在電視機上，經常看到「財經演員」分析；在金魚缸內，原來亦有一群正宗的財經演員，扮演上市公司「管理層」。這班月薪一至四萬元不等的上市公司主席或董事，專門主持股東大會，又或應付小股東的質詢。
上週三，由東華三院總理李鋈麟（Alan
Lee）做幕後玩家的創業板公司匯創控股（8202），舉行股東特別大會，一個連公司業務都弄不清的公司「董事」，與小股東唇槍舌劍，對於難答的問題就使
出「無賴」絕招：「我答咗你啦，你唔理解我無辦法！」小股東完全無得反駁，之後「管理層」輕鬆收工！
經營戶外廣告媒體的匯創控股，由最初做電子應用軟件供應商，到收購及經營醫療機構、開礦、開酒店、開廣告公司等，百足咁多爪，收購期間不斷配股、供股，再配股供股；單在去年已四次發行新股和配股一次，籌近三億，一、兩年間股價跌了九成八，現時股價三毫子，散戶陷入死局。
上週三早上，匯創舉行股東特別大會，又投票決議通過收購和配股。雖然市值三千六百萬元，卻收購一間估值十九億元的電視及戶外廣告公司，且配售五億
多股可換股債券，集資兩億元。記者以股東身份參加在灣仔美國萬通大廈六樓、狀似商務中心的匯創辦事處舉行的會議。所有股東登記身份後，就被迫進入五十呎的
會議室，圍着一張圓桌「你眼望我眼」對坐；基於匯創只派出執行董事洪榮鋒迎戰，一場只有七名小股東參與的特別股東大會準時十一時開始。
財演惡鬥小股東
在投票過程中，保障投資者協會主席呂志華姍姍來遲，據悉他持有大量匯創，最後因幕後庄家玩向下炒，令他輸到「眼坦坦」。甫坐下，呂志華已毫不客氣質問洪榮鋒，為何公司一直重複收購、配股和供股攤薄小股東利益，唯對方只冷冷拋下一句：「先投票，有了點票結果再發問。」
投票後，其他股東已「快閃」，只剩呂志華和另一名小股東；待洪榮鋒宣布投票結果為九成九贊成後，蓄勢待發的呂志華篤着雨傘，再衝入會議室，洪榮鋒隨即表演：呂：呂志華 洪：洪榮鋒
呂：公司大量發行股票，只會攤薄小股東利益，你答我，仲會唔會配股集資？
洪：如果你覺得攤薄，我都冇嘢好講。配股？呢刻冇囉。
呂：目前已攤薄小股東利益，已是不利。
洪：睇唔到有咩不利。
呂：公司市值先三千幾萬，你走去收購一間十九億的公司，十九億？我都好懷疑個估值，你可唔可以保證收購後，公司一定有錢賺？
洪：做生意可以保證賺錢㗎咩？
呂：可以！你睇番俊文寶石（8351），收購後有兩年溢利保證。咁即係廣告行業PE又要高，又冇保證，又要大量發行股票？你知唔知公司本身做咩？
洪：戶外媒體廣告。
呂：公司本身做I panel！你根本唔了解公司業務，你熟唔熟廣告行業？
洪：唔知人哋，自己業務理想就OK！
呂：首三季虧損二千六百萬都叫理想？
洪：將來事將來知。如果我哋賺錢呢？
呂（激動篤傘）：公司應該多變，唔係一成不變地合股、向下炒再大折讓供股，你冇答過我問題。
洪（輕輕挨後身體）：答咗㗎啦，你唔理解我無辦法，你資歷要好少少。
呂：我本身從事會計㗎，你哋啲招股書我有份做㗎。
洪：答咗你㗎啦，你唔明冇辦法，我亦唔一定要答你想知嘅答案。不如咁啦，業績就快出，你到時再問過啦。
呂（激動臉紅）：好！我一定會再嚟（再篤一下傘）。
洪：見過佢（呂志華）好多次啦。（跟在場職員及證券行人士拍手慶祝決議案被通過。）會議十一時三十分完結。
執董四萬 主席一萬
七
分鐘表演完場，呂志華愈說愈激動，但洪榮鋒保持輕鬆。翻查匯創最新年報，四十歲的洪榮鋒，於一○年二月十九日加入匯創出任執行董事，負責公司財務管理，年
薪四十六萬，即每個月有三萬八蚊落袋。洪榮鋒現跟家人同住羅便臣道景雅花園，並為中國公共醫療（8116）的秘書和財務總監，這份正職去年薪酬則九十八萬
七千元。至於去年才出任匯創主席的陳川，更是神龍見首不見尾，現時長居上海，年報計月薪只有一萬元。
事實上，匯創背後真正玩家是東華三院總理李鋈麟，行內指他是大量細價股的幕後庄家，如中國公共醫療（8116）、西伯利亞礦業（1142）、及卓智控股
（982）等。有曾任財經演員的董事透露，公司董事可經熟人介紹在市場「招聘」，「你見主席同執董冇股份喺手，酬金又低就多數係人頭，酬金高低亦視乎你同
幕後庄家有多老友。」
然而對這些受困的小股東來說，股東會議只是唯一盡抒己見的機會，又或盡情享用茶點和飲品，以彌補股票損失，「財經演員」正是他們發洩的對象。 ####
| ||||||
每個小朋友都曾夢想自己住在一間色彩繽紛的糖果屋中，各種糖果任食。隨着年齡漸長，很多人把糖果屋拋諸腦後，除了今年廿六歲的林汛展（Jeffi）。Jeffi為了吃甜，走到葡萄牙，花半年時間學做手拉糖。回港後，在糖果店再磨劍三年，去年十月，與學生兼拍檔Manie在荃灣工廠大廈開設糖果店「Hey Candy」。曾在糖果公司打工的Jeffi，知道逐粒逐粒賣糖，有排未回本。因此他們決定為品牌策劃「糖果活動」，並開班授徒，連同零售三管齊下，現月賺五萬元。Manie定了下一個目標：「租地鋪、開門市！」 上週Jeffi和Manie，帶着他們的糖果，來到城市大學的Mega Sale擺檔。他們的糖果色彩繽紛，除了手拉糖外，還有小熊、兔仔、鴨仔形的波板糖，成功吸引不少女同學的留意。Manie說：「我哋每個星期會出嚟擺三次檔，唔同場合都擺。因為我哋喺廠廈，較少街外客，所以盡量爭取出街擺檔嘅機會。」記者見Manie不停主動讓客人試食糖果，「我喺Häagen-Dazs做咗七年店員，習慣晒面對客人。啲客要試食過，覺得好食先會買。」其實一粒糖，零售價平均才五毫子，請人任食拉生意，根本無需吝嗇。記者見Manie以左手把糖送到客人手上時，會以右手有意無意輕托客人接糖果的手，「手與手之間有接觸，可以增加親切感，仲可以拉住佢哋傾吓偈，sell耐啲嘛！」Manie指其男友都是sales，兩人經常分享sell客之道。不過，身為糖果師傅的Jeffi當日就無用武之地，只能密密切糖，「今日場地無電提供，否則我可以表演整糖，仲多客睇呀！」 替品牌搞活動搵銀指數：＄＄＄＄＄ 事實上，這種手拉糖店，市面上已經有好幾家。包括元祖手拉糖店Papabubble，本欄多年前訪問這店時，Jeffi就剛到那兒任職，至去年儲夠錢，才自立門戶。做這門生意，他認定賣糖競爭激烈，而且他們是新店，市場佔有率在短時間內，一定不夠其他龍頭高。他計過數，一樽糖果才七十五元，要賣多少樽才夠交租？故與曾做活動統籌的Manie商量後，決定以糖做主題，替品牌籌備活動。「我哋會幫客人set好派糖嘅活動內容，仲會主動要求到現場幫手派糖。除咗幫個客手，其實仲可以係現場撈客！」開業後，他們接的第一個活動，就是在婚紗雜誌公司的活動上，派發印了「囍」字的糖。Jeffi回憶指他們的第一次並不順利：「喺太陽暴曬之下，啲糖都溶溶哋，搞到啲途人都話我哋啲糖唔得！」Manie則接着說：「下次識得同客講明，夏天室外搞活動會有問題，室內就唔會咁。嗰次係朋友介紹，我哋唔收錢，賣大包；雖然有小小意外，但對方都好包容，喺雜誌某個廣告位，免費俾我哋賣廣告。」現時，Hey Candy每月平均接到最少一單活動大單，客人包括NARS，City'Super及Chocolate Rain，Chocolate Rain老闆Prudence說：「佢哋係好有心好年輕，很有創意。」每單生意平均收費達兩萬。如果計零售，幾乎要賣夠四萬粒糖才可做到此數。上月他們幫夜店Dizzi搞活動，為他們度身訂做四千支細波板糖，「今個Halloween，又會幫一間酒店嘅宣傳活動做兩萬塊波板糖。」Manie興奮地說。為了爭取宣傳機會，只要客人願意讓Hey Candy在包裝上留下公司名字及聯絡方法，便可得到折頭，他們則當是宣傳成本。而有時Jeffi又會應客人要求，在會場表現整糖。他說：「只要有電，我帶啲小型工具就得，氣氛比齋派糖高興得多。」 開班搵外快搵銀指數：＄＄ 不過，一個月得一單活動，其餘日子都不能坐以待斃。事關開設糖廠，對於他們來說，成本甚高，因此必須要物盡其用。Jeffi指：「張工作枱溫度會去到一百度，咁先可以保持糖的溫度，以做出不同形狀。而張枱每日至少要用六個鐘，所以用電比平常工廈多幾倍，要申請『大電』先夠用。單是處理工作嗰啲供電，便花了十萬元。」因此，Jeffi及Manie更會開班授徒，Jeffi會一星期開兩班教學生，每位收費二百九十八元。好多人擔心開班授徒，將手技外傳，會惹來更多競爭者，「所以我哋淨係教整波板糖，因為較為容易整，好似人哋整紙黏土咁，學咗都唔怕。」上週五，來學師的莊生莊太，希望整熊仔及免仔波板糖，送給三年級的女兒，亦順便拾回童真，做家庭主婦的莊太說：「真係幾得意，好特別，香港好少有呢啲咁嘅機會，價錢又唔算貴，好啱一家大細嚟玩。」兩人跟着Jeffi，先把三公斤的糖漿，水和砂糖煮熱至百多度，然後再倒在發熱工作枱上，把色素加入糖漿之中。再把處理好的糖漿拋在牆上的鈎，來回拉三十下，將空氣注入糖漿內，令口感變得較脆，顏色較有光澤。「整塊圓形的面，原來都咁難控制嘅，不過整完都幾有滿足感，下次帶埋阿女嚟。」Hey Candy一星期約有兩班，每班四至八人，一個月約有萬多元收入。始終要待假日才開班，亦因為要把桌子發熱至攝氏一百度，故不可以「跳出糖廠」，相比搞活動，此做法較受局限。 開地鋪「響朵」搵銀指數：＄＄＄ 現時零售生意只佔營業額兩成，但Jeffi一直希望可以開拓多一點零售市場「響朵」，「Jeffi對味道要求好高，試味都試咗兩個月，起碼用咗十萬。因為每試一種口味，都要用三公斤的材料，整三個鐘先得，所以每日最多都係試到三種味。」Manie說。Jeffi接着說：「其實葡萄味我都試咗十幾種，有的像黑加倫子，有的像巨峰提子。經過朋友試味後，結論是巨峰提子最適合香港人口味。因為相對上唔甜，甜中更帶點酸。我哋仲研究緊西瓜味。」現時，Hey Candy零售主要靠在Mega sale擺檔及網購。為了吸引更多人網上買糖，除了口味，其實糖果的創意及外形更重要，「好似『厚多士』字樣，高登膠樣，要多啲款式，做到塊面咁大，先有人留意我哋！」Jeffi說。由於分散投資、兩人要搞活動、開班，顧及零售及做糖，不時做到一頭煙。難得有空，Jeffi環顧八百呎的糖廠說：「做生意真係好多嘢煩，我試過唔記得交水費，被水務署停咗一個月水，搞到我日日都要抬兩公升水返廠。」為了長遠發展，他們正打算多請一個學徒。Manie說：「多個人幫手整糖，我就可以全力出去搵客，目標係接到酒店單，每間房都有我哋嘅糖去迎接住客。咁不單可以幫到零售收入，客人對我哋嘅信心都會大好多。建立咗品牌形象之後，賣幾多粒糖就唔係困擾啦。」他們希望有一天，能夠由廠廈走到地鋪。 開業資料（10/13） 租金：$50,000^裝修：$250,000入貨：$10,000器材：$150,000流動資金：$250,000總共：$710,000^兩按一上 營業資料（9/14） 營業額：$75,000租金：$7,000入貨：$7,000雜費：$8,000盈利：$53,000 行家點講？Sticky創辦人Jen：賣得太便宜 與Hey Candy一樣，Sticky同樣是賣人工手拉糖，開業短短三年，已在尖沙咀K11和天后擁有兩間門市。其店內更有師傅表演即時拉糖，深受年輕一族歡迎。Sticky負責人Jen認為荃灣工廠的位置偏遠，而且沒有門市，較難成功建立品牌。同時，Hey Candy出外擺檔時，一包四十克的糖果賣緊二十元一包，平均五毫子粒。Jen認為對方的糖果定價偏低，起碼要賣約七毫子一粒。「賣貴啲，可以幫補番零售收入。我嗰啲糖七十克都賣緊四十八元一包。」 | ||||||