|
||||||
|
發展商想樓盤賣個滿堂紅，真係少啲噱頭都唔得，尤其豪宅！好似呂志和旗下嘉華國際（173）即將開賣嘅港島司徒拔道豪宅嘉岶薈，就破天荒同馬會合作，下個月11號搞咗個「嘉岶薈盃」賽馬日，呢個仲係馬會有史以嚟首個盃賽以樓盤命名，認真威水！ 究竟搞盃賽要使幾銀？雖然嘉華同馬會都好口密唔肯披露贊助金額，但華華同行內人士八過，要贊助一個盃賽，起碼七位數字！但呢個數對嘉華嚟講係好濕碎！事關嘉岶薈入場費，係講緊1億港紙！發展商就好老實咁話，買得起嘅，就算唔係馬會會員，都係準馬會會員，名副其實富貴樓盤！ 而除咗下個月嘅賽馬日，嘉岶薈嘅業主將來仲可以享用馬場嘅貴賓包廂，同埋馬會提供嘅「馬會星級盛宴」服務，即係第時住戶只要坐喺屋企，就可大飽馬會大廚嘅口福！咁又係呀，係咁意買最平嘅單位都要成億，畀業主一啲超水準服務都天公地道喇！ |
||||||