中環在線： 惡搞網寸爆大花筒 克魯明被破產
1 :
GS(14)@2013-03-13 00:08:19http://hk.apple.nextmedia.com/financeestate/art/20130312/18192093
美國人出名揮霍，就連諾貝爾經濟學獎得主克魯明都要申請破產保護？！美國一個新聞網誌近日惡搞克魯明，話佢喺紐約曼克頓下城買咗個870萬美元（約6,786港元）嘅單位未供完，另欠62萬美元卡數，仲要喺珠寶名店買嘢，實際資產只得3.3萬美元，惟有申請破產。
「The Daily Currant」報道，克魯明04年開始有卡數問題，成日買貴衫貴車，希望《紐約時報》老闆見佢生活品味夠高，畀啲股份佢。即使佢知道做唔成股東，依然豪花，希望喺鏡頭前靚仔啲，佢嘅書好賣啲。
「諾獎得主估到樓市泡沫咩？」
佢最錯就係07年樓市高峯，喺紐約買咗個物業，之後跌價四成，變成負資產。買咗佢呢個物業嘅仁兄寸佢：「你估諾貝爾經濟學獎得主就真係估到有樓市泡沫咩？」
查實成單嘢只係搞鬼傑作。「The Daily Currant」專門老作新聞，旨在諷刺時弊同人物。今期主角克魯明，被譽為當代凱恩斯主義嘅最佳演繹者，認為國家主權債務危機可以透過增加政府借貸推動需求。今次惡搞就係寸佢成日叫人消費，但好多美國人就係揮霍無度，借錢豪花，最終搞到破產！
舊年11月呢個網誌就報道過，共和黨前總統喬治布殊因為唔識用投票機器，唔小心投錯票畀對家民主黨嘅奧巴馬，明顯寸小布殊老土啦，段新聞仲俾部份傳媒當真咁報道。
李華華