笑到最後：學習龜功決戰大鱷
1 :
GS(14)@2017-06-10 12:21:47港股小時代似乎已經降臨，最明顯嘅特徵係連港交所（388）終於都肯行，部份內銀亦都突破高位，加上指數日日有得升，另一個時代已經嚟到。至於點解話個時代係小？因成交唔配合，現時成交連1,000億元都不足，同2015年比所謂大時代2,000億元差一大截，加上唔升嘅股仲有好多，中移動（941）已經係一例，大牛市理應乜都升，叫大並不符實。更重要因素係技術指標超買嚴重，好多人都見到，但係大市繼續升，無視指標。首先，指標只係參考，好似鄰欄晉佳分析過，金融海嘯後三次近似升市，RSI都係有相似嘅超買情況，都要經歷調整先有新發展，分別在於調整得快定慢。其次，資金市無須要睇技術指標同基本分析，有錢就可以炒上去，一係外資沽美股換港股炒起，一係北水唔炒A股轉炒港股，以港股規模計，的確有條件被外來資金炒起。今年頭半年同以往最大分別係，每次炒都集中炒一個板塊，然後轉過去另一個再炒。大家可能會話，不嬲都係板塊逐個炒，但今次唔同嘅係，炒完嘅板塊唔跌，只係喺高位徘徊，除咗部份被沽空機構狙擊嘅股份之外。最明顯例子係IGG（799）呢類科技股，升上11蚊好多人已經話炒完，但橫行一輪?家股價仲有11.38元。面對呢種升市，死坐爛坐比起追板塊更加着數，今年炒騰訊（700）出出入入，收穫肯定唔及年初買落坐定定，相信下半年都係相若，直至炒爆為止。facebook最近流傳嘅一條片咁，一條鱷魚想食一隻龜，隻龜永遠冇可能打贏條大鱷，但因為個殼夠硬，大鱷咬極都咬唔入，雙方拉布之下，大鱷都冇勝算，反而被隻龜抓損個嘴。同一道理，不論係外資定北水，其實都係一條大鱷，喺升市超買嘅情況，大鱷就會想盡辦法震走你，令你錯失大升市，惟一可以做嘅學隻龜，縮喺個龜殼度任佢咬，死都唔放，焗住隻大鱷要咬埋個龜殼一齊上路。所以話，今浪揸緊啲咩，就要揸到尾，扑暈自己都係咁話。
高明
http://www.fb.com/bigricetea本欄逢周一刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170605/20044408