認生得細粒自我保護 側田回港三年主力做幕後
1 :
GS(14)@2016-11-12 05:55:04感覺離開香港多年嘅側田，因為大陸真人騷而重現喺大家眼前，而側田早前仲接受《蘋果》訪問，剖白心聲，佢仲好多謝大家支持佢。講到當年佢決定去北京，除咗因為愛情，仲因為孤獨：「因為喺香港好孤獨，覺得做完嘢返屋企，困住喺四堵牆，感覺好難受，試過喺錄音室要睇鐘睇錶等放工，我最緊要係做到自己滿意音樂，但嗰陣時真係可能好多其他因素，令到我嘅靈感冇晒，冇咗嗰種feel，唔開心係呢樣嘢，所以要離開一陣透吓氣，所以去咗北京。」至於o依家佢嘅重心又喺邊呢？佢話：「其實我返咗嚟三年，我都盡量低調，因為一直覺得自己唔適合做幕前。主要做吓幕後工作，自己喺屋企其實日日都有寫歌，擺咗喺電腦自己欣賞，終於依家心態好咗，寫嘅歌有新鮮感，我自然個人又開心番，嚟緊plug第一首歌，畀大家聽吓我新一面嘅音樂風格，重點我係堅持做廣東歌。」講到自身，佢仲自認生得細粒冇自信：「我有好多嘢都唔完美，我好清楚自己嘅缺點，成日同自己講要改要改，不過0依家到咗中年，個人定咗性，真係好難改。其中一樣嘢，就係我份人係好自我保護，因為生得細粒。細細個成日畀人蝦，我又唔識蝦番人，惟有局住自己喺度嬲，咁咪唔開心囉，咁又為乜呢，我會盡量去改善呢樣嘢。」
來源:
http://hk.apple.nextmedia.com/entertainment/art/20161112/19831451