2010-6-15 AD
| ||||||
| 籌款呢回事，好 講求技巧，籌款前要說服捐款人，獲得捐款後，要適當地表示謝意，繼續維持良好關係，希望捐款人以後不斷捐款，如果唔小心，一個唔覺意得失，莫講話得罪捐款 人，以後就冇回頭，都唔知去邊度搵人填補。 大學捐款單位，一般叫做發展處，最老資格者，怕係香港大學嘅才女T，由鄭校長時代開始做到o依 家，已逾十年，籌款經驗豐富到極。譬如以前每年一度嘅「香港大學校友會挑戰盃」，過往只係低調處理，冇乜港大校友到場嘅。左丁山與校友嘅團體馬曾經贏過呢 個盃，當年領獎盃時，港大校友會只有幾個人在場。後來經才女T呢位完全唔識賽馬嘅人包裝過，將每年「香港大學校友會挑戰盃」變成校友重聚盛事，每年包下賽 馬會廂房，招待校友及對籌款有貢獻人士，請埋徐校長到場主持，形象唔同晒。上星期六去到馬場，就見到HKU Reunion at the Races指示牌，指示來賓走上Jockey Club Box，非常顯眼。盃賽排在第七場，皇仁校友有隻「皇仁神駒」出戰，好多皇仁校友同時係港大校友，如果贏出嚟，美事一樁也！皇仁校友L嘅太太係今天銀行界 最知名嘅賓架，L太現身沙圈與徐校長談笑甚歡，後來見到「皇仁神駒」落飛，以為有料到o忝，不過是場有隻惡馬「小橋流水」，贏梗噃，點有資格挑戰呀？結果 「小橋流水」輕鬆勝出，成隻「蓮華生輝」少年版咁款，「皇仁神駒」根本冇得跑。 「小橋流水」呢個馬名，認真文雅，教人想起馬致遠之「枯藤老 樹昏鴉，小橋流水人家，古道西風瘦馬」，由佢贏大學校友會盃，最為匹配。此馬只得三歲，兩出兩勝，下季前途未可限量，如無傷患，可挑戰短途馬王。有啲馬主 喜歡從古書搵馬名，譬如此日第十場之「火龍駒」，據評馬Y考證，就係宋朝大將狄青之座騎名字。上星期有一隻新馬出賽，叫做「白蹄鳥」，好多人睇到烏卜卜， 左丁山向評馬Y請教，佢話係唐朝李世民六匹御用名駒之一，好似以前嗰匹「爪皇飛電」，乃曹操胯下上駟也。 | ||||||