帳簿 Money Cafe
http://moneycafe-icable.blogspot.hk/2013/09/blog-post_17.html永亨主動公佈，獲數名潛在買家洽購，實屬罕有。
中環分析員指，靠通告，製造炒作，推高股價，從來不是馮鈺斌作風。由於有第一個罕見，於是造成第二個罕見，股價一開市升四十八蚊，收市價計，單日市值多一百零一億，夠買一間創興，或最少四分一間永亨。
豬仔不會爬樹，但市場必有水魚。永亨賣盤，一時間成為近十年機會率最高一次，馮鈺斌間接上向王守業、李國寶先送中秋大禮。而永亨股價及本地銀行股表現，在在十年難得一見奇景，如果要形容，本港銀行股等同一條海鮮，適逄休魚期，既可以價錢平平無奇，即一文不值，亦可以隨時成為無價寶。
誰是永亨買家？某程度上跟預測聯儲局主席一樣具備風險，薩默斯大熱，結果爆冷退出。而刻下國壽再被盛傳熱門永亨主人，拆局訪問五名銀行股分析員，大部份予以保留。
國壽跟永亨拉上關係，要數零七年。證監會披露國壽有意購入紐約銀行旗下一成永亨股權，而由於永亨事別七載，主動透露或會易手。市場到底係咪僅僅按順理成章假設，而認定國壽是買家，值得研究。
首先，現在的國壽，無論股價，盈利能力方面，已大不如前。第二，零七、零八，環球還高舉綜合金融控股概念，馬明哲更振振有詞，金融超市為明日趨勢。
結果呢？
國壽並非窮，但以目前償付充足率兩倍二左右量度，亦談不上有錢，三，四百億食一間永亨，形同一位年事已高長者，有心無力也。更甚，環球監管要求日嚴，任何一間有財政能力金融機構，目前估值不逾倍半，技術上已經違反高估值，收購低估值項目原則。
更甚，收購完成後，金融機構既要做商譽攤銷，而手持永亨股權亦不能計算成為一級資本，萬一本港資產市場有咩冬瓜豆腐，豈非RBS收購ABN翻版？？
簡單而言，分析員認為，縱使市場有水魚，但水魚未必是金融機構。而下一個疑問係估值，點解一定會二點五倍呢？二點五倍呢樣野，近因可能來自創興銀行不斷充斥收購新聞，盛傳價越傳越高，遠因當然來自近幾年多宗併購作價。
招行買永隆三倍P Book，市場認為屬於目前的參考估值，係咪過份武斷，其實需要諗諗。
一，當日招行用三倍買永隆，當時招行P Book超過四倍，但現在邊間有？
二，當日永隆假假地有百分之十一股本回報，但目前無論東亞，永亨、大新股本回報均低於半年水平。
兩倍半對潛在買家，就算係水魚買家，其實異常高昂。特別要留意，本港銀行股現水平P Book，一至兩成其實有物業重估因素谷大，令到P Book形同一個Inflated P Book，即谷大「帳薄」!
計算呢個因素，兩倍半既永亨，純銀行業務其實高達三倍左右。說到底，馮鈺斌七年回想，最大遺憾可能係當日拒絕招行，成就了伍家!!
騎劫 Money Cafe
http://moneycafe-icable.blogspot.hk/2013/09/blog-post_19.html其實整個夏天，聯儲局官員不斷向外發放經濟點好點好信息，不單形容復蘇有幾強，甚至講到自己如估迫切會急於退市，等經濟自行復元。
原來一切是假象。
出人意表，當市場幾乎一面倒估計聯儲局會開始減少買債，伯南克卻告訴大家，之前估計原來是過分樂觀。
值得注意是，六月時曾提出，會一直買債直至失業率回落至約7%，今次伯南克在記者會上，拒絕再重提舊事。
只是維持前贍性利率指引，即除非失業率回落至6.5%以下，和兩年內通脹預期不超過2.5%，否則聯儲局仍會維持超低利率一段時間。
記者會上，被形容前言不對後語，華盛頓郵報批評伯南克發出混亂訊息，像一時話延遲退市是希望、可以觀察更多數據；
轉頭又表明年底前，可能會縮減買債規模。
整件事最吊詭，其實係市場早已認同伯南克自己一手建立的管理預期中、估計當局會減少買債100至150億美元。但始料不及, 係伯南克自己一手打破番呢個預期!!
觸發聯儲局突然轉軚, 多間金融機構認為，跟債息大幅上升有關。十年長債息率
由伯南克五月份首度暗示年內退市, 四個月內一度抽升約1.5%。
顯示市場預期，當局會提早加息，而非單單減少買債。
口說不會受市場擺布、但全球最大債券基金太平洋資產管理稱，聯儲局失去管理市場能力，退市步伐更困難。
末日博士麥嘉華更直指，相當擔心聯儲局已經失控，一旦耶倫接任主席，形同宣佈量寬成為常規政策。
多間大行推遲聯儲局啟動退市時間表預測，大部份預期要到明年，高盛更相信，寬鬆政策會維持多好幾年。
伯南克不單破壞一手建立信息透明度，更為市場埋下更大不明朗。英國金融時報更直接批評, 伯南克一直致力提高當局政策透明度, 之前主動披露退市路線圖, 正當市場做好退市的心理準備時, 當局卻按兵不動、令投資者感到混亂, 影響聯儲局政策的公信力。
有留意昨日記者會, 伯南克主持記者會期間，兩目無神，發言口震。好明顯，自知決定令市場預期落空，而呢個令市場落空決定，並非佢要AHEAD OF THE CURVE，而係遠遠BEHIND，簡而言之，係被市場成功騎劫。
事後回想，到底今次伯南克中秋派月餅。一盒四大個，金，股，匯，債，人人有一個，到底所謂出乎預期不退市，係央行造成既驚喜，抑或市場故意製造既出乎預期？
一切從七，八月份打起，數據仍然時好時壞，惟債券息率不斷行先，華爾街大行持續預期九會會退市，局方理事亦不斷轉軚。或者講到底，老伯一句錯誤說話，導致今日出現既暴力或升市之局。
美國近一個月，幾乎落筆打三更。想打敘利亞，衰左、要薩默斯當主席，衰埋，連退市計劃亦被市場曲線強爆。
QE無限炮。有人讚力拯經濟於既倒，更有人認為，QE可以攞諾貝爾獎。Oh please!!!三十年代德國，日本，老早啟動量寬，結果發生咩事？所謂諾貝爾獎，極其量係通脹獎，或曲線製造和平獎。
美林日前提過，半個十載，如果聯儲局仍然堅持經濟一般，其實證明經濟問題之極，QE
撤底失效!!!
麥嘉華最錯係認為，伯南克進一步令央行主導，但聯儲局已失信於市場，公信力前所未有崩漬，伯南克有生之年，一定會記得二零一三年的中秋，係佢蕩然無信的一日，因為佢行動表明，央行係唔識退市!!!
五毫秒 Money Cafe
http://moneycafe-icable.blogspot.hk/2013/09/blog-post_25.html五毫秒、即是千分之五秒，相當於一隻蜜蜂拍翼一次速度，人類肉眼可能難以感受。
但上星期三、在聯儲局議息期間，一個在五至七毫秒之間預早發放消息，就可能令部分大行賺到盤滿缽滿。
芝加哥一個市場研究機構Nanex表示、聯儲局議息結果，在美國東岸時間下午二時正公布，但他們分析過交易數據，發現芝加哥黃金期貨價格竟然比紐約期金早了5至7毫秒開始上升，期間涉及的合約總值高達8億美元。
由於聯儲局總部設在華盛頓、按地域計算數據運送速度，紐約會比芝加哥快5毫秒，取到聯儲局議息結果。
但何以今次芝加哥的期金價格、升得仲快過紐約﹖
機構惴測可能是芝加哥的交易商預早幾毫秒，收到消息。
消息有機會預先泄漏、可能與傳媒機構有關，金融時報報道，聯儲局一向會預早在議息結果公布前10分鐘，在一個密室內，預先分發給新聞機構代表，但期間必須承諾，將會後聲明內容保密，即香港熟悉的Lock up.
其實早在當日收市，美國已經有網站指出，期時單單黃金成交忽然有三億美金，一殺那間急升十一美元，事隔更一星期，被指異常成交增至最少八億美金。
按美國媒體同聯儲局既定協議，以議息聲明為例，一概提早十分鐘派發，而當日安排為，下午一點九入房，一點十派稿，兩點正式發佈。
從芝哥加交易所成交，及時間上睇，可能性有三 :一，有媒體提早放料、二，唔覺得襟錯制，三，一切其實合法。
對於故意提早外洩可能性，市場斷言排除，一、有心外洩，會更加早，犯不著五毫秒之前先出手、二，被鎖房記者及相關媒體，事先跟聯儲局有白紙黑字協議，表明不得早洩，技術上媒體無可能故意犯法。
襟錯制，或者提早將公佈，上載到一個EMBARGO SERVER，但意外地被提早開啟，可能性不可排除，但目前美國媒體並無報道涉及的關鍵，就係聯儲局提早派發公佈，到底屬於HARD COPY，定係電子版本。
基於種種，美國媒體幾乎結論，今次漏料事件，其實屬於一切合法。點解咁講？
原來，高頻交易商分秒必爭，快零點一秒，可以構成額外多賺十個巴仙。而包括路透，DOW JONES呢的數據供應商，形合需求，近年就為呢批高速客戶度身訂造服務。
簡單講，數據供應商會向客戶收取較貴費用，並利用本身具備既高頻傳送技術，在數據正式發佈時間，向客戶準時發佈。由於用既「水喉」唔同，既使發佈時間一樣，但高速客戶接收時間，有統計指，最多可以快五秒左右。
包括全美幾大財經頻道，以及部份通訊社，其實老早於勞工部、商務部、及聯儲局設有高速傳送設備，而經濟學人去年亦報道話，最早啟動呢個為大鱷提供快速服務供應商，正正係道瓊斯。
高速傳送配合高頻交易，技術上無違規，因為現時無規可言，遺憾係監管當局，只叫關注，卻沒有能力辦事!!
再見．阿里 Money Cafe
http://moneycafe-icable.blogspot.hk/2013/09/blog-post_2124.html不出所料，香港資本市場未有緣襯得起阿里巴巴。
抑或根本唔想相襯?
估值千二億美元，投資者終日朝思暮想、期望阿里巴巴成為另一隻騰訊，再創科網股神話。
不過一眾股民要失望而回，阿里巴巴與港交所就上市進行的談判，最終宣告破裂，阿里巴巴改為考慮到美國上市。
歷時多月的談判、關鍵是創辦人馬雲，希望在上市同時可以保留公司控制權。
由最初構思以AB股形式掛牌、被拒後改為提出以合夥人制度，由公司目前28名合夥人，提名上市公司董事人選，再交由股東大會表決，不過最終仍被證監會提出反對。
消息指，阿里巴巴已集中研究美國上市計劃，目前已聘請當地法律顧問，但仍未委任上市保薦人，知情人士指，那即意味上市計劃無法在今年完成。
錯失這隻「吸水大象」、港交所應算是最大輸家，阿里巴巴原來的上市計劃，可望集資高達1000億港元，是繼2010年友邦上市以來的集資王，可惜雙方始終傾唔掂數。
都係李小加盞鬼，在網誌撰文，化名市場先生、程序小姐、道德先生、未來先生，總之就是要不點名指近數周關於投資者保障、股分架構及投票權的討論不絕，總之就是意見多多。
不過小加不諱言，港交所職責是要將公眾利益放在第一位，甚至高於港交所股東利益，而且個別公司上市決策、均由上市委員會和證監會審議，絕非他一人可以左右。
阿里巴巴是在午收市後無耐，四大外國通訊社幾時同一時間公佈，巴巴遠赴美，放棄香港了。
如果逐一比較報道，用字、內容、幾乎千篇一律，難怪中環人話，所謂消息人士，擺明屬於一個單人電郵，誰是寄件者，心明肚明。
波係圓，市場係變化萬千，賓卡話，未見馬老闆紐約響鐘一日，仍然對阿里巴巴美國上市半信半疑。
從時間上，阿里巴巴今年之內美國上市，機會等同於零、馬雲既要錢，亦要權，棄港取美，但紐約最大敵人係集體索償，美國玩野，話馬雲賣假野，到時哈哈哈，恭喜!!
馬雲放料未必足以令本港上市角力就此曲中人散，且看下回分解。
大孖沙 Money Cafe
http://moneycafe-icable.blogspot.hk/2013/10/blog-post_3.html華資大戶近期動作頻繁，先有誠哥，再有四叔，完全熱鬧非常，為沉悶股市帶來一點兒刺激!!
誠哥賣、拆、拆惹來撇資疑團重重，相比之下，四叔收三十億將名下煤氣、恒發、小輪等上市公司股權，售予恒地，背後動機就更加複雜。
有人認為，四叔睇淡煤氣，因為公用事業無前途，但同樣可以反駁，既然睇淡，根本不會售予旗下上市旗艦，意義絕對不大。
有人又認為，四叔用套現所得，既回購農地，亦有資金投放增持恒地。但三十億左右，四叔犯不著如此大動作。
於是，更多猜測，四叔其實對樓市不樂觀，所以變相令上市旗艦持有更多現金流業務權益，抵消賣樓業務表現影響。
其實整項交易佔恒地NAV大約一個百分點，每股盈利提升微不足道，咪玩啦!!!
反而，美林認為，四叔可能正式啟動接捧分家安排，說法更來得合理。
經過一次三十億交易，恒基發展股價大升兩成一，市值僅僅多不足四億，叫做突破20億大關!!
「僅僅」兩個字，背後意義在於恒發現時形同殼股，但既然殼股，可塑性就會更強，當然亦更好炒!!
誠哥，彤叔早有安排，並且落實，簡單言之，繫於人人有分大主題，既然如此，正如鄧聲興博士觀察，恒地之外，再製造多一隻足以比併，資產相若旗艦，家傑，家誠各一，實為合理。
恒發的故事因此就會更有有創造性。
今非昔非，恒發由於接近空心，每股資產值較現價幾乎有近溢價，私有化機會等同於零、至於由恒地私有化煤氣，一，恒地負債大增，不化算。
二，恒地綜合企業股形象，會令折讓更大，無著數。
剩下來，恒發一旦成為未來可造之材，四叔有咩資產可注？答案無人會知、但四叔名下大量農地，單恒地農地以市價計，每股隨時值三十蚊，可以一諗!!
再唔係，唔想兩兄弟日後相爭，本港地產歸恒地，內地地產屬恒發，亦得，更大憧憬當然是四叔私人投資「兆基財經」，一旦借殼上市，概念可以無限發揮，分分鐘成另一港產巴郡!!
總之，有得估，無痛苦!!! 買得中，有排讚!!!
要留意，相比以往創造價值時代，華資大戶相繼忙於體現價值，如果信華資大孖沙眼光，準繩度的話，唔通真係有危機??!!!
屈臣氏 Money Cafe
http://moneycafe-icable.blogspot.hk/2013/10/blog-post.html拒再見記者，超人2013年下半年真係「的」起心肝搞DEAL，而且仲相當密手。
由報道所見，似是由和黃中人放料，特別是講到霍大班英明神武，好難相信不是局中人所為?
百佳的真命天子仍未出現、和黃已經將焦點，放到分拆零售業務旗艦屈臣氏身上。
以經濟日報報道，和黃考慮在12至18個月內分拆屈臣氏上市，初步集資介乎80至100億美元、以出售25%權益推算，屈臣氏市值超過3000億元!!
大行一直認同，和黃零售業務是系內最有潛質增長業務，瑞銀及大摩就估計、和黃零售業務每股資產值介乎46.8至48元，佔整體資產比重近三成，遠高於系內電信及基建業務各佔15%比重。
不過分析員亦關注、索價30倍市盈率分拆，是估值偏高，雖然屈臣氏業務遍佈歐亞、與其他零售集團業務難以比較，但以亞洲為主的牛奶公司及美國藥房及零售集團Walgreens、市盈率亦只有23至26倍，仍遠低於和黃要求估值水平，反而毛利率就高於屈臣氏。
又幫誠哥計下數、如果三項計劃成功，出售百佳的意向價約300億，電能分拆港燈，上限集資390億元；而分拆屈臣氏上市，又套現最多780億元。
加加埋埋、長和系最多套現共千五億，等同和黃市值近四成!! 誠哥好等錢使?
未必等錢使，但減債目標明確!!
李嘉誠早前曾透露，集團要進行全面減債。大班霍建寧更講明、未來幾年要將淨負債比率控制在25%以下，而家一分拆，瑞銀估和黃負債比率，已經由32%降至20%左右
當中又以分拆港燈的減債目標最明顯，根據電能分拆建議，港燈將承擔400億至500億元負債，而由於電能實業減持至50%以下，故港燈債務不會併入集團的綜合負債內，成功減輕負債率。
努力減債，好似沈大師所言、不排除是誠哥睇淡經濟前景，不過更肯定是隨着加息預期升溫，一旦利率持續上升，高負債將帶來利息支出上升，將拖累集團的盈利能力。
高盛提出一個問題、在今早開市埋位都有討論過，就是零售業務在系內的EBIT 回報，是目前系內最高，去年達18%，估計到2015年更會達22.8%。
分拆之後，和黃會失去增長最快業務，除電信外，幾乎成為一間控股公司，股東會問，套現資金會點用先?
其實分拆固然可令資金回籠，亦可改善系內資產負債表，從中減債，但點解個個都話誠哥係為日後的潛在收購鋪路?
趁高位減持資產、留番錢在自己口袋，呢類野一向都係誠哥最「洒家」，點解一定要使出去先?
分拆 Money Cafe
http://moneycafe-icable.blogspot.hk/2013/09/blog-post_30.html電能拆港燈，豈止一個「拆」字，咁簡單?
口痕友話，從建議中分拆保密程度、涉及財技、名義集資最多四百億，實際集資隨時過五百億，背後話事人非霍建寧莫屬。
是否高下立見言之尚早，但撤資疑雲，隨著誠哥路經飯局兩星期過後，又再升溫。
一，分拆等於賣啦，最少可以賣夠七成。二，論業務重要性，電比百佳更重要。
三，八五年，和黃向置地買入港燈後，結果置地!!! 難道？？
二千年，誠哥本港直接持有上市公司跟今日比，數目肯定少過現在。
因此分拆一方面有違誠哥提過，上市公司唔想多構想，但貫切誠哥沒有撤資講法，始終，名下本港上市公司資產愈做愈大，不會越少!!!
分析電能分拆港燈，與其重點體現價值，瑞銀、里昂報告似乎最具功力，題外話，里昂公用股分析師，幾乎里昂唯一最有叫坐分析員。
按兩大行說法，分拆難掩集資之餘，舉傾效應軟集資，其實最具影響。
一，電能現金流在額外多最少五百億，呢個數足夠收購一間企業價值五百四十億美元公司，遠超長建、電能收購英國項目涉及九十億美元企業價值。
撇除電能有錢無地方使涉及問題。市場忽略一件事，就係長建一直屬於鉅哥BABY。經此一拆，兼強調日後港燈僅按比例入帳，太簡單了!!
電能債務大減，從而令長建債務亦減，技術上財務狀況就更容許印公仔紙再做收購。
明顯，由早前拆件賣雍澄軒，以及是次大比例分拆港燈，巧合之處是，前者主管範圍屬於茂波局長，後者則為錦星局長管轄。
誠哥對當今政府有保留，又會繼續城中討論。
惟外界同一時間忽略一件事，誠哥今年以來三番四次強調要減債。從長和系債務睇，和黃一定最多，有趣今年發生幾件事；一，長實更換核數師、二，今年正正一月一日，會計準則廿七條，有關附屬公司綜合債務入帳規定生效。
按此計算，長實會由淨現金公司，變為因應要綜合反映和黃債務，令公司負債超過九百億。
而更有趣是，如果翻查長和中期報表，上半年長實帳目仍然無需要做CONSOLIDATE，換言之，PRICE領軍之下，俾佢地揮底左。
但分析員指，即使電能拆港燈跟新會計準則無關，長和系連番動作，似乎證明誠哥無講大話...佢的確好想減債，而背後原因似乎在於，一，息會升、二，經濟未必一如預期的地，等機會執平貨，預留現金，就大把機會!!
利潤管制協議目前准許回報為百分之9.9，檢討過後再提升，機會是零、維持近百分之十，機會低於一半，而准許回報每跌一個百分點，港燈盈利額外受影響8%。
似乎順理成章，是否投資於呢間過百年老店，當然視乎派息比率，而當年二公子分拆電盈搞出個香港電訊信託，今日回看表現，似乎股價已說明一切!!
但更甚係，誠哥行先，「小米高」情況更為尷尬，中電更受利潤協議影響，而中電海外業務亦相當不滯。
誠哥今次原單出題考起市場、考起錦星局長、更考起「小米高」!!!
科網股 Money Cafe
http://moneycafe-icable.blogspot.hk/2013/10/blog-post_7.html現市況之下，科技股值幾錢，等於賭檯估開牌一樣。
雲遊話值錢，網龍又話值錢，金山騰訊全部都話好抵!!
當傳統業務公司廿倍市盈率嫌貴，科技公司三十倍合理，到不久將來，求其一間去到八十倍，咁七十倍一間就變成好抵。
市盈率係咪用作科技公司估值衡量，從來備受爭議。要老實的話，科技公司真正估值推算建基於三個元素：人，平台，以及想像空間。
TWITTER上市，觸目之前除上市地屬紐約交易所，或納斯達克之外，更實在為估值問題。
最新講法，TWITTER值一百廿八億美金，一百幾十億到底數字遊戲，抑或公正客觀，由市場決定，市場肯俾，就即合理。
如果睇睇呢間公司，二零一一年，根據公司內股權交易計算，大約值八十億，今年一月，BLACKROCK向員工換股，變左值九十億，到五月，另一間私募基金涉及股權交易，又變左值九十八億。
換句話，日子越拖得耐，TWITTER就越值錢，而呢個籌碼鬥大遊戲，隨公司上市帶出一個問題，上市咪即係估值見頂？
用戶上，TWITTER大約二億，佢都值一百廿億，新浪，騰訊可以炒到更高，TWITTER擺明係貴。
但華爾街要SELL一樣野，功力在於令市場對問題視而不見，聽而不聞，凡事從好方面想。
一，TWITTER用戶數據資料值錢。二，美國大戶經常利用呢個平台發佈資訊。
三，上市公司政府均可以透過TWITTER發佈公司消息速遞等等。
同樣有利估值在於科網公司估值比較對象。TWITTER要計合理盈利及增長潛力，結果FACEBOOK成為參考。
用TWITTER盈利，用戶，以毛利率，公司到2017年，收入就會多達五十億美元，比依達多達十倍。
如果用2017年預測市盈率的話，豈非單位數字？
講到尾，科網雖屬新經濟，但估值合理與否，市場仍然流於原始時代，你比我，我比較你，再加一定想像能力，呢個或者真正體現新經濟行業既創意無限!!
題外話，說到科網熱潮，令人不得不再關注阿里巴巴。
呢幾日又有消息稱、馬雲來港為上市作最後努力。但同時又有報道指，阿里巴巴放風會考慮到上海掛牌。
綜合不同消息，其實港交所的確有為馬雲開綠燈，只是馬雲個人主義太強，不懂妥協，令上市告吹。
由於軟庫願意將投票權轉讓予合夥人，令合夥人持有近四成投票權，合符規定。
不過對於港交所開出一系列條件，包括降低股東大會提名董事重選次數至一到兩次，同時合夥人制度設有三年有效期，只要馬雲願意，九月已經進行上市程序。
但金融時報Lex 所指，對於容易發脾氣的馬雲，這種要求及質疑、被視為來自官僚主義笨蛋的無禮冒犯。
結果這個阿里巴巴的千秋萬代傳承計劃，一開始就註定、不會在香江這個彈丸之地誕生。
真好彩!!
自製減辣 Money Cafe
http://moneycafe-icable.blogspot.hk/2013/10/blog-post_8.html終於有發展商行頭劈價，震撼市場!
震撼之處係一向高溢價、創天價嘅新地，劈價推出九龍站天璽貨尾。
而且比出、前所未見嘅稅務回贈，最平嘅入場單位，大拿拿慳成三百幾萬，變相劈價兩、三成。
亦都等同、完全補貼海外買家要俾嘅稅，甚至透過900日超長成交期，抵銷新版SSD嘅規限。
發展商否認咁做係同政府作對! 但無可否認、所有折扣都係突破「辣招規範」，而劈價即時冰封二手市場。
代理認為將會掀起豪宅劈價潮、天璽貨尾劈價三成有效，吸番晒內地客、同公司客歸隊!
的確，政府堅決唔減辣，發展商唯有自製減辣、見招拆招。
又有超長成交期，擺脫額外印花稅綁手綁腳；咁到底天璽劈價清貨尾、係咪預示: 跌市嘅開始?!
天璽開出181伙、佔貨尾量300伙嘅60%，貨量一啲都唔少! 因為天璽今年以嚟、只係成到 8宗二手買賣。
呢批貨尾，平均呎價29098蚊，單計基本折扣14%，訂價25024蚊一呎，相比現時天璽二手價29000蚊，已經開低咗16%，反映新地、帶頭要量唔要價
個別訂價最低、1座星鑽璽56樓K室為例，實用435呎、原本訂價1301.7萬，呎價29924。
會員加唔用二按、再加180日提前成交嘅話，會先減14%，再連同七成稅務回贈，折實七折價係930萬，相等於慳咗371萬，呎價21400蚊。
對比番星鑽璽今年以嚟、接近質素嘅細單位，呎價要29000蚊，今次係低咗 26%、的確有殺傷力!
更罕見係、雖然天璽已經係現樓，但新地仍然比出、超長900日嘅成交期，係現樓新盤當中罕見咁長，相等於、買家喺兩年半後收樓嗰刻，已經幾乎脫離加強版額外印花稅嘅規限。
市場消息就指，兩日收票超過300張，相對第一批181伙，超額認購0.7倍，反映策略收效。
消息仲話、基於新地高額補貼7成印花稅，入票嘅人當中、公司客、同內地客比例，各佔一半半，簡直重現九龍站新盤嘅客路。
天璽貨尾量係得300伙，照現有反應睇、大有機會清到貨。
但係二手市場、就陷入半放棄狀態，唔上亦唔落。
其實九龍站業主、實力派居多，唔會揀呢刻風頭火勢、同大發展商硬碰。
天璽劈價、唔只全面凍結西九龍，遠到去大埔嘅海鑽. 天賦海灣都受到牽連，代理話，部分買家變得猶疑，現價仲值唔值?
如果呢種「猶疑」蔓延開去，樓市很快就會出現連鎖效應，加上發展商呢幾個月去貨心切，今次自製減辣，很有可能成為樓市最後一根稻草!!
一個字: 「掂」! Money Cafe
http://moneycafe-icable.blogspot.hk/2013/11/blog-post.html週末去澳門大型賭場走一轉，不禁發現自己愈來愈「寒酸」!!
見到在一眾賭場大廳、賭客個出手闊綽，有統計發現，目前大廳平均最低賭注額，由兩年前300港元、已經跳升至1000元!!
甚至部分賭場去到最低消費要5000蚊、眼望就算玩角子老虎機，內地富客都係一張張一千蚊紙放入去，點會唔感覺自己「寒酸」?
即管做個比較、菲律賓賭場平均最低消費係60蚊，老牌賭城拉斯維加斯消費係150蚊，反而最接近有競爭力要數到新加坡，都係四百蚊左右，你話啦，點夠「馬交」玩?
難怪新鮮出爐博彩收入、可以達到破紀錄365億元，突破左三月時上個紀錄313億，今年頭十個月收入已經迫近去年總和，比起拉斯維加斯、高出足足六倍!!
由銀娛、金沙、美高梅同永利業績都睇到，第三季盈利都有雙位數增長、今年股價表現，遠遠跑贏恆指只有7%升幅
要衡量博彩股平貴、唔可以用傳統PE或PBOOK，黃師傅早有介紹大家要以股價對EBITDA值計數。
而家平均已經升至16倍、遠高於12倍平均水平，似乎估值有啲偏高，咁係咪應該聽沈大師講法，一年內不再推介博彩股?
由兩方面睇、業績增長以及內地因素。
前者今年估計博彩股盈利增長仍有18%、不過比起兩年前43%增長，已經有放緩跡象，而且估計明年仲會進一步放慢。
但我地反而更關注內地因素、今年以來內地旅客有增無減，一個黃金週就有12%增長，雖然時不時有傳聞新政府要打貪，限制內地旅客到澳門、但目前來看似乎通通係流料!!
阿爺不單沒有出手阻止內地賭客前往澳門，長遠看，更會允許更多城市開放澳門旅遊。
咁樣睇來，劉老師劉紹文真係神機妙算，上星期在敝台週年論壇、諸葛孔明上身算出一個「掂」字，已經告之各位，故事未完!!
不過佢頭炮之一、8月中首評澳門勵駿，今日就主動調低評級至中性，原因係賭枱下注額大增38%，不過賭枱贏率比平常低得多，令EBITDA只係有6%增長，遠差過佢地預期。
賭仔有云、贏輸早注定，當然唔可以怪公司Poor Luck，不過間間賭場都有能力在中場贏大場，獨獨係勵駿無運行?? 管理層係咪會檢討下!
不過話分兩頭，劉老師早在八月推介1680，當時股價3毫2有找，持至今日帳面仍有五成利潤。
呢個「掂」字、似乎劉老師暫時仲可以掛喺心口多一段時間!!
Next Page