萬南 二五中環 外資驚冇「高而富」
1 :
GS(14)@2013-07-19 01:34:02http://www.metrohk.com.hk/index.php?cmd=detail&id=215713&search=1
近期城中熱話，肯定係應否收番粉嶺高爾夫球場，唔少意見認為球場只益一班富商，拆咗佢最好不過，咁樣大孖沙就冇波打笑呵呵。其實城中超級富豪，好似超人，榮太子(圖)或者協成行老闆方潤華等人，即使係粉嶺會員，但卻嫌遠路程，平日打「高而富」都喺深水灣居多，雖然呢個場較細只得9個洞，但來回打兩次咪當完成標準18洞。
今次事件，最牙痛嘅應該係一班外資機構，事關好多外資公司多年以來將亞太區總部搬到中環，早早買落「高而富」會籍供駐港高層享樂，若果真係清拆粉嶺球場，加上香港嘅空氣質素愈嚟愈差，想話叫人做亞太揸fit人都幾難咯，萬南聽到好多賓架講，香港若果連一個似樣啲球場都冇，點配做國際都會呢又？但亦有多口仔話，賓架其實可以移師香港附近嘅觀瀾湖。
依家咁多人反對，其中一個主因係政府賤租土地畀球會，令人覺得冇善用土地，高人獻計話，只要收番市值租金，令庫房有合理收入嘅話，肯定一家便宜兩家着。
正所為一石捲起千呎浪，萬南唔少朋友都買咗大批會籍，買嗰時當然冇諗過塊地係咪問政府租借，依家粉嶺出事，立即第一時間了解清楚，以免當日用幾十萬買番嚟嘅會籍變成廢物。
大台喪玩穿越時空 越睇越有驚冇喜
1 :
GS(14)@2016-10-17 08:09:24近日一對喺1985年《回到未來》（Back to the Future）中出現過嘅自動綁帶波鞋實體面世，令時空穿越呢件事，突然變成一個話題。大台其實「好潮」，屢次以穿越時空呢條橋嚟做劇集故事嘅橋段，不過同一款橋唔代表套套效果都係一樣嘅。
《尋秦記》
首播年份：2000年故事：改編自作家黃易嘅同名小說，電視劇版講警隊要員保護組警員項少龍（古天樂飾）喺一次時光機科學實驗中，被送返去2000幾年前嘅戰國時代，更要搵番秦始皇，佢就以現代人所得嘅知識，以及佢喺特種部隊所學嘅職業專長，喺戰國時代化險為夷……演員：古天樂、江華、宣萱、滕麗明、郭羨妮、鄭雪兒、李子雄等好睇度：＊＊＊＊＊（以5＊為最高）可能因為《尋秦記》係大台開創穿越時代劇種嘅先河，加上係當年嘅台慶劇，所以口碑同製作都相對地認真，而且主演嘅都係好戲之人，包括古天樂、江華、宣萱、滕麗明、郭羨妮等，睇卡士都贏幾條街。而古天樂更憑呢套劇，贏得2001年《萬千星輝頒獎典禮》最佳男主角。
《九五至尊》
首播年份：2003年故事：喺200年前嘅清朝，當呂四娘（張可頤飾）行刺雍正皇帝（江華飾）之時，遇上水龍捲，兩人穿越時空到21世紀嘅香港。雍正陰差陽錯成為李大蝦，入咗建材公司做嘢，仲利用自己嘅智慧謀略輔佐三公子岑日禮（林韋辰飾）喺家族企業中平步青雲；而呂四娘就成為同一建材公司老闆岑兆康（秦沛飾）嘅貼身保鏢。因為兩個古代人喺現代香港生活，發生咗好多唔同嘅笑料。演員：江華、張可碩、曾偉權、郭政鴻、鄧一君等好睇度：＊＊＊＊繼《尋秦記》之後，江華喺《九五至尊》中擔任，同張可碩合作，兩個唔單止夠撐場，而且真係演得好。一直都Chok住演嘅江華演活咗原本係皇帝、點知墜入現代凡間變平民，淨係講對白都已經活靈活現，氣勢贏晒。
《巴不得爸爸》
首播年份：2009年故事：楚帆（陳錦鴻飾）同楚慈（吳卓羲飾）性格相反，為免爭拗而分住嘅兩人，後來因楚帆有老人痴呆，返家同住嘅楚慈因嬲爆老竇破壞自己可以過檔鉅富程坤棉旗下，同時又打算結束老父心中雲吞麵檔，同安排對方入住老人院。點知楚慈一次意外穿越時空，返去六十年代，撞見年輕嘅楚帆、程坤棉等人。楚慈以為自己投靠程坤棉就可以攀龍附鳳飛黃騰達，後來發現對方欺上瞞下，加上記起以往嘅父訓，有所頓悟，拒絕幫棉，但棉發現楚慈來自未來，更知道自己會變成鉅富，反過嚟利用楚慈……演員： 姜大偉、陳錦鴻、胡杏兒、吳卓羲、楊思琦、胡定欣等好睇度：＊＊＊雖然卡士唔及上面兩套咁強，個故事都叫有啲meaning，不過，因為套劇嘅拍攝背景同電影版《難兄難弟》類同，甚至有人懷疑大台「參考」橋段，所以成件事個印象分大減。順帶一提，套劇係幾年之後開咗套姊妹劇《巴不得媽媽》（但兩個古仔係冇關係嘅）。
《回到三國》
首播年份：2012年故事：MK仔司馬信（馬國明飾）平日沉迷三國online game，更視諸葛亮為偶像，佢喺一次意外下商逢一個500年一遇嘅超級颱風，差錯腳而跌入時光隧道，返咗去三國時代。司馬信遇上諸葛亮（林峯飾），仲拍檔上陣殺敵，正常司馬信以為自己泊到個好碼頭時，發現諸葛亮根本唔係咁諗，二人決裂，雖然一度和好，但最後都係反枱收場，返唔到現代嘅司馬信憑住自己「先知」嘅能力喺三國大展拳腳……演員：馬國明、楊怡、林峯、羅樂林、蔣志光等好睇度：＊＊＊馬明BB擔正嘅《回到三國》，原本有佢天然呆嘅演繹，加埋有楊怡演嘅桑柔，個卡士組合係幾好嘅，可惜劇情無法之觀眾留下深刻印象，只係記得大結局係古代嘅楊怡嚟咗現代搵馬明BB團圓，但……又唔係大團圓結局，睇到個心嗱住嗱住。
《張保仔》
首播年份：2015年故事：女警黃娣妹（陳凱琳飾）喺長洲緝捕賊王Bowie（陳展鵬飾）時發生槍戰，娣妹靠喺張保仔洞執嘅古錢救命，之後佢出海追賊，遇上水龍捲被捲走，之後佢發現自己去咗清代嘉慶年間嘅海上戰場。海盜紅旗幫嘅張保仔（洪永城飾）某次出戰時發現娣妹，將佢捉返水寨；另一邊廂，娣妹被十一貝勒旻皓（陳展鵬分飾）喺平定海盜行動時生擒兼逼佢套料，可惜不果。娣妹喺返回現代前努力撮合自己嘅太爺同太嫲，避免自己灰飛煙滅；同時，佢打算借水龍捲再現時機返現代，保仔幫手，但旻皓現身同保仔打起上嚟，令娣妹返回現代大計受阻……演員：洪永城、陳凱琳、陳展鵬等好睇度：＊首先，故事太複雜，穿越完都仲要搞清楚啲一人分飾兩角，睇到頭都大；其次，故事想包圍嘅嘢太多，但要塞晒喺嗰幾十集嘅故事度，似乎太貪心。加埋啲演員……你懂的，所以……慳番啲時間做啲有益有意義嘅事更好。
來源:
http://hk.apple.nextmedia.com/entertainment/art/20161017/19803585