退出社民連 陳德章：對港心灰「唔反對叫我逃兵 起碼盡過力」
1 :
GS(14)@2017-02-05 10:36:46【本報訊】2013年的施政報告及財政預算案地區諮詢會上，社民連陳德章「掟蛋」抗議，誤中時任財政司司長曾俊華，判囚3周。事隔3年多，被掟中的曾俊華趕科場問鼎特首寶座，掟蛋的陳德章卻歸故里退出社民連。陳德章坦言退黨是對香港社會環境心灰，自己追求民主自由的熱情如放進了冰水，強烈「溫差」令他吃不消，「我唔反對人哋叫我做逃兵，但起碼5年來我係盡過力去為香港民主運動」。記者：陳雪玲27歲的陳德章2011年美國華盛頓大學政治系畢業後返港，積極參與社運，當年以「民間電台」名義出戰區議會，挑戰建制派龐愛蘭失敗，2015年則以社民連名義出戰區選，再度敗陣。陳德章的名字在報章出現，多與「示威」、「被捕」、「檢控」等字眼扯上關係，去年底卻突然透過facebook公佈辭去社民連內務副主席一職，待港鐵案及在囚人士膳食的司法覆核完成後，正式退黨。
「港人核心價值係顧自己」
陳在過往的訪問中曾說過，選舉期間聽到有人左一句「靠你」、右一句「撐你」，反而覺得憤怒，因希望更多港人靠自己去爭取。現在選擇做「逃兵」，是否變成自己口中的這些人﹖「我唔會諗靠其他人，有需要我一定會返出來，要俾人拉或者坐監，我從來都唔會後悔‥‥‥講靠你、撐你，付出可以咁廉價，如果我做唔到，唔會叫人做，如果我哋做唔到暴力抗爭，絕對唔會叫支持者、參與者去做」。他憶起佔領運動時一則小事，或可令外界對他求退多一點了解。當時衝龍和道行動升級，幾個後生仔不斷指罵後面的人為何不衝？陳當下問他們在做甚麼，「班女仔喺前面戴緊頭盔衝緊，我叫佢哋唔好嘈喇，一手蹺住佢哋同我一齊去，佢哋就話：『唔得呀﹗唔得呀﹗』跟住笠水走人」。他自言對社民連不灰心、對相信的理念不灰心，但香港的社會環境令人灰心，是萌退原因：「79日（傘運）我坐得70日，都覺得對自己唔住，但你話去咗一日，就係持份者心態，覺得自己係持股人，從來唔會覺得你係有義務去做，真係激死」。他坦言追求民主自由的熱情放在香港的環境下「溫差太大」，令他吃不消，「香港人連坐監都要驚嘅時候，然後批評內地嘅人唔爭取民主？其實內地維權人士好多坐緊監，判好多年」。他嘆喟：「香港人嘅核心價值唔係人權法治自由，好多都係顧自己，呢個係好難改變到嘅事。」但即使不是社民連核心成員，只要住在香港，陳也明言：「唔會就咁摺埋」，社會運動、公民抗命甚至暴力抗爭都會出來；選擇暫別，對曾健成、梁國雄、吳文遠與唐婉清等4個黨友最感歉意：「因為佢哋仲堅持緊，但我呢個時候覺得攰，要退出。」離開社民連，未想前路，「越睇得多書越覺得自己識嘢少」，短期目標是完成哲學碩士課程。
來源:
http://hk.apple.nextmedia.com/news/art/20170203/19916386