操盤手札記：併購憧憬潤啤飲勝
1 :
GS(14)@2017-10-30 00:10:27十年磨一劍，iPhone十周年紀念版iPhone X周五開始預訂，64GB賣8,588元，256GB賣9,888元。本周亦有兩隻新股招股，晶苑（2232）入場費4,444.34元，閱文（772）入場費11,110.84元。攞住一萬元鬆啲，你會抽iPhone定抽新股？上月尾上市嘅眾安（6060），六日炒高64%，好和味！但據先達店主講，iPhone X有望炒高一個開，仲和味！不過，iPhone X開賣初期存貨唔多，炒家可能喺搶購熱潮過後先有貨，炒價已縮水。至於抽新股，抽完晶苑可用退票錢再抽下周三招股嘅雷蛇，一注錢博多轉。10月以嚟有14隻新股上市，大部份首日掛牌都有錢賺。新股好世界，但星級新股招股卻會抽乾資金，閱文招股前，銀根已抽緊，拆息連升八日。港股上周四高見28798後，呈「升市成交增、跌市成交縮」，短期調整或未完。習近平喺十九大指出，中國經濟保持中高速增長。會議期間出爐嘅經濟數據亦顯示，首三季GDP按年增6.9%，增速比舊年同期加快0.2個百分點；首三季社會消費品零售總額按年增10.4%，拉動經濟嘅內需動力增強。難怪10月以嚟多隻內需股破頂，包括藍籌旺旺（151）、恒安（1044）、蒙牛（2319），以至前藍籌華潤啤酒（291）。喺外國啤酒搶攻下，國產啤酒產量連跌三年；不過，經過汰弱留強後，今年開始復蘇，首三季累計產量按年增0.5%。潤啤中期銷量按年增2.9%，營業額增3.7%，純利增93.4%，好過行業平均水平。潤啤除咗優化產能，亦透過併購壯大，2013年已收購金威啤酒。前周，青島啤酒（168）第二大股東日本朝日集團話打算轉讓青啤19.99%持股，若潤啤接盤，同青啤結盟，兩者合計囊括內地市場45%；就算同業奪得，有競爭亦有利行業估值。潤啤現價22.45元，呈區域突破；而且市值重上730億元，重返藍籌都唔奇。割柑人本欄逢周四刊出
來源:
https://hk.finance.appledaily.co ... e/20171026/20195142