收市閒情：股海掙扎的鯉魚王
1 :
GS(14)@2016-08-04 04:03:58有一晚，我行去海邊，開個《Pokémon GO》，彈咗隻「鯉魚王」出嚟，望住佢啪吓啪吓，喺冇水嘅情況下好努力咁掙扎，我覺得我就係佢。如果你冇睇開《寵物小精靈》，一定會以為叫得做「王」，一定好勁。事實係，151隻寵物小精靈入面，鯉魚王堪稱最廢最廢嘅一隻。佢碌大對眼喺度跳吓跳吓咁，其實諗番，就好似平時對住報價機嘅我。上星期，見到隻德普科技（3823）星期四人踩人，星期五都死唔去，唔知邊度嚟嘅勇氣，突然覺得自己股神上身，0.192銀左右買咗啲。鯉魚王係一種連用爛魚竿都輕易捉到嘅廢物。德普科技莊家係比比鳥，咁我一定係佢眼中嘅鯉魚王，無啦啦自己跳上擂台，再使出唯一招式——掙扎。你眼望我望，佢心諗：「做咩啫你？」然後再你眼望我眼，食埋你。睇埋星期一收市價，就算全日反彈，我都未返家鄉。鯉魚王廢到一個點係，就算喺緩緩嘅流水中，都只可以隨波逐流。望番自己，我又何嚐唔係？Number降日日中，人炒乜我炒乜，高追中伏一條龍之事十常八九。不過，做鯉魚王有樣好，就係多同伴。只要去到海邊，無論係幾污漕嘅水，或者幾乾淨嘅池，你都會見到佢哋喺度拼命跳吓跳吓。正如落到股海，你理得佢係炒妖股定係炒基本因素，你都一定會見到好多同伴，同你一齊使出絕招——掙扎！你可能會話，鯉魚王進化之後，會變成超強嘅「鯉魚龍」！好勵志呀，我或者有朝一日都可以做方進新㖭！不過，玩《Pokémon GO》嘅你都知，要400粒糖先進化到，即係你要捉101條！鯉魚王始終都只係一條彈彈吓嘅鯉魚王；老散，終歸都係俾人劏嘅老散。我，又係我呀James。送首歌俾大家，係官方錄製嘅「I LOVE鯉魚王」，好洗腦，好慘。
https://goo.gl/mL87o7千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20160803/19720198
【呂志華手記】仍然好假的 「收市勁假」時段
1 :
GS(14)@2016-08-07 02:39:41https://hk.finance.yahoo.com/new ... E%B5-124210195.html
若問港交所為甚麼死心不息要推行收市競價（U盤）？就是要製造一個完善良好的平台給外資大戶造市賺錢。
‧經修補的收市勁假時段看似防範十分嚴密，杜絕一切造市機會，可惜現實和想當然是兩碼子的事，想得通不等於行得通。
若問港交所（００３８８）為甚麼死心不息要推行收市競價（Ｕ盤）？答案只得一個：港交所要提供一個完善良好的投資平台給外資大戶賺錢。這是港交所的官腔，說得明白一點，就是港交所要製造一個完善良好的平台給外資大戶造市賺錢。
八年前，港交所在一片反對聲中一意孤行收市「勁假」，擇惡而固執，結果導致○九年出現了滙豐（００００５）造市事件，滙豐在收市競價時被質低至三十三元，全日暴瀉兩成四。事件發生後，收市勁假匆匆收檔無疾而終！
假諮詢選擇性聽民意
港交所慘遭滑鐵盧後並未死心，原來是忍辱負重捲土重來。事前先做一輪假諮詢，再作選擇性聽取民意，收市競價又粉墨登場了。當然修修補補是少不免的，新的港股交易時段以最後一分鐘五個按盤價的中位數作為參考價，最大波幅局限於參考價的上下百分五之內，五至八分鐘期間落盤價只可輸入，不可更改或取消；最後兩分鐘期間隨機收市。
經修補的收市勁假時段看似防範十分嚴密，杜絕一切造市機會，可惜現實和想當然是兩碼子的事，想得通不等於行得通。至本文執筆時止，雖然新收市勁假只實施三兩天，但估計已有市場人士從實際環境中意識到潛在的造市危機。
這幾天炒賣期指的投資者，恐怕都會覺得每天四點股票市場收市後的十分鐘，期指市場突然較敏感波動，情況就和早上九時三十分大陸股市甫開市時一樣。我們且以八月一日期指市場為例。當日港股表現正常，期指四點前高低波幅三百二十四點，勁假時段短短十分鐘期指波幅已達全日波幅的兩成。
這時段期指的變化肯定受到競價的影響，倘若有人在勁假時段掛高或掛低指數成分股，這些股分不必真的成交，已可達到做市效果了。大家別小覷百分之五的上下限波幅，以為幅度狹窄，無造市誘因。其實這相等於期指一千一百點，以每點五十港元的價值計算，每張期指有五萬五千元的潛在造市利潤，一百張期指就有五百五十萬元的利潤了。
百分之五的上下限在人心虛怯、市況動盪如英國脫歐、歐債危機等情況下；又或是市場出現非理性亢奮時彈指可及，那些假盤肯定會對同時並行的期指市場極易產生震懾作用，影響期指價格成功達到造市目的。
另外，牛熊證亦是另一個造市殺戮戰場。今次引入的收市勁假交易時段，首階段不包括認股證及牛熊證，即兩者將繼續沿用目前的下午四時收市機制。驟然看來，收市勁假對這些衍生工具無大影響，但輪證收市價未能反映競價時段後的相關資產收市價，容易對小投資者翌日開市做成混淆。而且相關正股的競價收市價和四時收市價呈現價差，令輪證和牛熊證翌日裂口高開或低開機會大增，増加投資者局贏局輸的風險。
制度缺陷成發行商造市工具
最要命的是牛熊證會於下午四時收市，惟若相關資產的收市價在收市勁假交易時段結束時觸及收回價，將令牛熊證「即時打靶」，投資者欲止蝕沽出無從，明顯地是局輸，對持牛熊證者極不公平！此一制度缺陷恐怕日後會淪為牛熊證發行商合法造市殺倉的工具！
收市勁假最最最不公平之處，是持貨多者有絕對的話事權，他們若基於某些原因要把某股股價定於某一水平，只須把持貨一股腦兒在勁假時段推出便可做到。之前按持續交易時段最後一分鐘內五個按盤價的中位數計算收市價，顯然公平公正得多了。
這幾天市場太平無事，並不是說經修補後的收市勁假交易完美無暇，推出成功，只是造市的客觀因素尚未配合，大戶輪商暫時按兵不動而已！股票市場總有風高浪急的日子，意大利將於十月舉行憲政改革公投，歐債問題，美國加息等，當這些事件入市之日，小心就是他們收市勁假造市之時!
「大有大造（市），小有小造；若然未造，時辰未到。」收市勁假造市遲早再現，小投資者除了自求多福，免成大戶點心外，現在應開始籌劃怎樣再次反對收市勁假時段了。
收市閒情：鏡頭後的公司主席
1 :
GS(14)@2016-08-10 07:53:28上市公司主席，呢個title就算唔打得，都睇得呀！That's why唔少大陸佬呢幾年，咁鍾意喺香港買隻殼，然後同鄉親父老叔伯兄弟講，「我是香港上市公司主席！」上市公司，一聽就知架勢。但上市公司主席咪又係人一個，好似隻萬亞（8173）大股東楊榮義咁，唔小心買多咗股去到要提全購水平，但佢又唔想做G.O.，相信最後會俾證監會罰。你可能諗，「係咪做緊古惑嘢扮無知？」錯！聽講佢係真心唔小心。上市公司主席喺鏡頭前面好似好型，鏡頭後？我唔直接答你，我用例子答你。有一個城中超級富二代，雖然唔靚仔，但如果港女睇埋佢副身家，一定覺得佢係吳彥祖級咁正。你見富二代四張幾，行出嚟會超級嚴肅？你試吓去佢office睇吓你就明。話說佢office有個大架，放晒佢啲珍藏。你以為佢嘅寶物，唔係古玩就係玉器？咁你就錯喇。呢位富二代童心未泯，成個架都係Winnie the Pooh公仔。最好笑係有次同事行過見到佢突然除咗條呔，以為有咩事啦，點知佢幫Winnie the Pooh打呔，然後佢竟然滿意地笑。所以話，一個人有錢到盡頭，要笑，其實都係只係對住隻Winnie the Pooh……啲人話，上市公司老闆上咗岸唔使做。呢個係一個大話！有個上市公司老闆，白手興家之餘，平時見街外人，講嘢好得體又有禮貌。話說呢位老闆到今日公司上晒岸，仍好積極落手落腳做。有一日開會，有同事做嘢唔啱佢心水，開會時佢突然唔出聲。正當大家以為佢發火，佢拎個銀包出嚟，「呢度200蚊。即刻坐的士，拎番個腦返嚟！」好啦，咁又好多人會話，「上市公司假假地都有名望，對員工唔會太差啦！」又錯！唔少上市公司老細都孤寒到一個點！話說有間公司開party。而party嘅嘢食實在太豐富，包括薯片、汽水，完。所以話，上市公司主席都係普通人。咁上面講嘅係邊間公司邊個人？儍嘅，我當然唔會話你知，自己估。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20160810/19729771
收市閒情：深港通乃過期罐頭
1 :
GS(14)@2016-08-17 07:57:01昨日李克強一錘定音，落實開通深港通，正當不少戰友舉杯慶祝之時，我笑而不語。人最大嘅煩惱，就係記性太好。2014年4月11日，當日李克強堅定不移，決定滬港互聯互通。回首當日，李克強總理字字鏗鏘，「雙向開放」、「健康發展」，北水真正南下，山河壯麗。就喺呢一日之後，我決定跟住買張滬港車票，我仍記得我當時心中暗叫一句：「起飛啦！」結果恒指喺公佈後，第一日就跌市，如是者一個月內，跌足1,440點。秋刀魚會過期、罐頭會過期、連保鮮紙都會過期，但我想唔透，點解消息公佈一日就已經過期？不是說要一起健康發展嗎？李克強畀過期罐頭我，教我如何健康唔肚痾？於是我睇睇恒指圖，原來罐頭真的過期了，恒指於一個月前，已累升2,000點。世間最痛苦的事莫過於等待，港股一年後終於爆發。我當時只顧掃貨，港交所（388）、AH折讓股、券商股、內銀股，連可怕嘅殼股，我都不停掃，掃到得意忘形。甚至忘了一年前，我曾提醒自己，呢架叫滬港通嘅直通車係無brake，佢只可以一直咁開，一世只可以停一次，就係炒嗰陣。6月股災，大市炒了，李克強暴力救市，十隻有九隻A股炒埋一碟，結果當初口口聲聲的「雙向開放」，變成「單向獨沽」，港股慘成提款機。2016年8月16日，李克強再一次堅定不移「深化內地與香港金融合作」，要貫徹落實「發揮深港區位優勢」，特別強調「改革開放是當代中國最鮮明的特色」，我聽到就覺得恐怖，是合作有事就沽爆港股？發揮港提款機優勢？改你、革你然後開佢嘅放嗎？有燈就有人，我再睇恒指圖，恒指已突破九個月高位。過去一個月，恒指累升逾2,410點。李克強公佈深港通這天是鬼節，所以我會當他是鬼。我再也不會懷疑深港通是不是過期罐頭，因為，答案是肯定的。李克強再多一張深港車票，你說，我還願不願意跟你一起走？千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20160817/19739150
收市閒情：尋秦記之四叔天體盤
1 :
GS(14)@2016-09-01 06:20:42秦始皇帝，姓嬴，名政，時稱秦王政，畢生欲求長生不老。派人四處打探下，秦始皇帝早就修煉得道。今日的他，生於香港，惜時移易轉，再多的財富亦敵不過通脹。昔日一代帝王，英武銳氣；數千年後的今日，卻被小人困辱，打工捱騾仔，氣焰已消。對秦始皇帝來說，生活的小確幸，是數千年前的愛人阿房女一同得道，兩人生死相許。今日兩人為保持長生不老，必須覓出練功寶地，即係換樓；但前提是……要近北角返工。嬴政：阿房，此盤有何着數？聽聞單位奇細！阿房女：啟稟殿下，細就細啲，你今時唔同往日呀，將就吓啦。之但係你睇5樓啲單位，真係各有特色，絕對適合潛深修練。嬴政：願聞其詳。阿房女：啟稟殿下，先講E室，實用面積164方呎……嬴政：164呎？人住的嗎？阿房女：反正你千年道行，早已練成縮骨功，怕甚麼？最重要係，單位有540呎平台，比單位大2.3倍！冇瓦遮頭，餐風飲露，風味絕佳！嬴政：540呎！好！地方闊落，不單可以大量曬陳皮煉丹，曬多了更可拿出去賣，妙絕！阿房女：更重要係，平台打正對面就係明月大廈！單此一點，就說明此乃吸收「日月精華」的絕佳之地！嬴政：不過阿房，有平台，豈非會貴……我們現在國庫空虛……阿房女：放心，仲有選擇！C室唔單止細，廁所洗手盆仲要同廚房洗手盆共用，我哋長生不老之術再勁，亦會因為呢個充滿大腸桿菌嘅洗手盆而死，所以我會考慮埋A室或B室。嬴政：此兩單位看來不俗，平台50多呎，佔單位實用面積近三成，仍然可以曬陳皮！阿房女：殿下，你睇漏一個賣點啦！你睇吓個廁所加浴室！嬴政：何如？阿房……阿房（驚訝），此乃何事？阿房女：冇錯，喺正廁所隔籬，就可以開門出去平台。我哋食丹維生，如廁臭氣熏天在所難免，但此門一開，即時心曠神怡；廁所另一方嘅企缸旁邊同樣可以出工作平台！沖沖吓涼時要吹吹風，散一散悶氣，一流！嬴政：豈有此盤！竟然會有奇人異士，想到有人會沖涼時走出工作平台！妙絕妙絕！且慢，A室工作平台對面是樓，B室對面是商廈，朕豈非一不小心，就要裸露於人前，工作平台變「天體平台」？阿房女：殿下呀殿下，你唔記得咗，「欲練神功，必先自宮」嗎？反正都自宮了，冇相干啦。嬴政：你說的也是。對了，這個「天體盤」叫甚麼？阿房女：恒地（012）嘅尚譽，英文one Prestige。嬴政：Prestige，好名好名，絕對是「帝王級天體盤」。相信入住此盤後，我們修煉成精，指日可待。千頌C
http://www.fb.com/winbigwok代《趣BLOGBLOG》一周
來源:
http://hk.apple.nextmedia.com/financeestate/art/20160901/19755816
收市閒情：facebook打造鄺神
1 :
GS(14)@2016-09-07 21:44:29一個月前，我哋仲笑緊鄺俊宇寫鄺體，搞到「逗號很累」；但你又點會諗到一個月之後，鄺俊宇會成為今屆超區票王。其實，facebook（fb）係其中一個「造王者」。首先，十個有九個港女，都一定曾經喺fb like過鄺俊宇啲港女語錄。然後，十個有五個男仔，都會莫名其妙地俾女仔tag喺鄺神啲post。根據官方統計，截至今年8月8日，鄺俊宇嘅like數係16.79萬個。單以7月8日至8月8日一個月以來，獲粉絲對專頁嘅互動超過12萬次，係參選人中嘅「fb互動王」。鄺俊宇本身嘅知名度就係由fb度嚟。同樣，地區直選票王朱凱廸亦打入「互動最多十大參選人」之一，咁樣反映今時今日，要成為「票王」，一定要識玩fb。多得fb，令大家喺選舉宣傳期早段，已見到「鄺神」句宣傳口號：「讓世代改寫我們的時代。」然後大家雖然會笑一笑，問「到底，你，講緊咩呀？」但最少你知佢出選。然後一眾KOL又開始笑鄺體，令鄺體更加入屋。到真係選嗰日，大家都喺ＷhatsApp、Telegram知道雷動叫人投畀鄺俊宇，結果令唔少人都喺fb出post話「頂走鼎，投逗號」。一時間，fb只有逗號，見唔到句號。喺呢個moment，相信令好多人本來投唔落鄺神，最終喺羊群效應下投「逗號」神聖一票。
除咗鄺神外，仲有數據可以反映出，識玩fb對選情有正面影響。截至今年8月8日，地區個人專頁最多like嘅前十位參選人，以及一個月內十位最多interaction嘅參選人之中，同樣都有八位成功當選，至於剩番兩位唔能夠奪議席嘅，分別係同樣出戰港島嘅王維基同「四眼哥哥」鄭錦滿，兩人都係高票落敗。兩項數據同樣各只有一個參選人，係有中央選舉機器照住，分別係葉劉同周浩鼎。值得留意係周浩鼎雖然打入「互動最多十大」，但佢得到「嬲嬲」嘅數目，亦佔好重比例。至於周浩鼎最新fb like有1.65萬個，王國興fb like只有3,000個。雖然唔能夠話fb對兩人選情影響好大，但至少牌面上係，睇嚟fb like緊要過午餐肉。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20160907/19762552
北水退潮港股高位回落299點儲局不加息刺激短暫 收市僅升89點
1 :
GS(14)@2016-09-23 08:05:42【本報訊】北水退潮抵銷息口刺激，港股反高潮升幅大減！聯儲局一如預期按兵不動，恒指昨早段最多曾升近400點，一度重上二萬四關，H指亦曾衝破一萬關。惜在北水暫停湧港下，以滙控（005）為首的北水愛股拖累大市，大市收市升幅大為收窄。記者：余倩敏
美國暫不加息，外圍造好下，恒指昨早段一度高見24058點，重上二萬四關，惜刺激僅維持不足半日，臨近中午升幅開始收窄，恒指午後最少僅升13點，收市升89點或0.4%，收報23759點，恒指收市升幅較高位回落299點。
H指走勢更反覆，早段曾升2.4%重上一萬關，惟午後輕微倒跌17點，收市表現靠穩，升44點或0.5%，收報9893點，H指升幅自高位回落195點。
房託股造好 冠君漲4%
大市成交按日升逾三成，增至866億元的近兩周高，不過沽空金額六個交易日來首次突破100億元，增至103億元，大市沽空率亦見11.9%的9月初高位。美國年內或最多加一次息，息口敏感股造好，尤以房託股（REITs）表現最佳。恒生房託股指數升1.5%，創逾兩個半月最大升幅。冠君產業信託（2778）及領展（823）分別升4.1%及2.7%。本地地產股及收租股亦向好，恒生地產分類指數升近1%，九倉（004）與新世界（017）即市齊創52周高。
■港股昨曾衝上二萬四關口，尾市升幅收窄，埋單僅輕微上漲0.4%。 李潤芳攝
港股通近兩個月首走資
息口敏感股上揚難敵北水暫歇對大市的拖累，昨有8隻屬恒指成份股的本地地產股或收租股報升，包括領展、恒隆（101）及信置（083）等，不過8隻股份合共僅貢獻恒指25點升幅，相當於恒指昨日升幅不足三成。反觀港股通活躍股份三甲常客的滙控，昨單隻股份已拖累恒指下跌近35點。不過與此同時，北水湧港情況暫時不再，港股通結束連續逾七周淨吸資的局面，昨錄1.3億元人民幣淨走資，是8月初以來首次。多隻近期獲北水垂青的中資金融股，包括國壽（2628）、平保（2318）及中行（3988）昨均報跌，未能支持大市，同屬港股通掃貨對象的滙控昨亦下跌逾1%。大華繼顯（香港）策略師李惠嫻認為，美國本月不加息符預期，但市場昨日早段將之過份炒作，大市午後升幅收窄屬回復正常，但大市型態仍一浪高於一浪。她相信恒指能守住20天線（23385點），因資金仍充裕，而且短期未預見有利淡消息導致氣氛轉差，惟提醒早前在低位入貨的歐美資金後市或「食糊」，有機會造成獲利回吐壓力。新鴻基金融財富管理策略師溫傑則認為，恒指昨升幅收窄是由於有投資者鎖定利潤沽貨，而北水在高位暫不高追亦算正常。他又預計，恒指會在兩萬四關附近爭持，但倘北水繼續南下，相信恒指本月能再度衝破二萬四關。
來源:
http://hk.apple.nextmedia.com/financeestate/art/20160923/19779120
收市閒情：四叔的HCollection
1 :
GS(14)@2016-09-29 08:03:12如果講香港創意產業，四叔李兆基簡直係當代先軀！恒基地產（012）旗下新盤圖則，一次又一次衝擊市民大眾對「家」的認知。近期恒地四個最觸目新盤圖則，包括：「M巾盤」大角嘴利奧坊．曉岸、「天體盤」北角尚譽、「不能坐的馬桶」何文田加多利軒，仲有「599呎四房」長沙灣南昌一號，全部嘅話題性絕對一流！你覺得呢四個盤好冇人性？其實四個盤同屬恒地「The H Collection」系統樓盤，顧名思義啦OK？個盤行咩路線，由個「H」字已有迹可尋。話說，恒地話The H Collection物業風格，「均走高檔精品路線」，仲奉行五個「H理念」。根據恒地網頁簡介，單睇字面，其實呢四個盤都做足呢五個H有突！
Heart：恒地話要「用心打造」，「憑一顆心，建構令你喜出望外的品味生活，是我們的堅持」。品味嘅嘢，你識條鐵咩？將「M巾」形嘅設計套落去圖則，真係要非常用心劏客，先可以諗到點樣一層劏22伙。「每一構思，都用心追求美學與功能並重，諦造簡約而完善、優雅而舒適的品味空間」。恒地呢一段形容，睇多次，別有一番風味。
Hallmark、Handcrafted：喺恒地「名師美學」概念下，The H Collection物業講求「對美的執着追求，是引領生活昇華的階梯」。南昌一號600呎都冇，都可以間到四間房出嚟，傳說仲要有一個係套廁，真係冇巧奪天工嘅技術，都一定唔會搞得掂。所謂simple is beautiful，喺簡約主義之下，乜嘢都open、乜嘢都冇就最靚啦，舊時有open kitchen，今日有加多利軒open toilet，大家可以更open更坦蕩咁面對屋企人，同屋企人關係踏上昇華的階梯。四叔，用心良苦。
Harmony：「和諧，是理想生活的重要元素……恒地置地融合城市與大自然」。除咗open toilet外，尚譽廁所、浴室都有門直出露台或工作平台，沖沖吓涼又可以出去吸新鮮空氣，天人合一，與大自然完美結合，感受大自然同人類和諧。
Hospitality：殷誠禮待。咁嘅奇則香港人都衝去買，唔禮待你就真係天怒人怨啦！睇住咁嘅則，再望番廣告嘅description，對「無恥便無敵」又有多一點體會。千頌C
http://www.fb.com/winbigwok代《趣BLOGBLOG》一周
來源:
http://hk.apple.nextmedia.com/financeestate/art/20160929/19784928
收市閒情：傑青揭露真實香港
1 :
GS(14)@2016-10-12 07:51:14黃仰芳拎「傑青」，以為自己好傑出，於是衝出嚟同大家分享「兩年供斷樓方程式（經傳媒查證後實為兩年半）」，（聲稱）10年睇唔超過5套戲同concert、（聲稱）從來唔會同同事吹水或hea時間。你話佢唔配做傑青？我話佢直頭代表到香港現時核心價值！現時人人呻上唔到車，證明只要你上到車，已經係超人！畀錢個仔上車就已升格做慈父；黃仰芳俾人叫「傑青」，又有幾出奇？黃仰芳冇家底冇父幹，靠自己買到樓，兩年半供斷會，都算係叻女。係，佢係做傳銷，不過你睇吓以前拎過傑青嘅人，2006年傑青之一係何猷龍，超級「富二代」，每日開賭做莊家，對社會嘅最大貢獻？為賭徒提供精神食糧？根本黃仰芳拎傑青，係反映香港主流核心價值係，不問過程、只睇結果。你又會話，佢03年接受訪問時，講「金錢不代表一切」、「work-life balance才是最重要」；今時今日講嘅買樓方程式又係另一套。呢方面又反映佢喺「如何做世界女」方面有傑出成就，好明顯佢今次分享買樓心得，係知呢類topic最易做soundbite，證明佢係有準備。佢可能講大話，咁又點？梁振英、朱培慶都拎過傑青啦！當然，拎過傑青嘅仲有好多實至名歸嘅人，好似83年得主羅文、89年程介南、94年羅冠蘭、95年陳文敏、96年李麗珊、之後仲有梁美芬、葛珮帆、成龍……你仲未明「香港十大傑出青年選舉」最核心本質係咩？選舉由國際青年商會香港總會搞，簡單講就係小圈子選舉，就好似TVB搞個圍內嘅選美，個名前面加「香港」兩隻字，大家就以為「香港小姐」真係代表香港。根本做唔做到「傑出青年」，在乎嘅唔係你對社會有幾大貢獻，而係有冇人提名（所以佢有肥胡）。Sorry, this is Hong Kong。所以，特首選舉，認真便輸了。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20161012/19797850
收市閒情：唔好做搭升降機自私精
1 :
GS(14)@2016-10-19 05:23:07以下係「可能我個人比較挑剔系列」，本人好唔鍾意一種人，就係「搭升降機自私精」。一堆人等升降機，第一個人衝入去，然後行到最入，耷低頭，睇手機；第二個，一樣，行到最入發吽哣；第三個呢，行埋一個角搣手指倒刺；到第四個，一入升降機，即俾升降機門夾。好彩嘅，頭三個入升降機嘅人，總會有一個幫你㩒番開升降機門；唔好彩嘅，你就以身擋開道門。俾升降機門夾到最多都係少少痛，但如果第一個、第二個、就算係第三個入升降機嘅人，肯犧牲少少，放棄睇手機、發吽哣、搣倒刺嘅機會做一陣揸升降機人，第四個人根本唔會俾升降機門夾到。香港離地嘅人好多，事不關己，眼尾唔望。康橋之家前院長張健華，再次打甩性侵智障女院友官司，仲人渣到要討回訟費，之後仲辯稱「自己先係受害者」。留意番，張健華已係第二次被揭犯案！早於2002年，已涉嫌非禮兩名智障院友，之後用食物安撫，令事主口供前後矛盾，所以法庭裁定罪名不成立。到今次，再次甩身。有一樣，我唔明，兩單案相隔十幾年，中間張健華仲有做過啲咩嘢，咁大間護理中心，會真係冇人知？冇人留意？定係冇人敢講？如果早啲有入升降機嘅人，可能係康橋之家嘅員工、前員工、知情嘅人，唔好發吽哣，唔理唔望自己企埋一角，早啲出聲，或者2014年呢單案嘅受害人就唔會出事。香港人已經面對好多嘅唔合理，樓市嘅唔合理，3,600蚊租個床位；價值觀嘅唔合理，以為29歲買到樓就真係得到全世界；政治嘅唔合理，三權分立早已被人狠狠踐踏；如果連人格都冇埋，我唔知香港仲可以有咩留低。根據《禮運大同篇》，「大同」係指：「大道之行也，天下為公，選賢與能，講信修睦，故人不獨親其親，不獨子其子，使老有所終，壯有所用，幼有所長，鰥寡孤獨廢疾者皆有所養；男有分，女有歸，貨惡其棄於地也不必藏於己，力惡其不出於身也不必為己，是故謀閉而不興，盜竊亂賊而不作，故外戶而不閉，是謂大同」。大同係一個烏托邦，但香港，好似離呢兩個字越來越遠。千頌C
http://www.fb.com/winbigwok本欄逢周三刊出
來源:
http://hk.apple.nextmedia.com/financeestate/art/20161019/19805089
Next Page