📖 ZKIZ Archives

可加可減 左丁山

http://hk.apple.nextmedia.com/template/apple_sub/art_main.php?&iss_id=20120418&sec_id=12187389&art_id=16257002&cat_id=255&coln_id=22

地鐵與九鐵在 2007合併，合併時立法會通過港鐵車資可加可減機制，一來這是前環境運輸工務局局長廖秀冬在任時全力推動建立，二來是為上市公司港鐵（ 66號）消除票價增減的不穩定性，令基金和投資者較容易評估港鐵的營運。否則的話，若依照 2007年之前的模式，每次申請加價都要一番政治角力，如 2001年董建華、梁錦松二人發功，強行把地鐵的加價申請壓下來，合併後的上市公司股價會受影響。
按可加可減機制的公式，（ 0.5× CPI變動）加（ 0.5×工資指數變動）減生產力因素（合併後頭五年生產力因素設於零，第六年起為 0.1%）。一望而知，在經濟好景時期，通脹加幅嘅一半加工資上升幅度嘅一半再減 0.1%，係人都知道票價一定係有升冇跌嘅啦，只有在通縮年代、工資下降年代，票價先至會大減。啲議員依家批評可加可減機制唔公道， 2007年時佢地飲醉酒，瞌埋眼去投票乎？
只要政府與香港人一日相信「用者自付」（ users pay）呢套理念，港鐵以後年年加價，事屬必然，除非香港就會係重返 03年通縮情況。如果唔准「用者自付」，要政府津貼嘅話，情況會如北京、廣州、上海，市政府每年要撥款補貼票價。泛民議員鄭家富做證婚律師，據講一個月可 搵幾十萬元，今年是否會再參加直選，甚有疑問，有人話佢可能傾全力用多啲時間搵真銀喎。鄭議員咁發，搭地鐵當然付得起有餘，不須其他納稅人津貼佢，依家佢 為民請命，建議政府全面收購港鐵，直接公營。呢樣嘢係可以辯論嘅，首先講吓幾多錢。目前港鐵市值約 1568億，政府擁有 75%計，須向其餘股東收購 25%，即動用約四百餘億元，但要小股東投票通過，可能有人反對，當通過嘞，政府雖然有不少儲備，但收購港鐵要 391億，又有人話要收購東隧西隧，收購領匯，在在需財，點搞呀？有冇人諗過，咁多錢不如用來興建更多公立醫院、建立醫療保障制度及提供更好教育，增加更 多學位？


PermaLink: https://articles.zkiz.com/?id=32848
Next Page
ZKIZ Archives @ 2019