財經評論：一句害咗打工仔16年的話
1 :
GS(14)@2018-02-13 03:17:03■劉德華當年廣告金句，轉眼16年，多年來害苦了不少服務業打工仔。互聯網圖片
劉德華當年廣告金句「今時今日咁嘅服務態度唔夠㗎」，轉眼16年，多年來不知害苦多少服務業打工仔。撈咗很多年地產的A姐見盡百客，有好客變常客，又有苛刻無理到凌晨搵你的衰客，甚至毛手毛腳的賤客，但最乞人憎是浪費時間無幫襯又炫耀秤身家的臭客。
A姐話:「問佢層樓賣唔賣，佢話搵到買家自然賣。搵到買家畀到價，又話市旺要反番口價。反咗價，講到買家追口價，又扭扭擰擰話諗吓。諗到買家走咗啦，又話搵個第二個好無呀。隔一排，無客啦，又call班行家話賣呢賣樣啦，跟住又係有客到價，佢又反價，其實只係秤身家。」問她還湊不湊這個客？她反問：「臭客仲湊？」迷信顧客是對的，客人只會越得戚。某航空公司按乘客幫襯次數，分若干級別，最高級別的鑽石級會員往往是最令一班空姐望而生畏的貴客。有位乜生是香港人，搭飛機睇《蘋果》，講電話講廣東話，偏偏要求空姐同佢講話要講英文，是識睇中文識講廣東話唔識聽？還是制服混合英文是一種刺激多巴胺的化學作用讓他有賓至如歸的感覺？天曉得，反正客人永遠是對的，空姐只管說：「Sir，may I help you?」萍水相逢，互相尊重，去到連自己都頂唔順、聽落會反胃、做落覺折墮的無理要求，就咪鬼要人做。人人要搵食，山水有相逢，今時今日咁嘅顧客係唔啱㗎！記者：陳家雄
來源:
https://hk.finance.appledaily.co ... e/20180208/20299110