| ||||||
別看輕你的工作。今期主角Lorey（陳家偉），皮膚黝黑，穿上殘舊T-shirt、老牛，褲袋插上界刀，屈膝在地上，密密鋪草皮。客人以為他是地盤工人，但他其實是月入逾十萬的人造草皮公司老闆。 今年三十歲的Lorey，是中大哲學系畢業生，但放棄揸筆做「文人」，走去建材公司做「工人」，其間學識草皮設計。四年前，他與同事自立門戶開設人造草皮公司Liveturf，轉揸界刀搵食。當日僅以兩萬元 創業，由Cold Call、「掃街」搵客、蝕錢都做，慢慢建立網絡，現時愈來愈多大客，如Adidas及Puma等。 近月食正世界盃熱，接了不少商場鋪草皮生意，月賺十多萬元。 世界盃本週四開鑼，近幾個月Lorey相繼接到不同商場項目，都是佈置人造草皮足球場；配上大螢幕，讓世盃期間客人能坐在草地上觀戰，增加氣氛。上週二，他與拍檔Eric、Andy及裝修師傅，到信和旗下商場奧海城開工。Lorey一邊在草皮貼雙面膠紙一邊說：「呢啲係臨時性，所以用膠紙就得，有啲要長久嘅就用強力膠水。」把草皮貼好後，再用界刀把多餘的草皮界走收邊。這個項目收費七萬元，Lorey笑指利潤不多，故希望可以盡快完成，不須OT。 自言平日「口水多過茶」的他，工作期間都閉起嘴巴默默做。他們最初預計這個項目要做足兩天，但在各人努力下，進度比想像中快，一天已鋪完，Lorey笑說：「慳咗一日的工人薪金！」本週二，模具製造好後，再在草皮塗上足球場的白油，便宣告大功告成。 緊接著，Lorey又到領匯旗下的樂富商場鋪迷你足球場。項目細，個多小時便鋪好，有份參與活動的前女足國腳劉力豪落場踢了一下波之後，盛讚Liveturf鋪的人造草皮。她說：「我踢過很多人造草皮場，那些都很粗糙，這個卻很舒服，看他們安裝的時候也很快手。」 自行設計草皮 坊間有不少人造草皮公司，Lorey坦言：「你去Google搜尋草皮，香港都有三十三間！」他坦言，這一行競爭大，不過他發現很多都是「叔父輩」經營，他的優勢就是夠後生，有活力及創意！他知道大部分人造草皮公司都是從內地直接訂草皮，「買到乜就鋪乜，無咩特別。」於是他在草皮款式方面多花心思，例如利用不同的尼龍和塑膠混合，製出像真度更高、質地較柔軟的草皮，再找東莞一間紡織廠替他製造，他說：「真草會有新草、舊草、有枯萎，想像真度高啲，我試用幾隻唔同的綠色，深綠到淺綠，再加少少啡色尼龍絲喺底，製造黃黃綠綠的感覺。」Lorey為讓草皮符合心水顏色，更自行找顏料，讓紡織廠替草皮上色。他指鋪草皮收費平均二十至四十元一呎，實際價錢因應所需草皮質料而定，如密度較高的草絲，所用的尼龍較粗，成本價高達每呎三十元。除內地入貨外，Lorey也從德國買入尼龍草皮Luxur HGL，因小批量採購，加上外國入口，買入價每呎四十五元，賣出價高達每呎一百元。 派草皮吸客 開業初期，規模未如行家，他唯有勤力宣傳，從住宅客入手，他說：「住宅客唔會在意公司規模，包裝靚就有信心。」他自行印宣傳單張，初時郵寄了一千封出去學校及住宅，卻完全無回音！他再接再厲，花六千元再印一疊宣傳單張，由錦上路至大埔一帶豪宅用腳行「逐間派」：「好快就接到豪宅客！佢哋鋪嚇個花園、露台，項目比較簡單。」小試牛刀初見成果，他繼而把客戶「升呢」。除了找攝影師拍照，製作網頁等基本功夫外，更請來設計師，設計一個裝著草皮樣板的包裝盒去各大建築師樓，至今已寄了約七百盒。他自言非常「揼本」，「當時月賺得三萬，但我會用兩萬蚊去搞宣傳。」他自信地說：「而家有七成嘅建築師都認識我哋，需要用人造草皮時，都會搵埋我哋quote價，帶嚟好多外判嘅生意。」 Lorey憶述第一單「大生意」來自新鴻基，包辦鴨脷洲豪宅南灣所有見光的天面位置，有六位數字收入，令他興奮不已：「我自己打電話去sell，點知佢哋話可以見面。面試時，我哋著得官仔骨骨，抱住成卷草皮上去，就中咗。當時諗住一試無妨，冇諗過會中。我同阿爸講，呢半年唔使煩。」懂得把握幾會的Lorey，曾為咖啡店Caffe Habitu加裝草皮。為了保持與客人關係，Lorey把握機會，主動協助老闆廖偉芬搞的環保活動「升級週末坊」，把舊傢具翻新送予有需要人士。廖偉芬亦對他讚不絕口，「佢將草皮變得好有趣，我欣賞佢有呢種創新精神。」 無得賺都要接 他當初只用兩萬元創業，到如今平均月賺十多萬元。除了商場，不少大品牌，如Puma及adidas等都找他為其店舖做草皮佈置。然而，部分大型發展商項目，屬投標，價低者得，而他亦會接判上判的項目，有時甚至是三判，收入「少一浸」，Lorey指計及成本，無甚水位，但他依然會接。一方面可以加強自己的履歷，亦可「養活」員工。如上月完成的領匯轄下友愛邨的項目，在休憩公園的石壆鋪上草皮，由於石壆呈立體，故彎位、角位要細心收邊，講求手工，項目需時一個月，就要出動四十位師傅，他說：「有班長散工師傅，要keep住俾order佢哋，先唔會流失，唔使蝕都算唔錯。」 至今，Lorey亦不斷擴闊自己的人際網絡，他參加了香港商會BNI，每星期五晨早七時的早餐會，都是擴充人脈的好機會，即使工作至夜深，他仍堅持出席，「有好多客都係響嗰度搵返嚟o架！」他就曾多次邀請記者一同出席。他認為識得人多，亦間接有助生意，剛開業就是由一位相熟的「太子爺」免費租出鴨脷洲貨倉予他，「我每個月請佢食餐飯就得！」去年把貨倉搬到屯門，亦是跟一位萍水相逢的阿姨夾倉用，「大家傾得埋o架咋！」貨倉一邊擺了一卷卷的草皮，另一邊就是龜靈膏的包裝袋。 辦公室如遊樂場 Lorey是中大辯論隊隊員，他亦自問「把口得」，中四暑期工到傢俬店賣按摩椅，月賺萬六。畢業後又放棄白領工作，選擇到建材公司做銷售員。打工期間，開始對人造草皮有認識，其時不滿公司加人工加得少，又無發揮機會，與幾個舊同事決定辭職創業。當時每人夾五千元，以他的家作為辦公室。合作至今的兩名夥伴Andy和Eric，Lorey形容他們角色分明，認識八年來都沒有吵架：「Eric可以一日打五十個電話搵客，Andy就數據分析好掂，我負責公司大方向同執行，我哋唔會challenge對方。」 三人充分發揮八十後享樂精神，他們把八百呎的辦公室佈置成娛樂室，一張大沙發、影視器材、兩部街機，還有一個大酒櫃，邊度橋邊娛樂好識嘆，「創業就係為咗可以一路做一路嘆，如果唔係點解自己做生意！」他笑說。剛剛他們又想到新構思，一人一句，七嘴八舌：「我哋可以做一組『草皮拼圖』，好似小朋友用的軟壁拼圖般，租俾用戶搞活動，咁就可以賺……。」 | ||||||