樓市從現價跌三成，梁特首民望是否可以反彈三成？樓價下跌三成，是否好多人會踴躍買樓，益吓首次置業人士？樓價與政府民望嘅關係，相信無人可以講得透徹，所有人都係靠估，一啲政府喉舌報也說不出一個所以然。政治上，如果樓市跌而特首民望不升，佢推出咁多辣招，究竟有何目的？凡公共政策皆應有一個預期目標，但政府對印花稅、SSD、BSD嘅政策效用，只係含糊其詞，講到「穩定樓市，避免泡沫發生」喎，玄之又玄。如果推出辣招目的係為咗幫助年青人首次置業，則樓價起碼要跌一半，即沙田第一城細單位跌到二百萬元以下，如果樓價唔升唔跌，在現價位橫行，年青人夫婦仍然難以置業。但樓價若真的跌咗一半，有冇人買樓呀？睇吓2003年就知，當年樓宇成交紀錄低到極，大把人唔敢買樓（包括左丁山在內），麗港城第四期22座（建築面積644呎）一個單位以130萬元沽出，點解唔係我買咗呢！香港人往往在樓價認真低殘時唔敢入市，樓價上升時才搶住買樓，故此梁振英真的推低樓價嘅話，只有小撮最聰明嘅投資者得益最大，唔係大多數普通人。
梁政府除提高印花稅之外，同時要金管局配合，收緊按揭，金管局係政府一部份（雖然有天真人士話唔係），當然要合作，事實上所有央行官員都唔鍾意樓價大升特升，天生傾向就係壓抑樓價，故此陳德霖自然幫政府慢打鑼。不過銀行界有人傳出消息，陳德霖係曾蔭權陣營主要人物，曾做過曾特首辦公室主任，有此因緣，話佢唔係唐英年陣營人馬，點都冇人信。誰知人算不如北京算，唐英年做不成特首，陳德霖頓失政治依靠，雖然佢與周小川、王岐山相識多年，有淵源，梁振英想郁佢唔係咁易，但明年2014，陳德霖步入六十歲退休之年，要佢退休，大條道理啫。至於有何人可以替代陳總，梁粉陣營梗係會諗定先，冇理由輕易俾陳總自動延期做耐啲嘅，希望梁粉之中，唔好搵到一位丟面大律師之類嘅人啦，起碼要搵到一位好似羅康瑞咁嘅人物做機管局主席，其他人都順氣啲吖。全世界政治領導人都用人唯親，但在「親人」之中，都要搵叻人先至得㗎，梁先生要搵人替陳德霖，唔好急就章呀！ 