|
||||||
|
在鏞記食飯，易 經河洛理數專家贈左丁山幾句，話今年旺金旺水，金屬投資有運行，因金旺木衰，屬木行業唔掂，天下不時有亂事，市場趁機炒作，故虛火假象甚多，自認聰明之投 機客必定損手收場，未來大運就係女性興起，女旺男衰，到咗九紫大運（2024年開始二十年），全世界都係女性抬頭，現在讀緊中學之女孩子，二十多年後會完 全壓倒男性。 呢樣我都知，香港女孩子讀書咁叻，將來香港醫生、律師、會計師一定係女性主導，男孩子去拿最低工資可也。與鍾博士及森哥拜拜 後，撞到台灣證券商人T君，證券T港台聲音兩邊走，兩邊都有經紀業務，佢捉住左丁山講：「你最近猛講新加坡贏晒，我有唔同意見。新加坡冇錯係高度廉潔，效 率奇高，市容好，空氣新鮮，係做生意好地方，將我地台灣完全比下去；新加坡似美國超市咁整潔，台灣就係中國式舊街市，污糟夾亂龍咯。但可以話俾你聽，我唔 會去新加坡住，去新加坡做生意！你地唔知呀，我打電話到當地與分析師、券商傾偈，一傾到政府政策，對方就立即放低電話唔肯講落去，直情斷線！點解會咁，費 事畫出腸啦。有人築起一座皇宮畀你住，但在內不准亂說亂動，宮女餵乜你就食乜，你制唔制吖！」 台灣T有台灣文化，講新聞自由，台灣排名在香 港之上，更遠遠高於排名大落後嘅新加坡，當然唔會like新加坡嗰套，我地香港人亦會唔慣。碰啱學生Y與同學到吉隆坡一行，坐巴士去新加坡一轉，由一位當 地學生帶往牛車水及市中心一行，好讚嘆新加坡之建設，觀感與左丁山相同。左丁山笑佢：「你做過公民黨義工幫手競選嘅噃，唔覺得新加坡限制自由咩？」學生Y 話：「都幾迷惑，佢地真係建設得好過香港嘅噃，真係要從新諗一次民主投票選出嚟嘅獨裁係唔係好事！」此乃新加坡paradox，不容易解釋，但新加坡人今 年都膽敢用選票嚟警告人民行動黨，搞到新加坡要成立委員會檢討內閣部長之超高薪酬（按：意即減薪），畢竟人民有咗錢之後，想法與未溫飽時期有好大不同。 |
||||||