本發揮，但近年無綫劇集水準下降，就算他再努力也是徒然。對此阿邦說：「呢啲情況唔需要陳國邦去講，演員亦有好多怨言，我唔會喺呢度講TVB點，我會同佢哋會面時講。」原來阿邦日內會跟無綫高層相約見面傾談，他說：「佢同我講：『想同你坐低詳談。』無綫有佢哋嘅缺點，但呢個係我私人意見，加上我又唔係幕後，有啲問題我係睇唔到，如果我公開表達，只會引起爭執吵鬧，但我一定會同高層講，既然我選擇離開，我就可以暢所欲言，我好希望可以改善得到，令在職嘅藝員甚至幕後都能夠有個更好嘅工作環境。」會否回心轉意留低，阿邦謂一切仍是未知之數。場地：香港沙田凱悅酒店服裝：Decision Design
■自言不愛應酬的陳國邦（右一），拍大合照時大都是靠邊站。資料圖片
不愛拉關係 最愛靠邊站
陳國邦入行26年作風一向低調，每次出席記者會，他總喜靠邊站。阿邦笑說：「呢個係陳國邦一個缺陷，那怕我係第三、四線，好多時記者會啲主角、監製會同我講，叫我企埋中間影相，但我鍾意喺角色螢幕前去創作，我鍾意喺角色發光，但私底下我好迴避呢樣嘢。我唔識做一個藝人，喺訪問時，我比較偏向迴避，坦白講，唔通記者走埋嚟問我對彭三順角色有乜體會、你點去演繹？除非專訪！緋聞？我私生活一向好公開，呢方面我冇娛樂價值，冇娛樂價值自然冇我新聞。」說到應酬或跟高層拉攏關係，阿邦坦言是他另一缺點：「人與人之間除咗工作之外，重要有好多交情，出去應酬同人搞好關係，係需要㗎，人際關係亦都係能力一部份，所以我話呢個係我缺點，我好迂腐，會覺得唔想靠關係，好矛盾嘅思想。」
來源:
http://hk.apple.nextmedia.com/entertainment/art/20151013/19330548