📖 ZKIZ Archives

電視撈飯：《衝上II》暑假收視高企

1 : GS(14)@2013-08-06 23:32:08

http://hk.apple.nextmedia.com/entertainment/art/20130806/18365202


                雖然撞啱暑假，部份觀眾或者離開香港，但無綫重頭劇《衝上雲霄II》收視依然高企，上周平均收視企穩30點（約193萬觀眾），最高32點（約205萬觀眾），但《師父˙明白了》只有23點（約148萬觀眾），周日嘅《超級無敵獎門人終極篇》有25點（約161萬觀眾）同《星夢傳奇》有22點（約141萬觀眾），齊齊受暑假影響輕微下跌1點。
PermaLink: https://articles.zkiz.com/?id=283623

電視撈飯：無綫節目巡禮出爐 嘉欣BB孭重飛視后大熱

1 : GS(14)@2013-10-01 17:19:37

http://hk.apple.nextmedia.com/entertainment/art/20131001/18444805

                無綫一年一度出動全台小生花旦吸廣告嘅節目巡禮，將會喺下個月7號舉行。今年巡禮推介嘅十幾部重頭劇中，鍾嘉欣起碼有兩部，除咗前日佢同馬德鐘啱啱煞科嘅《飛虎II》之外，仲有一部由嘉欣BB孭晒重飛、以佢做核心嘅民初劇《大藥坊》。

《大藥坊》由徐正康監製，嘉欣BB同陳展鵬、唐詩詠、黃浩然會有四角戀，劇情講嘉欣BB本來係民初一間大藥廠嘅千金小姐，點知間廠有問題令佢家道中落，加上發生好多疫症，嘉欣BB幫手拆解。以前女性嘅社會地位好低，嘉欣都好堅強面對，有多少韓劇《大長今》feel！無綫為力捧嘉欣BB，呢部完全搵佢擔正，好明顯係畀多個機會佢做視后啦！另外，嘉欣BB前日拍《飛虎II》時，因為馬德鐘失手而將佢摔落地受傷，不過佢前晚睇完醫生後，噚日即刻包住紗布去福州做嘢，好搏囉！

祥仔戀蓋鳴暉

                巡禮介紹嘅重頭劇，黎耀祥都有超過兩部，包括《大太監》原班人馬開拍嘅《太監五虎》，以及佢同蓋鳴暉嘅《水髮胭脂》，劇中祥仔同蓋鳴暉談情說愛，聽落幾重口味囉！另外，李添勝亦會有一部清裝喜劇，馬國明會剃頭同楊怡孭飛。其他重頭劇包括吳啟華主演嘅時裝劇、《老表，你好嘢！》續集、胡杏兒同吳卓羲嘅《醋娘子》、《M Club》、《忠奸人》、《My盛Lady》、《貓屎媽媽》同《守業者》等。

                                                                                                                                 至於梁家輝幫無綫拍劇個期會押後，而之前傳話黃秋生、洪金寶拍劇，以及重拍《流氓皇帝》、《無雙譜》同《獅子山下》都未有聲氣。苗僑偉（三哥）噚日喺中環出席活動，佢本來出年1月同梁家輝拍無綫一部警察內部鬥爭嘅新劇，但三哥話家輝個期有問題，所以拍唔到。失望？佢話：「可惜，冇計啦！」
版主：陳基征
PermaLink: https://articles.zkiz.com/?id=283794

電視撈飯： 展鵬祥仔連環撞車　孖住上香

1 : GS(14)@2013-10-14 16:40:23

http://hk.apple.nextmedia.com/entertainment/art/20131014/18462453

                陳展鵬、鍾嘉欣同阮兆祥主演嘅電視劇《巨輪》而家晚晚播，套劇播出以嚟似乎唔係好順利，成日俾觀眾彈穿崩，出現時空穿梭。唔只咁，近日劇中主要演員仲接連出事，繼上月底嘉欣BB拍另一部劇受傷之後，展鵬同祥仔接連兩日都遇到交通意外，所以噚日去澳門媽閣廟宣傳，入廟拜神上香時佢哋三個都特別神心。

護送嘉欣BB

                噚日《巨》劇一班演員展鵬、祥仔、嘉欣BB同貝安琪等人坐船過澳門宣傳，展鵬揸住佢架百萬名車，載住嘉欣BB去緊上環信德碼頭，準備會合大隊時，同一架的士發生碰撞，最後展鵬要坐直升機過澳門至趕得切。稍後喺媽閣廟宣傳時，吸引咗唔少澳門fans到場舉牌支持，一班演員仲呼籲在場fans上網投票，參加「我至like角色」活動，之後一班演員入咗廟拜神上香。

                                                                                               
            ■展鵬架過百萬積架跑車同的士喺干諾道中發生意外。讀者提供照片            ■展鵬載住嘉欣去碼頭其間撞車，之後報警處理。
攝影：胡恩宏
          
                                                                                                                       嘉欣講到單意外話好在冇人受傷，仲讚展鵬好照顧自己，佢話：「意外發生之後展鵬叫我上船先，佢留低處理。」至於當事人展鵬就話自己架車只係花咗少少，佢話：「架車買咗全保，同的士司機有共識，返到香港會同佢聯絡。」另外，前晚同人撞車嘅祥仔話撞車剎那感覺好奇怪，佢話：「打完白鴿轉架車滑行，我心諗千祈唔好劃花塊面。」事後佢仲幫對方司機搵拖車，亦不忘宣傳送埋自己演唱會飛畀人。
PermaLink: https://articles.zkiz.com/?id=283926

電視撈飯：無綫劇闖懲教所禁區 王浩信阿滕拍到喊

1 : GS(14)@2013-10-29 01:20:15

http://hk.apple.nextmedia.com/entertainment/art/20131028/18482112


                向來以紀律部隊做題材嘅劇集收視都唔錯，加上呢輪電視風雲風頭火勢，無綫開劇都要搞突破，拍咗兩輯《飛虎》嘅監製林志華，明年1月會開20集新劇《再戰明天》，以懲教署人員每日面對甲級重犯嘅故事做題材，劇情會有香港重犯嘅真實個案，演員有吳啟華、徐子珊、黃德斌同高鈞賢等，王浩信、單立文同滕麗名演囚犯，至於黃心穎BB同趙希洛就做懲教署學員。

心穎BB做啟華個妹

                個劇籌備經年，日前去咗赤柱同最新嘅羅湖女子懲教所實景拍攝節目巡禮，其中阿滕嘅故事，講佢喺女子懲教所湊大個仔，期間遇到啲問題。見阿滕抱住個小演員狂喊，子珊係咁相勸，真係好鬼入戲！而劇中本來係懲教人員嘅王浩信，因為犯咗法，最終自己都要坐監。監製林志華噚日喺電話度話：「我哋去咗監獄嘅實景禁區拍，懲教署安排囚犯唔喺監倉，劇組至入倉拍，唔會影響佢哋嘅運作，好少機會喺實景拍監獄暴動場面，我哋今次都拍到！」

                                                                                                                                                 王浩信喺監倉拍嗰時喊唔停，佢噚日喺電話度解釋：「因為喺監倉實景拍，裏面有囚犯嘅物品，入到去諗住如果出唔到嚟、見唔到啲親人就忍唔住喊唔停，扮囚犯嘅演員又話你入嚟就啱，有排玩呀，氣氛好似真監獄咁！」個劇睇落都幾新鮮，加埋有心穎BB飾演啟華個妹，應該吸引唔少宅男捧場。
版主：陳基征
PermaLink: https://articles.zkiz.com/?id=284038

【糧尾救星】頹廢撈飯邊款最正？港日韓人食呢啲

1 : GS(14)@2016-06-21 07:39:29

幾窮都好，一定要有米氣到肚！但係用乜送飯好呢？



又差唔多糧尾，仲食杯麵？點窮都要有啖飯到肚啩？飯呢樣嘢，平有平食貴有貴食，魚翅撈飯太唔環保喇，參考一下本地同日韓的撈飯法，就窮得嚟都可以食得有霸氣啦！

本土派：腐乳撈飯


腐乳撈飯，仲有辣有唔辣，唔太窮可以原粒撈，怕滯就半粒好了，再識食話啲就最好將腐乳由雪櫃攞出來後放至室溫，如果唔係會比較難撈；台灣的客家人仲鍾意將水果腐乳用來塗麵包，同鬼佬用芝士配多士差唔多啫！



韓國派：沙律醬撈飯


新派韓國人愛沙律醬，冇錢開飯惟有打開雪櫃，在飯面即啲沙律醬，再加牛油和砂糖，撈呀撈，韓仔就話味道似拌了cream的飯喇！不過傳統韓人食飯都係鍾意食鹹的，飯加牛油加豉油，撈勻，加多塊泡菜，正呀！



日本派：醃蛋黃撈飯


我哋都鍾意荷包蛋加豉油撈飯，日本人窮得來對食還是很有耐性的，將蛋黃隔起，用豉油和味醂醃蛋黃，一醃就醃幾個，6小時之後放在飯面撈飯吃，sashimi醃蛋黃第一天還會流心的，醃兩日之後蛋黃就會變實，應該又是另一番風味。窮還窮，以上幾款撈飯全部高糖高鹽，營養師黃榮俊指處理生雞蛋時亦要小心，醃蛋黃過程一定要用密封容器存放並置於雪櫃，「醃蛋黃時蛋黃最好被豉油和味醂完全覆蓋，味醂含酒精，如濃度夠都有一定的殺菌功能。」另外打蛋前一定要把雞蛋洗淨，因為雞蛋殼容易沾上雞的糞便，未清洗乾淨容易有沙門氏菌。窮人撈飯間中食下都幾「清新」，不過為健康着想都係勸大家盡量唔好令自己糧尾太多日喇！記者：容慧心



本土派的腐乳撈飯，懷舊味好重啊。　互聯網

台灣的客家人仲鍾意將水果腐乳用來塗麵包；同鬼佬用芝士配多士差唔多啫！　互聯網

韓仔食飯加沙律醬，仲要再加牛油同砂糖，甜飯嚟講呢……　互聯網



豉油牛油撈飯加泡菜，都係傳統韓仔……食法啱口味啲。　互聯網

日本人將蛋黃用豉油味醂醃鹹，窮住都食得咁講究，真係佩服！　互聯網

營養師黃榮俊



來源: http://hk.apple.nextmedia.com/su ... t/20160621/19662477
PermaLink: https://articles.zkiz.com/?id=302413
Next Page
ZKIZ Archives @ 2019